Obhwambiro 31

Yakobho aramwibhisa Rabhani

Mbe, Yakobho akeegwa amangʼana ega, abhaana bha Rabhani bhareengʼeheerya ega, “Ndora Yakobho agegeri ebhintu bhya taata bhyonsego, na mbyo bhimuniibhirye.” 2 Na Yakobho akaamba okurora obhusu bhwa Rabhani, akamanya ega, atakumujomererwa bhwaheene kya ego yaamujomererwanga enyuma hayo. 3 Nho, OMUKURU akakeerya Yakobho ega, “Ohunjuke mukyaro kya bhajaaji weenyu, na abhahiiri bhaaho. Oni ndibha hamwi na uuwe.” 4 Kwa ego, Yakobho akatuma abhantu naho bhabhirikire abhakari bhaaye, Raheri na Reya, bhaaje mwisisi enú yaaringa arariisya egintugo gyaye. 5 Hanú bhaahika, akabhakeerya ega, “Nduuji ega, eseweenyu atakunjomererwa kya ego yaaringa aranjomererwa enyuma hayo. Nawe, Waryubha wa taata, yaabha hamwi na oni. 6 Bheenyu mumanyiri ega, naakorera eseweenyu emirimu kwa eginguru gyani gyonsego. 7 Kora ego, yaangʼenereerye kwa okukyukya amariho gaani, mara ekumi. Nawe, Waryubha ataamutiga yanyahaare.

8 “Eseweenyu hanú yaagamba ega, ‘Egintugo gya obhusangura, ngyo giribha amariho gaaho,’ nho egintugo gyonsego gikeebhura egya obhusangura. Na hanú yaagamba ega, ‘Egintugo gya amagererera, ngyo giribha amariho gaaho,’ nho, egintugo gyonsego gya amagererera gikeebhura egya amagererera. 9 Niigo, Waryubha yaagega egintugo gya eseweenyu, akangʼaana.

10 “Eribhaga rya egintugo okugega amaryemi hanú ryahika, nkaroota ekirooto. Na mukirooto kiyo, naarora amagorohe ganu gaarinanga eginkari gaaringa na amagererera, obhusangura na amakabhara. 11 Mukirooto kiyo, maraika wa Waryubha akambirikira ega, ‘Yakobho!’ Nkeetabha ega, ‘Ndingi hanu!’

12 “Akankeerya ega, ‘Tiirura ameeso omaahe, amagorohe gonsego ganú garariina eginkari gaana amagererera, obhusangura, na amakabhara. Eringʼana rinu ribheeri ego, kwa okubha nduuji kya ego Rabhani akukoreeri. 13 Oni nooni Waryubha, unú yaakwibhukira Bheteri, ahasi harya weemirirya erigina, kya entimu, na okuihaka amaguta, na kweki okandiira emuuma. Bhoono, nuurwe mukyaro kinu, ohunjuke mukyaro kinú weebhurirwa-mo.’ ”

14 Nho Raheri na Reya bhakamukyukya ega, “Bheetu turagya na uuwe, kwa okubha tutaana engabho yoyonse inú turigabha kutaata. 15 Taata aratubhara bheetu kya abhageni, kwa okubha yaamara okutugurya. Na okutiga gayo, ebhintu bhinú twaguribhwa, yaamara okubhirya. 16 Ebhintu bhyonsego bhinú Waryubha aruusirye taata, maheene m-byetu, na abhaana bheetu. Mbe, gonsego ganú Waryubha akukeererye, ogakore.”

17 Nho Yakobho akaseemya orugendo. Akariinʼya abhakari na abhaana bhaaye kugingamia. 18 Akagega egintugo gyaye gyonsego, hamwi na ebhintu bhyaye bhyonsego bhinú yaanyoora Padani-Aramu. Akaamba orugendo rwa okuhinda mukyaro kya Kanaani kwi Esaaka, esewaabho. 19 Eribhaga rya okwimuka kwabho, Rabhani yaaringa agiiri okukata amabhuri ga egintugo gyaye, nho Raheri yaanyoora omweya gwa okwibha ebhisusano bhya esewaabho bhinú yaasyengeranga. 20 Ego niigo, Yakobho wonse, yaangʼena Rabhani Omwaramu, akeemuka bira okuraga. 21 Weeki yeebhisa na ebhintu bhyaye bhyonsego, akaambuka oruuji rwa Efurate, akabhata orubhaara rwa mubhikuku bhya Gireadi.

Rabhani aramuseeta Yakobho

22 Hanú eginsiku esatu gyahita, Rabhani akakeeribhwa ega, Yakobho atorokeri. 23 Nho, Rabhani akakumanʼya abhahiiri bhaaye, bhakabhanga bharamuseeta kwa eribhaga rya eginsiku muhungati. Bhakamunyoorera munkuku gya Gireadi. 24 Nawe obhutiku, Waryubha akamwibhukira Rabhani Omwaramu mukirooto, akamukeerya ega, “Wiyangararire, otakemera Yakobho eringʼana ryoryonse rirya!”

25 Mbe, hanú Rabhani yaanyoora Yakobho munkuku gya Gireadi, weeki yaaringa yeemirirye amabhuru gaaye hayo. Rabhani wonse na abhahiiri bhaaye, bhakeemirirya amabhuru gaabho munkuku hayo.

26 Nho, Rabhani akamukeerya ega, “Unkoreeri-ki? Ndora ungʼeneri, ogegeri abhahara bhaani muna bhaatumbarirwa mwiihe! 27 N-kwaki weebhisa bhugunyi, okangʼena kora otaankeerya? Okankeererye naho nkurage ogye kwa obhujomerwa, ameembo, egingʼoma na amatungu! 28 N-kwaki otaatiga ndagane na abhahara bhaani na abheejukuru bhaani kwa okubhahumbata? Waakora amangʼana ga ekikangi.

29 “Niina obhuturo bhwa okukusikya, nawe obhutiku bhwa okwimukira reero, Waryubha wa eseweenyu Esaaka, yaankeererye ega, ‘Wiyangararire, otakemera Yakobho eringʼana ryoryonse rirya!’ 30 Mmanyiri ega, weebhisa kwa okubha uuna enamba bhukongʼu ya okuhunjuka kubheebhuri bhaaho. Nawe ndora weebha ebhisusano bhyani bhinú naasyengeranga?”

31 Yakobho akamukyukya ega, “Neebhisa bhugunyi, kwa okubha noobhoha ega, okaanduusirye abhahara bhaaho kwa eginguru. 32 Nawe oraanyoore omuntu wowonse yaana ebhisusano bhyaho, yeetirwe hanuhanu. Yoorokya ekyaho kyokyonse embere ya abhahiiri bheetu okigege.” Yakobho ataaringa amanyiri ega, Raheri ngʼo yeebhiri abhakuru bha esewaabho.

33 Nho Rabhani akatuna ebhisusano bhyaye mumabhuru ga Yakobho, Reya, na erya abhagaya abhabhiri bharya, nawe ataabhinyoora. Akarwa mwibhuru rya Reya, akasoha mwibhuru rya Raheri. 34 Raheri ngʼo yaaringa agegeri ebhisusano bhiyo, abhibhisiri mumatandiko ga engamia. Yeekeeri-ko. Rabhani akatuna mwibhuru ryonsego, nawe ataabhinyoora. 35 Kimwi, Raheri akakeerya esewaabho ega, “Taata, nnyabhira otajima. Ntakutura okwimirira embere yaaho, kwa okubha ndingi kuginsiku gyani.” Mbe, Rabhani akatuna ebhisusano bhyaye bhiyo, nawe ataabhinyoora.

36 Ego, Yakobho akajima, akabhuurya Rabhani ega, “Obhubhiibhi bhwani m-buuha na m-busarya-ki bhunú nkukoreeri okuhikira ohikire okunseeta kwa kira enjira? 37 N-kintu-ki kyaho, kinú onyooreri mumabhuru gaani muyo? Okyorokye embere ya abhahiiri bhaani, na abhahiiri bhaaho, naho bhatutanʼye bheetu abhabhiri!

38 “Neekara na uuwe kwa eribhaga rya emyaka mirongo ebhiri. Eribhaga riyo ryonsego, ritariho eringʼondi kora emburi yaaho, ginú gyabhoronjora. Ntaakariri kora entugo ensaaja okurwa mwihijo ryaho. 39 Ntaakakureeteeri entugo yaaho ega, eriirwe na entyenyi ya kibhara. Nawe naariha oni omwene! Kweki waantonga okuriha kyokyonse kinú kyebhwa obhutiku kasi omubhasu. 40 Naaringa ega, omubhasu ebhigeri bhyageranga, na obhutiku neegwanga embeho bhukongʼu, na egintiro gyabhuranga, kwa okubha naarindanga egintugo. 41 Neekara owaaho emyaka mirongo ebhiri gyonsego. Naakukorera emirimu emyaka girya ekumi na ena, kurusumo rwa abhahara bhaaho abhabhiri, na emyaka egindi esansabha, kurusumo rwa okwinyoorera emitugo gyani okurwa kumahijo gaaho. Nawe, waakyukya amariho gaani mara ekumi! 42 Waryubha wa jaaji weetu Abhurahamu, Waryubha unú arasuukwa na taata Esaaka, uuja okunyoora ega, ataringi hamwi na oni, maheene okaankenyerye amabhoko masa. Nawe, weeki yaaruuji kya ego ndanyanka na emirimu ginú naakora kwa amabhoko gaani. Nkyo kyakoreri obhutiku bhwa okwimukira reero, akakukanʼya ega, otakemera Yakobho eringʼana ryoryonse rirya, erijomu kasi eribhiibhi.”

43 Rabhani akamukyukya ega, “Abhahara bhanu m-baani, abhaana bhanu m-beejukuru bhaani, amahijo ga egintugo ganu n-gaani, na bhyonsego bhinú orarora hanu m-byani. Nawe bhoono, kwa okubha ntakutura okukora kyokyonse kubhahara bhaani na abhaana bhaabho, 44 njo tukore eriragano, ribhe obhwimiririri gati yaani na uuwe.”

45 Mbe, Yakobho akagega erigina, akariimirirya kya entimu. 46 Akamara akakeerya bhonsego ega, “Mukumanʼye amagina.” Bhakakumanʼya amagina, bhakakora entundaari. Kimwi, bhakariira ebhyakurya haangʼi na entundaari ya amagina iyo. 47 Rabhani akatoga ahasi hayo ega, Yegari-Sahaduta. Nawe, Yakobho weeki, akahatoga ega, Gareedi.

48 Rabhani akakeerya Yakobho ega, “Entundaari ya amagina inu, ngʼyo obhwimiririri gati yaaho na oni eguru ya eriragano rinú tukoreri reero.” Nkyo kyakora bhakaitoga ega, Gareedi. 49 Kweki entundaari irya ekatogwa Mijipa, kwa okubha yaagamba ega, “OMUKURU abhe omwimiririri weetu, kora hanú turyanga okumaahana.” 50 Akagendererya okugamba ega, “Hanú orinyankya abhahara bhaani, kasi hanú oriteta abhakari abhandi okukira bhanu, kora onyoora otariho omwimiririri gati yeetu, hiituka ega, OMUKURU ngʼo omwimiririri gati yaani na uuwe.”

51 Rabhani akamukeerya kweki ega, “Maaha entundaari ya amagina inu, na erigina rinú wimiriirye kya entimu gati yaani na uuwe. 52 Entundaari ya amagina na erigina rinú wimiriirye kya entimu, mbyo obhwimiririri. Bhiriimiririra ega, oni ntaribhyambuka okuuja kuuwe okukurwanʼya, na uuwe otaribhyambuka okuuja kuoni, okundwanʼya. 53 Waryubha wa jaaji weenyu Abhurahamu, na Waryubha wa jaaji weetu Nahoori, na Waryubha wa bha esewaabho, aritwamurira!” Nho, Yakobho akateena ku Waryubha, unú yaasuukwanga na esewaabho Esaaka. 54 Akamara akaruusya ekimwenso munkuku harya, akagenihya abhahiiri bhaaye, bhaaje okurya ebhyakurya hamwi. Hanú bhaamara okurya, bhakatama munkuku hayo obhutiku kyo.

55 Rabhani akeemuka nyenkyo juri, akahumbata abhahara na abheejukuru bhaaye, akabhanonka, kimwi akahunjuka iika.