Obhwambiro 30

Raheri hanú yaarora ega, atakumwibhurira Yakobho abhaana, akaamba okumaahira omuhara waabho Reya orwango. Akakeerya Yakobho ega, “Ngʼana abhaana! Nyoore tiigo, ndakwa!” 2 Yakobho akamujimira, akamukeerya ega, “Oni nooni Waryubha unú yaakuribhira okugega enda?” 3 Nho, Raheri akamukyukya ega, “Ariho omugaya waani Bhiriha. Wibhure nawe, naho nonse nyoore abhaana okuhitira kumwene!”

4 Kwa ego, Raheri akahaana Yakobho omugaya waaye Bhiriha, abhe omukari waaye. Yakobho akaraara nawe. 5 Bhiriha wonse akagega enda, akamwibhurira Yakobho omwana wa ekimura. 6 Raheri akagamba ega, “Waryubha yaankoreeri bhwaheene, yeegwiri eriisi ryani, yangʼeeri omwana wa ekimura.” Kwa ego, akamutoga, Daani.

7 Bhiriha, omugaya wa Raheri, kweki akagega enda, akamwibhurira Yakobho omwana wa kabhiri wa ekimura. 8 Raheri akagamba ega, “Twasongeeni na muhara weetu, naahigiri.” Kwa ego, omwana uyo, akamutoga Nafutari. 9 Reya, hanú yaarora ega, atiniri okwibhura, akahaana Yakobho omugaya waaye Jiripa, abhe omukari waaye. 10 Jiripa wonse, akamwibhurira Yakobho omwana wa ekimura. 11 Reya akagamba ega, “Eriruguto erijomu!” Kwa ego, akamutoga, Gadi. 12 Jiripa omugaya wa Reya, akamwibhurira Yakobho omwana wa kabhiri wa ekimura. 13 Reya akagamba ega, “Nyakara oni, kwa okubha abhakari bharambirikirenga ega, nyakara.” Kwa ego, akamutoga, Asheri.

14 Eribhaga rya erigesa rya egingano, Rubheni akagya mwitema, akanyoora eyo emisumo ginú gyabhirikirwanga ega, egintobhwatobhwa. Akareetera ngʼina waabho Reya. Nho, Raheri akakeerya Reya omuhara waabho ega, “Ngabhira-ko egintobhwatobhwa gya omwana waaho.” 15 Nawe, Reya akamukyukya ega, “Orakanya ega, ni-ringʼana eke okunduusya omusaaja waani, na bhoono oreenda okugega egintobhwatobhwa gya omwana waani?” Raheri wonse, akamukyukya ega, “Ngabhira-ko egintobhwatobhwa gya omwana waaho, naho Yakobho araare mwaho reero.”

16 Kumugoroobha, Yakobho hanú yaaringa arahinda okurwa mumugunda, Reya akagya okumuturuungʼana, akamukeerya ega, “Reero, oraraara mwani. Nkunyooreri kwa okuruusya egintobhwatobhwa gya omwana waani.” Nho Yakobho akaraara nawe obhutiku bhuyo.

17 Waryubha akeegwa amasabho ga Reya. Wonse akagega enda kweki, akamwibhurira Yakobho omwana wa ekimura wa kataanu. 18 Reya akagamba ega, “Waryubha yandihiiri, kwa okubha nheeri omusaaja waani, omugaya waani!” Kwa ego, akamutoga Isakari. 19 Reya akagega enda kweki, akamwibhurira Yakobho omwana wa ekimura wa kasansabha. 20 Akagamba ega, “Waryubha yangʼeeri omutuho omujomu! Bhoono, omusaaja waani araansuuke, kwa okubha naamwibhuriiri abhaana bha ekimura bhasansabha.” Kwa ego, akamutoga Jabhuroni. 21 Reya akeebhura kweki, nawe bhoono omwana wa ekihara, akamutoga Dina.

22 Kimwi, Waryubha akamuhiituka Raheri. Akeegwa amasabho gaaye, akamuhaana orwibhuro. 23 Wonse akagega enda, akeebhura omwana wa ekimura. Akagamba ega, “Waryubha yanduusirye eginsoni!” 24 Kwa ego, akamutoga Yusufu, aragamba ega, “OMUKURU yanyongerye omwana oundi.”

Yakobho araniibha

25 Raheri hanú yaamara okwibhura Yusufu, Yakobho akakeerya Rabhani ega, “Maama! Unyikiririrye nhunjuke iika, mukyaro kyetu. 26 Ngʼana abhakari bhaani bhanú naanyoora kwa okukukorera emirimu, na abhaana bhaani. Uuwe omanyiri kya ego naakukoreranga emirimu!” 27 Nawe, Rabhani akamukeerya ega, “Unyikiririrye, ogendererye okwikara na oni hanu, kwa okubha mmanyiri okuhitira obhuraguri bhwani ega, OMUKURU yanonkeri kwa ekisigo kyaho. 28 Nkeerya amariho gaaho ganú oreenda, oni nkurihe.”

29 Yakobho akamukeerya ega, “Uuwe omanyiri kya ego naakukoreranga emirimu, na kya ego naatuganga egintugo gyaho. 30 Hanú naaringa ntaraaja, ebhintu bhyaho bhyaringa bhike. Nawe, okwambira kya ego naahika hanu, OMUKURU yaakunonka, bhyaaruha bhukongʼu. Bhoono, ndeenda omweya gwa okukorera abhantu bhaani omwene.” 31 Rabhani akamubhuurya ega, “Nkuhaane-ki?” Yakobho akamukyukya ega, “Tiga okungʼaana ekintu kyokyonse. Ndagendererya okuriisya egintugo gyaho kweki, nyoore oraankorere eringʼana rinu. 32 Unyikiririrye nhite mugintugo gyaho gyonsego reero, nsore amangʼondi gonsego ga amagererera, obhusangura, amamwamu, na egimburi gya amagirangwe na obhusangura. Giyo ngyo girabha amariho gaani. 33 Kwa ego, hanú oriija okumaaha amariho gaani, kuginsiku ginú giraaja, obhuheene bhwani bhurimaahikana. Emburi yoyonse inú etaribha na amagererera kasi obhusangura, na eringʼondi ryoryonse rinú rirituuka mugyani ega, ritaringi m-mwamu, iyo eribha iibhirwe na oni.” 34 Rabhani akamukyukya ega, “Ndeekirirya, ebhe kya ego ogambiri.”

35 Mbe, orusiku ruyoruyo, Rabhani akaahurira Yakobho amagorohe gonsego ga amagererera na aga obhusangura, egimburi gyonsego eginkari ginú gyaringa na amagererera na egya obhusangura, egintugo gyonsego gya amahara amarabhu, na amangʼondi amamwamu. Egintugo gyonsego giyo, akahaana abhaana bhaaye bhagyangarire. 36 Kimwi, Rabhani akeeyahura akabha hare na Yakobho, ahasi ha orugendo rwa eginsiku esatu. Nawe Yakobho omwene, akatama arariisya egintugo gya Rabhani ginú gyaringa gitamiri.

37 Mbe, Yakobho akagega egindigi egimbisi, okurwa kumiti gya omurubhina, omuronji, na omwaramoni, akagikandura-ko amakanda, okuhikira amagererera amarabhu gakarobhoka. 38 Kimwi, akagiimirirya mumatubha ga okunywenserya, kwa okubha egintugo gyaringa na enteemo ya okutiirwa-ko kwibhaga rya okunywensibhwa amanji. 39 Kwa ego, egintugo giyo, hanú gyaaja okunywa amanji embere ya egindigi giyo, gikatiirwa-ko gikagwatya amaryemi. Eribhaga rya okwibhura hanú ryahika, gikeebhura ebhimaanwa bhya amagererera, obhusangura na ebhya amakabhara. 40 Yakobho akaahura ebhimaanwa bhya amangʼondi gayo. Kimwi akabhatya egintugo gya Rabhani kugya amagererera na egimwamu. Kwa okukora ego, Yakobho akanyoora erihijo ryaye omwene, kora atarisanganʼya na erya Rabhani.

41 Ekabha ega, kira hanú eribhaga rya okutiirwa-ko kwa egintugo eginure ryahikanga, Yakobho yaatuuranga egindigi girya mumatubha ganú gyanyweranga-mo amanji, naho gigwatye amaryemi hayohayo. 42 Nawe, ataatuuriranga egintugo ginú gitobheri. Kwa ego, egintobhu gikabha gya Rabhani na eginure gikabha gya Yakobho. 43 Kubhuteero, Yakobho akabha omuniibhi bhukongʼu! Yaaringa na amangʼondi na egimburi njaaru, egintikiri na egingamia hamwi na abhagaya bha ekikari na bha ekisaaja.