Obhwambiro 29

Yakobho arahika owa Rabhani

Kimwi, Yakobho akagendererya na orugendo, akahika mubhyaro bhya abhantu bha bhuturira-ryubha. 2 Hanú yaahika, akarora ekisima kukibhara, na amahijo agasatu ga amangʼondi gareeri haangʼi nakyo, kwa okubha mukisima kiyo, nho amahijo gayo gaanywensibhwanga. Ekisima kiyo, kyaringa kikundikiriibhwe na erigina erinene. 3 Kira orusiku amahijo gonsego ga amangʼondi geekumanʼyanga hayo. Hanú gaamaranga okwikumanʼya, nho abhariisya bhaahiringityanga erigina riyo, okurwa kukisima kiyo, naho okunywensya amangʼondi. Hanú bhaamaranga okunywensya, bhaakundikiryanga kweki ekisima kwa erigina riyo.

4 Nho Yakobho akabhuurya abhariisya bhayo ega, “Bhahiiri bhaani, murwiriri-ha?” Bhonse bhakakyukya ega, “Turwiriri mumugi gwa Haraani.” 5 Akabhabhuurya kweki ega, “Mumanyiri Rabhani omwijukuru wa Nahoori?” Bhakamukyukya ega, “Tumumanyiri.” 6 Akagendererya okubhabhuurya ega, “M-muhoru?” Bhonse bhakakyukya ega, “M-muhoru, kora omuhara waaye Raheri ngʼ-urya araaja na amangʼondi gaaye.” 7 Yakobho akabhakeerya kweki ega, “Ndarora omubhasu gukyari omururu, na eribhaga rya okukumanʼya amangʼondi ritarahika. Bhoono, munywensye, mumare mugye okuriisya.” 8 Abhariisya bhayo, bhakamukyukya ega, “Tutakutura okunywensya, okuhikira amahijo gonsego geekumanʼye hamwi, na erigina rihiringitibhwe okurwa kukisima, nho turaanywensye.”

9 Yakobho hanú yaaringa akyahaira na abhariisya bhayo, Raheri akahika na amangʼondi ga esewaabho, kwa okubha ngʼo yaariisyanga. 10 Yakobho hanú yaarora Raheri omuhara wa Rabhani, omumura waabho ngʼina waabho, hamwi na amangʼondi ga Rabhani, rumwigo, akagya mukisima. Hanú yaahika, akahiringitya erigina rirya, akanywensya egintugo gya maama waabho. 11 Kimwi, akahumbata Raheri, akakuura kwa obhujomerwa. 12 Yakobho akamukeerya ega, “Oni m-mwihwa wa eseweenyu, ndingi omwana wa Rebheka.” Kimwi, Raheri akakenya okugya iika, akakeerya esewaabho amangʼana eguru ya Yakobho.

13 Mbe, Rabhani hanú yeegwa amangʼana eguru ya Yakobho, omwana wa omuhiiri waaye, akagya nkenyo okumuturuungʼana. Hanú yaamuhikiira, akamuhumbata, akamara akamugenihya owaaye. Nho Yakobho akamutondera amangʼana gonsego ganú geebhuka. 14 Rabhani akamukeerya ega, “Maheene uuwe m-muhiiri waani na m-manyinga gamwi na oni!” Kimwi, Yakobho akeekara owa Rabhani eribhaga rya omweri gumwi.

Yakobho arateta Reya na Raheri

15 Orusiku rumwi, Rabhani akakeerya Yakobho ega, “Uuwe m-muhiiri waani, nawe, riyo ritaakore unkorere emirimu bhusa, bhoono nkeerya, oreenda nkurihe-ki?”

16 Rabhani yaaringa na abhahara abhabhiri, omukuru yaabhirikirwanga Reya, omuke Raheri. 17 Reya, yaaringa na ameeso amakwiriranu, nawe Raheri weeki, yaaringa omujomu bhukongʼu. 18 Yakobho akabha ahanjiri Raheri, kwa ego, akakeerya Rabhani ega, “Ndakukorera emirimu eribhaga rya emyaka muhungati, naho untetye Raheri, omuhara waaho omuke.” 19 Rabhani akagamba ega, “Nyakara nkutetye uuwe, ntahaana omuntu oundi wowonse. Gendererya okwikara owaani hanu.” 20 Kwa ego, Yakobho akamukorera Rabhani emirimu kwa eribhaga rya emyaka muhungati, naho amutete Raheri. Nawe, emyaka muhungati giyo, Yakobho yaagirora muna eginsiku nkego, kwa okubha yaaringa ahanjiri Raheri bhukongʼu.

21 Nho, Yakobho akakeerya Rabhani ega, “Emyaka gyani gya okukukorera emirimu gyahweri, bhoono ngʼana omukari waani ndaare nawe.” 22 Mbe, Rabhani akaraarika abhantu bhonsego bha hayo, akakora enyangi ya obhwenga. 23 Nawe kumugoroobha, Rabhani akagega Reya, omuhara waaye omukuru, akamuhirira Yakobho, na Yakobho akaraara nawe. 24 Rabhani yaaringa aruusirye omugaya waaye Jiripa, aheeri Reya abhe omugaya waaye.

25 Hanú bhwakya, Yakobho akeetakya ega, he! Unu n-Reya! Akagya akabhuurya Rabhani ega, “Unkoreeri eringʼana-ki rinu? Naakukorera emirimu naho ntete Raheri, bhoono ndeegwa ungʼeneri?” 26 Rabhani akamukyukya ega, “Oweetu enu, m-mugiro okutetya omuhara omuke, nyoore omukuru ataratetwa. 27 Bhoono, omare eginsiku muhungati gya obhwenga bhwa Reya, nho kweki ndakuhaana Raheri. Nawe, orinkorera emirimu kweki, kwa eribhaga rya emyaka muhungati.”

28 Yakobho akeekirirya. Akamara eginsiku muhungati gya obhwenga bhwa Reya, nho Rabhani akamuhaana Raheri wonse abhe omukari waaye. 29 Rabhani yaaringa aruusirye omugaya waaye Bhiriha, aheeri Raheri abhe omugaya waaye. 30 Mbe, Yakobho akaraara na Raheri wonse. Yaaringa amuhanjiri okukira Reya. Kwa ego, akakorera Rabhani emirimu kweki, eribhaga rya emyaka muhungati, kurusumo rwa Raheri.

Abhaana bha Yakobho

31 OMUKURU hanú yaarora ega, Reya atahanjirwe, akamuhaana orwibhuro. Nawe, Raheri weeki akabha omugumba. 32 Reya akagega enda, akeebhura omwana wa ekimura, akamutoga Rubheni, akagamba ega, “OMUKURU aruuji enyanko yaani, bhoono omusaaja waani araanhanje.”

33 Reya akagega enda kweki, akeebhura omwana wa ekimura, akagamba ega, “OMUKURU yangʼeeri omwana wa ekimura kweki, kwa okubha yeegwiri ega, ntahanjirwe.” Kwa ego, akamutoga Simeoni.

34 Akagega enda kweki, akeebhura omwana wa ekimura, akagamba ega, “Eribhaga rinu, omusaaja waani araabhe hamwi na oni, kwa okubha naamwibhuriiri abhamura abhasatu.” Kwa ego, akamutoga Raawi.

35 Akagega enda kweki, akeebhura omwana wa ekimura, akagamba ega, “Eribhaga rinu, ndamugungya OMUKURU.” Kwa ego, akamutoga Yuda. Kimwi akatina.