28
Mbe,
Esaaka akabhirikira Yakobho,
akamunonka,
akamuragirirya ega,
“Otateta omukari wa ekyaro kya Kanaani.
2 Ogye mukyaro kya Padani-Aramu,
iika owa jaaji weenyu Bhetweri,
otete oumwi wa abhahara bha maama weenyu Rabhani.
3 Waryubha wa Obhuturo bhonsego,
akunonke!
Akukore obhe na orwibhuro orwaru bhukongʼu,
onyoore ebhyaro ebhyaru.
4 Akunonke uuwe hamwi na orwibhuro rwaho,
kwa okuhikya eriragano rinú yaaraga okunonka Abhurahamu.
Kora onyoora omenyeri mukyaro kinu kya obhugeni,
okigabhe,
kwa okubha ekyaro kinu Waryubha yaaringa amariri okukihaana Abhurahamu.”
5 Mbe,
Esaaka akatuma Yakobho,
akagya Padani-Aramu,
owa Rabhani,
omwana wa Bhetweri,
Omwaramu,
omumura waabho Rebheka,
ngʼina waabho Yakobho na Esau.
Esau arateta omukari wa kasatu
6 Esau akamanya ega,
Esaaka amariri okunonka Yakobho,
na okumutuma Padani-Aramu,
naho agye atete omukari eyo.
Kweki yaamanya ega,
hanú Esaaka yaanonka Yakobho,
yaamukanʼya atateta omuhara okurwa ku Bhakanaani,
7 na ega,
Yakobho yaaringa abheegwiri esewaabho na ngʼina waabho,
akagya Padani-Aramu.
8 Nho,
Esau akarora ega,
abhahara bha ekyaro kya Kanaani,
bhatakungʼarira Esaaka,
esewaabho.
9 Mbe,
akagya owa Ishimaeri omwana wa Abhurahamu,
akateta Maharati,
omuhara waabho Nebhayoti,
omuhara wa Ishimaeri.
Akamutuura kubhakari bhaaye abhandi.
Yakobho araroota ekirooto
10 Yakobho hanú yaarwa Bheeri-Sheebha,
akabhata mumugi gwa Haraani,
erya Padani-Aramu.
11 Hanú yaahika ahasi nyabhurebhe,
akaraara hayo,
kwa okubha eryubha ryaringa risikiiri.
Akagega erigina rimwi rya ahasi harya,
akariisagura,
akaraara.
12 Hanú yaaringa areeri,
akaroota ekirooto.
Mukirooto kiyo,
akarora engaji imiririibhwe eguru ya erirobha,
orusonga rwaye ruhikiri murwire.
Na bhamaraika bha Waryubha bhaaringa bharariina na okwituuma kungaji iyo,
13 na OMUKURU omwene akeemirira kungaji iyo,
a akamukeerya ega,
“Oni nooni OMUKURU,
Waryubha wa jaaji weenyu Abhurahamu na Waryubha wa Esaaka.
Ekyaro kinú oreeri-mo,
ndikuhaana uuwe hamwi na orwibhuro rwaho.
14 Orwibhuro rwaho ruryaruha bhukongʼu,
ruribha kya oruteeri,
na bharinyaragana mbaara gyonsego,
bhuturira-ryubha na bhusikirira-ryubha,
goosi na taragweta.
Na kwa okuhitira kuuwe na orwibhuro rwaho,
abhantu bha amakabhira gonsego ga mukyaro bharanonkwa!
15 Oni ndingi hamwi na uuwe,
ndikwangarira hohonse hanú origya,
na okukuhunjukya mukyaro kinu.
Ntarikutiga,
maheene ndikukorera gonsego ganú naakuraga.”
16 Kimwi,
Yakobho akabhuuka okurwa mugintiro,
akagamba ega,
“Maheene OMUKURU aringi ahasi hanu,
kora oni ntaari mmanyiri!”
17 Kwa ego,
akoobhoha na okugamba ega,
“Ahasi hanu haroobhohya bhukongʼu!
Ndamanya,
hanu nho enyumba ya Waryubha,
na nho ekiita kya murwire.”
18 Nyenkyo juri,
Yakobho akeemuka,
akagega erigina rinú yaaringa yeesagwiri,
akariimirirya bhwima kya entimu,
akariimya kwa okurihumirira amaguta.
19 Ahasi hayo,
akahatoga ega,
Bheteri.
b Nawe akare hayo,
omugi gwa eyo gwabhirikirwanga ega,
Ruju.
20 Kimwi,
Yakobho akarya emuuma ega,
“Nyoore,
ee Waryubha,
oribha hamwi na oni na okunyangararira kurugendo rwani,
oraangʼane ebhyakurya na emyenda,
21 na nhunjuke iika owa taata bhwaheene,
hayo nho uuwe OMUKURU oribha Waryubha waani.
22 Na erigina rinú nimiriirye hanu kya entimu,
riroorokyenga ega,
hayo nho enyumba yaaho.
Na kukira kinú oringʼaana,
maheene ndikuruusirya ejaaka.”