Yakobho aramungʼena esewaabho amunonke
27
Esaaka hanú yaagota na ameeso gaaye okuhoka,
akabhirikira omwana waaye omutangi,
Esau,
akamukeerya ega,
“Omwana waani!”
Wonse akagamba ega,
“Taata,
ndingi hanu.”
2 Esaaka akagamba ega,
“Bhoono itegeerera,
oni naagoteri bhukongʼu,
kora orusiku rwa okukwa kwani,
ntarumanyiri.
3 Bhoono,
ndakusabha ogege ebhigwato bhyaho,
esyeki na obhuta,
ogende mwisisi,
umbwimire entyenyi.
4 Omare unkorere ebhyakurya ebhijomu,
kya ego oranyoora nhanjiri,
undeetere ndye,
naho nkunonke ntaraakwa.”
5 Eribhaga rinú Esaaka yaahairanga na omwana waaye Esau,
omukari waaye Rebheka,
yaaringa areetegeerera.
Mbe,
hanú Esau yeemuka okugya mwisisi okubhwima entyenyi areete,
6 Rebheka akakeerya omwana waaye Yakobho ega,
“Nigwiri eseweenyu arakeerya Esau ega,
7 ‘Genda umbwimire entyenyi,
unseemerye ebhyakurya ebhijomu,
kya ego oranyoora nhanjiri,
undeetere ndye,
naho nkunonke embere ya OMUKURU,
ntaraakwa.’
8 Mbe bhoono,
omwana waani,
nyitegeerera!
Na kira kinú ndaakukeerye, okore.
9 Genda mwihijo rya egimburi,
undeetere ebhigorohe ebhibhiri bhya egimburi ebhijomu,
naho nseemerye eseweenyu ebhyakurya kya ego oranyoora ahanjiri.
10 Omare omuhirire arye,
naho akunonke atarakwa.”
11 Yakobho akakeerya ngʼina waabho ega,
“Nawe,
omumura weetu Esau,
yaana amabhuri omubhiri omugima,
oni niina omubhiri omunyoohu!
12 Hamwi taata yaakambabhaate,
arore ega,
ndamungʼena.
Nakabhe nireeteeri ameehiimo,
etaringi enonkwe!”
13 Ngʼina waabho akamukeerya ega,
“Omwana waani,
ameehiimo gaaho gangwate oni.
Uuwe kora kya ego nkukeererye,
genda undeetere egimburi.”
14 Nho,
Yakobho akagya akagega egimburi,
akareetera ngʼina waabho bhakagooga.
Ngʼina waabho akaseemya ebhyakurya ebhijomu,
kya ego esewaabho yaaringa ahanjiri.
15 Nho,
Rebheka akasoha munyumba,
akagega emyenda emijomu gya omumura waaye omutangi Esau.
Kimwi,
akeebhohya omwana waaye omuke Yakobho.
16 Akamara akamwibhohya eriseero rya egimburi kumabhoko na ahasi ahanyoohu mwigoti ryaye.
17 Kimwi akahaana omwana waaye Yakobho ebhyakurya ebhijomu bhiyo,
na omukaate gunú yaaringa akoreri.
18 Mbe,
Yakobho akahirira esewaabho,
akamukeerya ega,
“Taata!”
Wonse akeetabha ega,
“Omwana waani,
ndingi hanu.
Omwana waani,
uuwe ngʼ-uuha?”
19 Yakobho akakeerya esewaabho ega,
“Nooni Esau,
omwana waaho omutangi.
Nkoreri kya ego unkeererye.
Ndasabha wimuke wikare orye entyenyi yaani,
naho unnonke!”
20 Nawe,
Esaaka akamubhuurya ega,
“Ebheeri egaki onyooreri entyenyi bhwangu ego,
omwana waani?”
Yakobho akagamba ega,
“OMUKURU,
Waryubha waaho,
yambeereri.”
21 Kimwi,
Esaaka akamukeerya ega,
“Omwana waani,
suntara hanu nkubhabhaate,
naho nkumanye,
nyoore maheene nuuwe omwana waani Esau,
kasi-ha.”
22 Yakobho akamusuntarira esewaabho,
wonse akamubhabhaata,
akamara akagamba ega,
“Eriisi ni-rya Yakobho,
nawe amabhoko n-ga Esau.”
23 Ataamumanya,
kwa okubha amabhoko gaaye gaaringa gaana amabhuri kya aga omumura waabho Esau,
kwa ego akeeseemya okumunonka.
24 Nawe akamubhuurya kweki ega,
“Maheene uuwe nuuwe omwana waani Esau?”
Wonse akeekirirya ega,
“Nooni!”
25 Kimwi,
esewaabho akamukeerya ega,
“Nsuntarirya ebhyakurya haangʼi,
ebhyakurya bhya obhubhwimi bhwa omwana waani,
naho nkunonke.”
Mbe,
Yakobho akamusuntarirya ebhyakurya akarya,
akamara akamureetera na edivai akanywa.
26 Nho,
esewaabho akamukeerya ega,
“Suntara haangʼi omwana waani,
unhumbate.”
27 Mbe,
Yakobho akamusuntarira,
akamuhumbata.
Esewaabho hanú yeegwa obhunyunku bhwa emyenda gya omwana waaye,
akamunonka aragamba ega,
“Igwa,
obhunyunku bhwa omwana waani n-kya obhunyunku bhwa omugunda gunú OMUKURU yaanonka!
28 Waryubha akwitirire ekime kya murwire na akuhaane ekyaro kinú kiina erirobha erijomu.
Abhenga arakuhaana omugeso na edivai enhya enjaru.
29 Abhantu bha ebhyaro ebhindi bhabhenga bharakukorera emirimu,
na bhabhenga bharakwihiinyira kwa obhusuuku.
Obhe omutungi wa abhahiiri bhaaho,
na abhaana bha ngʼina weenyu bhabhenga bharakwigamira.
Bheehiimwe,
bhanú bharaakwihiimenga,
na bhanú bharaakunonkenga,
bhanonkwe.”
Esau arasabha enonkwe
30 Hanú Esaaka yaamara okunonka Yakobho,
Yakobho akarwa-ho.
Niigo yaarwa-ho ego,
Esau akahika okurwa okubhwima.
31 Wonse akakora ebhyakurya ebhijomu,
akahirira esewaabho,
akagamba ega,
“Mbe,
taata!
Imuka orye ebhyakurya bhyani,
omwana waaho,
naho unnonke!”
32 Esewaabho akamubhuurya ega,
“Nuuwe owi?”
Wonse akakyukya ega,
“Nooni Esau,
omwana waaho omutangi.”
33 Rumwigo,
Esaaka akarigita bhukongʼu.
Akagamba ega,
“Bhoono niwi unú abhwimiri yaandeetera enyama ya entyenyi?
Oni mmariri okurya uuwe otaraaja.
Mmunonkeri,
na maheene arinonkwa.”
34 Hanú Esau yeegwa amangʼana ga esewaabho,
akakuura ekiriro kwa obhururu bhukongʼu.
Kimwi akakeerya esewaabho ega,
“Ee taata,
ndasabha unnonke na oni!”
35 Nawe,
Esaaka akamukeerya ega,
“Omuke waaho yaajiri yaangʼeenereerye,
kwa ego,
agegeri enonkwe yaaho.”
36 Esau akagamba ega,
“Nkyo kirakora arabhirikirwa Yakobho!
Agegeri omweya gwani mara kabhiri.
Yaagega engabho yaani ya obhwibhurwa bhwa omutangi,
na bhoono agegeri enonkwe yaani!”
Kimwi,
akabhuurya esewaabho ega,
“Bhoono oni otantigiiri-ko enonkwe yoyonse?”
37 Esewaabho akamukyukya ega,
“Mmariri okumukora okubha omutungi waaho.
Na abhahiiri bhaaye bhonsego,
mbakoreri okubha abhakori bha emirimu bhaaye.
Mmuheeri obhuro na edivai.
Bhoono omwana waani,
uuwe nkukorere-ki?”
38 Esau akabhuurya esewaabho ega,
“Taata,
nko okugamba uuna enonkwe eimwi iyo eyenego?
Ee taata,
nnonka na oni!”
Kimwi akakuura kwa eriisi erinene.
39 Nho esewaabho,
akamukeerya ega,
“Obhumenyi bhwaho bhuribha mukyaro kinú kiina erirobha erijomu
na ahasi hanú haana ekime kya murwire.
40 Orimenya kwa eriihe,
na oribha oramukorera emirimu omuke waaho.
Nawe,
hanú orijeema,
nho oriitajura,
okurwa mubhutungi bhwaye.”
Yakobho aramungʼosa Esau
41 Mbe,
Esau akakorera Yakobho ekisorooro,
kwa ekisigo kya enonkwe inú yaahaanwa na esewaabho.
Esau akeeganirirya ega,
“Taata aringi haangʼi okukwa.
Eginsiku gya okufumba oruku hanú girihwa,
nho ndimwita Yakobho.”
42 Nawe,
Rebheka akakeeribhwa ameetegeerero ga Esau,
omwana waaye omutangi,
akatuma omuntu okubhirikira Yakobho,
omwana waaye omuke.
Akamukeerya ega,
“Omwana waani,
wiyangararire!
Omumura weenyu Esau,
areeteremya omutima gwaye,
kwa okwenda okukwita.
43 Bhoono omwana waani,
unyitegeerere.
Ngʼosera bhwangu kumumura weetu Rabhani,
mumugi gwa Haraani.
44 Wikare owaaye eginsiku nkego,
enkoro ya omumura weenyu esimbiire.
45 Hanú enkoro yaaye erisimbiira,
arabhirwe ganú waamukorera,
ndituma omuntu akoohye.
Kwaki nkwirwe na bheenyu bhonsego orusiku rumwi?”
46 Kimwi,
Rebheka akakeerya Esaaka ega,
“Ntaana obhujomerwa mumutima gwani,
kurusumo rwa abhakari bha Esau Abhahiti bhanu.
Nyoore Yakobho wonse ariteta omukari gati ya abhakari bha ekyaro kinu,
abhakari Abhahiti kya bhanu,
ntaribha na obhwera okugendererya okubha omuhoru.”