Obhwambiro 26

Waryubha araraga okunonka Esaaka

Eribhaga erindi, enjara enduru ekasoha mukyaro muyo, okukira irya yeebhuka eribhaga rya Abhurahamu. Esaaka akangʼanyira mumugi gwa Gerari, ku Abhimereki, omukama wa Abhafirisiti.

2 Mbe, eribhaga yaaringa atareemuka okugya eyo, OMUKURU akamwibhukira Esaaka, akamukeerya ega, “Otagya Misiri, nawe wikare mukyaro kinú nakakukeerye. 3 Omenye mukyaro muyo kya omugeni, na oni ndibha hamwi na uuwe, na ndikunonka. Emuuma inú naariira eseweenyu Abhurahamu, ndiimara kwa okukuhaana uuwe na orwibhuro rwaho, ebhyaro bhinu bhyonsego. 4 Ndyaruhya orwibhuro rwaho, kya eginjota murwire, na ndibhahaana ebhyaro bhinu bhyonsego. Na okuhitira orwibhuro rwaho, amakabhira gonsego ga mukyaro garinonkwa. 5 Ndikunonka, kwa okubha Abhurahamu yaaringa aranyigwa, na okwikirirya amaragiriryo gaani, emigiro gyani, okubhutura ekiina kwani, na kira rinú naamuranga.” 6 Kwa ego, Esaaka akamenya Gerari eyo.

7 Orusiku rumwi abhantu bha hayo, bhakamubhuurya eguru ya omukari waaye. Akabhakyukya ega, “Unu m-musubhati waani.” Yoobhoha okugamba ega m-mukari waaye, naho abhamenyi bha mumugi guyo bhataaja okumwita kurusumo rwa Rebheka, kwa okubha yaaringa omujomu bhukongʼu.

8 Esaaka akeekara eyo, eginsiku eginjaru. Orusiku rumwi, Abhimereki, omukama wa Abhafirisiti, akasoomererya mukisyeri, akarora Esaaka arahooya na omukari waaye Rebheka. 9 Kimwi, Abhimereki akabhirikira Esaaka, akamubhuurya ega, “Kumbe, uyo m-mukaaho! Ndeegwa waagamba ega, m-musubhati waaho?” Esaaka akamukyukya ega, “Naagamba ego, kwa okubha neeganiriryanga ega, nkeetirwe kurusumo rwaye.”

10 Kimwi Abhimereki akamubhuurya ega, “Ni-ngʼana-ki inu otukoreeri? Nyoore omuntu umwi gati yeetu akaareeri na mukaaho bira okumanya, okaatusoherye mubhusarya!” 11 Nho, Abhimereki akakaanʼya abhantu bhaaye bhonsego ega, “Wowonse unú arikunʼya omuntu unu kasi omukari waaye, m-buheene, ariitwa!”

12 Omwaka guyo, Esaaka yaahamba ebhyakurya mukyaro kiyo, akagesa bhukongʼu, kwa okubha OMUKURU yaamunonka. 13 Esaaka akaniibha, ebhintu bhyaye bhikaaruha okuhikira akabha omuniibhi bhukongʼu. 14 Yaaringa na amangʼondi na egingʼombe, na abhagaya abhaaru, okuhikira Abhafirisiti bhakamumaahira orwango. 15 Mbe, Abhafirisiti bhakakundikirya ebhisima bhyonsego bhinú bhyaringa bhisimbirwe na abhagaya bha Abhurahamu, esewaabho Esaaka. 16 Kimwi, Abhimereki akamukeerya Esaaka ega, “Orwe mukyaro kyetu, kwa okubha uuwe wabheeri na eginguru njaaru okutukira.” 17 Mbe, Esaaka akarwa hayo, akagya akeemirirya amabhuru gaaye mwiteka rya Gerari, akamenya eyo. 18 Nho akasimbura ebhisima bhirya bhyasimbwa kwibhaga rya esewaabho. Hanú Abhurahamu yaakwa, Abhafirisiti bhaaringa bhakundikiirye. Hanú Esaaka yaamara okubhisimbura, akabhitoga amariina garyagarya esewaabho yaaringa abhitogeri.

19 Orusiku rumwi, abhagaya bha Esaaka bhakasimba mwiteka riyo, bhakanyoora ekisekaani. 20 Abhariisya bha Gerari, bhakatongʼana na abhariisya bha Esaaka ega, “Amanji ganu n-geetu!” Nho, Esaaka akatoga ekisima kiyo ega Eseki, kwa okubha abhariisya bha Gerari bhaatongʼana na abhariisya bhaaye. 21 Kimwi, abhariisya bha Esaaka bhakasimba ekisima ekindi, kiyo kyonse bhakakitongʼanira. Kiyo, akatoga Sitina. 22 Nho, Esaaka akangʼaanya eyo, akagya akasimba ekisima ekindi. Kiyo, bhaatakitongʼanira. Kwa ego, akakitoga Rehobhoti, akagamba ega, “Bhoono, OMUKURU atuheeri omweya gwa okwisa turaanyeregete mukyaro.” 23 Kimwi akarwa eyo, akagya Bheeri-Sheebha. 24 Obhutiku bhuyobhuyo, OMUKURU akamwibhukira, akamukeerya ega, “Oni nooni Waryubha wa eseweenyu Abhurahamu, otoobhoha, kwa okubha ndingi hamwi na uuwe, ndakunonka na okwaruhya orwibhuro rwaho, kurusumo rwa eriragano ryani rinú naaragana na Abhurahamu omugaya waani.” 25 Kwa ego, Esaaka akahagaaja ahasi ha okumwensera, akamusyengera OMUKURU. Akahagaaja eyo eribhuru ryaye, na abhagaya bhaaye, bhakabha bharasimba ekisima ekindi.

26 Orusiku rumwi, Abhimereki akarwa Gerari na omusaani waaye wa haangʼi Ahujati, na Fikori, omukuru wa abhasirikare bhaaye, bhakaseeta Esaaka. 27 Esaaka akabhabhuurya ega, “Muujiri owaani hanu okoohya-ki, enu mwankorera ekisorooro kimwi mukankenyia oweenyu?” 28 Bhakamukyukya ega, “Twaruuji obhuheene ega, OMUKURU aringi hamwi na uuwe. Kwa ego, m-bujomu turiirane emuuma ya omurembe, na tukore eriragano ega, 29 otaritukorera amabhiibhi, kya ego bheetu tutaakukuunʼya. Twakukoreranga amajomu ageene, tukakutiga ogye gyaho kwa omurembe. Na bhoono uuwe, oringi omunonkwa na OMUKURU.” 30 Mbe, Esaaka akabhakorera obhugeni, bhakarya na okunywa. 31 Ejo wendeko nyenkyo, bhakariirana emuuma. Kimwi, Esaaka akabhaheregesya, bhakagya gyabho kwa omurembe. 32 Orusiku ruyoruyo, abhagaya bha Esaaka, bhakaaja okumuhaana amangʼana eguru ya ekisima kirya bhaaringa bharasimba, ega, “Tunyooreri amanji!” 33 Ekisima kiyo, Esaaka akakitoga ega, Sheebha. Kwa ego, okuhikira reero omugi guyo, gurabhirikirwa Bheeri-Sheebha.

Esau na abhakari bhaaye Abhahiti

34 Esau hanú yaahikya emyaka mirongo ena, akateta abhakari abhabhiri bha Abhahiti, Yudisi omuhara wa Bheeri, na Bhasemati omuhara wa Eroni. 35 Abhakari bhayo, bhakakora obhwikari bhwa Esaaka na Rebheka bhubhe bhwa obhururu bhukongʼu.