Abheebhurwa abhandi bha Abhurahamu
25
Abhurahamu akateta omukari oundi,
eriina ryaye yaabhirikirwanga Ketura.
2 Ketura wonse akamwibhurira abhaana,
amariina gaabho n-ganu: Jimurani,
Yokishani,
Medani,
Midiani,
Ishibhaki na Shua.
3 Yokishani wonse yeebhura Sheebha na Dedani.
Dedani yaaringa jaaji wa Abhaashuru,
Abharetushi na Abhareumi.
4 Midiani wonse yeebhura Efa,
Eferi,
Enoki,
Abhida na Eridaha.
Bhayo bhonsego,
bhaaringa orwibhuro rwa Ketura.
5 Abhurahamu akamugabhya Esaaka ebhintu bhyaye bhyonsego.
6 Nawe,
hanú yaaringa akyari omuhoru,
akahaana abhaana bha abhameega bhaaye emituho.
Akabhatuma hare mukyaro ekindi,
a mbaara gya bhuturira-ryubha,
akabhaahura kumwana waaye Esaaka.
Oruku rwa Abhurahamu
7 Abhurahamu yeekara emyaka egana rimwi na mirongo muhungati na etaanu.
8 Hanú yaaringa akyari omuhoru,
yaaringa yeekeeri eribhaga eritambi na erijomu bhukongʼu na rya enonkwe.
Hanú yaakwa,
akahimbana na bhajaaji waabho.
9 Abhaana bhaaye,
Esaaka na Ishimaeri,
bhakamubhiika mwisana rya Makipera,
haangʼi na Mamure,
mumugunda gwa Efuroni,
omwana wa Sohari wa erikabhira rya Abhahiti.
10 Omugunda guyo,
Abhurahamu yaaringa aguguriri ku Bhahiti.
Hayo nho,
Abhurahamu yaabhiikwa akabha hamwi na omukari waaye Saara.
11 Abhurahamu hanú yaaringa amariri okukwa,
Waryubha akanonka Esaaka.
Esaaka akeekara haangʼi na ekisekaani kya Bheeri-Rahai-Roi.
Orwibhuro rwa Ishimaeri
12 Runu ndo orwibhuro rwa Ishimaeri,
omwana wa Abhurahamu na Omumisiri Hajiri,
omugaya wa Saara.
13 Ganu ngo amariina ga abhaana bha Ishimaeri,
okuringʼaana na kya ego bheebhurwa,
omutangi n-Nebhayoti,
akooserwa na Kedari,
Adibheeri,
Mibhusamu,
14 Mishima,
Duma,
Masa,
15 Hadadi,
Tema,
Yeturi,
Nafishi na omukokoti n-Kedema.
16 Bhayo mbo,
abhaana bha Ishimaeri ekumi na bhabhiri.
Kira oumwi waabho,
yaaringa omutungi wa ehamati yaaye.
b Emigi gyabho eminene na emike,
gyaringa girabhirikirwa kwa amariina gaabho.
17 Eribhaga rinú Ishimaeri yaakwa,
yaaringa na emyaka egana rimwi na mirongo esatu na muhungati.
Wonse yaahimbana na bhajaaji waabho.
18 Orwibhuro rwa Ishimaeri,
bhaaringa bhamenyeri okwambira mukyaro kya Habhira okuhikira Shuri.
Ahasi hayo,
haaringa bhuturira-ryubha bhwa Misiri,
okubhata Ashuru.
Bhaaringa na ekisorooro na orwibhuro orundi rwa abhaana bha Abhurahamu.
Erigano eguru ya Esaaka na abheebhurwa bhaaye
19 Runu ndo orwibhuro rwa Esaaka,
omwana wa Abhurahamu.
20 Esaaka hanú yaaringa na emyaka mirongo ena,
akateta Rebheka,
omuhara wa Rabhani,
omuhara wa Bhetweri Omwaramu okurwa mukyaro kya Padani-Aramu.
21 Rebheka yaaringa omugumba,
kwa ego Esaaka akamusabha OMUKURU kurusumo rwa omukari waaye.
OMUKURU wonse akeekirirya amasabho gaaye,
kimwi Rebheka akagega enda.
22 Enda iyo,
yaaringa ya ebhisare.
Abhaana bhakataamanʼya munda.
Nho,
Rebheka akagamba ega,
“Nyoore niigo,
okubha omuhoru kuuna obhwera-ki?”
Mbe,
akagya okubhuurya OMUKURU.
23 OMUKURU akamukyukya ega,
“Munda yaaho,
garimo amakabhira gabhiri.
Amakabhira gayo,
garaaja okwahukana.
Erikabhira erimwi,
riribha na obhuturo bhukongʼu okukira erindi,
na omukuru aribhanga aramukorera emirimu omuke.”
24 Eribhaga hanú ryahika rya okwibhura,
Rebheka akeebhura ebhisare!
25 Omwana wa okwamba,
yaaringa omukangaaru,
omubhiri gwaye gonsego,
gwaringa gwijwiri amabhuri.
Nkyo ekisigo kya okumutoga eriina Esau.
26 Hanú omwana wa kabhiri yeebhurwa,
akaaja agwatiriri Esau kukisugururo.
Nkyo ekisigo kya okumutoga eriina Yakobho.
c Esau na Yakobho hanú bheebhurwa,
esewaabho Esaaka yaaringa na emyaka mirongo esansabha.
Esau aragurya omweya gwaye gwa engabho ya omutangi
27 Abhaana bhayo,
bhakakiina.
Esau yaaringa na ekituunyo kya okubhwima,
yaaringa anariri okugya mwisisi.
Nawe Yakobho weeki,
yaaringa omunyoohu,
na yaaringa anariri emirimu gya iika.
28 Esaaka yaaringa ahanjiri bhukongʼu okurya enyama ya entyenyi ya mwisisi,
nkyo kyakora yaaringa ahanjiri Esau.
Nawe Rebheka weeki yaaringa ahanjiri Yakobho.
29 Orusiku rumwi,
Yakobho hanú yaaringa arateeka egindengu,
Esau akarwa okubhwima,
yaaringa areegwa omweko bhukongʼu.
30 Akakeerya Yakobho ega,
“Yakobho!
Ndakusabha ungʼaane-ko ebhyakurya ebhikangaaru bhiyo ndye,
kwa okubha ndahyutuka.”
Nkyo kyakora bhakamutoga Edomu,
ensonga yaaye niiga,
omukangaaru.
31 Yakobho akamukyukya ega,
“Ngurirya mbere,
engabho yaaho ya okwibhurwa omutangi.”
32 Wonse akagamba ega,
“M-bwaheene!
Ndeegwa ndingi haangʼi okukwa na omweko!
Engabho ya okwibhurwa omutangi eransakira-ki kweki?”
33 Yakobho akagamba ega,
“Undiire emuuma bhoono.”
Esau akamuriira emuuma,
akamugurirya engabho yaaye ya okwibhurwa kwa omutangi.
34 Nho,
Yakobho akahaana Esau omukaate na egindengu.
Esau,
akarya na okunywa,
nho akamara akagya.
Kwa ego Esau akajeera engabho yaaye ya okwibhurwa omutangi.