Esaaka arateta Rebheka
24
Mbe,
Abhurahamu hanú yaaringa agoteri bhukongʼu,
OMUKURU yaaringa amariri okumunonka kubhintu bhyonsego.
2 Orusiku rumwi,
Abhurahamu akakeerya omugaya waaye omukuru unú yaaringa omwimiririri wa ebhintu bhyaye bhyonsego ega,
“Uuwe undiire emuuma kwa okutuura okubhoko kwaho insi wa ekiimo kyani.
3 Oni ndakuriisya emuuma kuriina rya OMUKURU,
Waryubha wa orwire na ekyaro ega,
otariija okutetya omwana waani Esaaka,
omukari wowonse okurwa kubhahara bha mukyaro kya Kanaani kinú mmenyeri-mo.
4 Nawe,
oriija okugya mukyaro kyani kya obhusimuka na kubhahiiri bhaani,
otunire-mo omwana waani Esaaka omukari.”
5 Omugaya uyo,
akamubhuurya ega,
“Hanú omukari uyo,
aryanga okuuja mukyaro munu,
eribha egaki?
Na nyoore eraabhe ego,
nhire omwana waaho mukyaro kinú waarwira?”
6 Abhurahamu akamukeerya ega,
“Otasakya okuhindya omwana waani eyo!
7 OMUKURU,
Waryubha wa orwire,
yaanduusya okurwa iika oweetu kutaata,
okurwa mukyaro kinú neebhurirwa-mo,
akagamba na oni,
akandiira emuuma ega,
‘Ndihaana abhantu bha orwibhuro rwaho ekyaro kinu.’
Weeki arikutumira maraika waaye akoorokererye,
na uuwe orimureetera omwana waani omukari okurwa eyo.
8 Nyoore omukari uyo,
aryanga okuuja hamwi na uuwe,
mbe emuuma inu etarikugwata.
Nawe otariija okuhira omwana waani eyo.”
9 Mbe,
omugaya uyo,
akatuura okubhoko kwaye,
insi wa ekiimo kya omukuru waaye,
Abhurahamu.
Akarya emuuma kurusumo rwa eringʼana riyo.
10 Kimwi,
akagega egingamia ekumi gya omukuru waaye,
akeemuka na emituho emijomu,
gya amanga amaaru.
Akakora orugendo okugya mumugi gunú Nahoori yeekaranga,
mukyaro kya Mesopotamia.
11 Hanú yaahika haangʼi na omugi guyo,
yaaringa mugoroobha,
eribhaga rinú abhakari bhaaringa bharagya okutaha amanji.
Akeemirirya egingamia gyaye embarika wa ekisima kinú kyaringa kibhara wa omugi.
12 Nho,
akasabha ega,
“Ee OMUKURU,
Waryubha wa omukuru waani Abhurahamu!
Ndakusabha umbeere,
amangʼana gaani gabhe bhwaheene reero,
osereenʼye omukuru waani Abhurahamu.
13 Maaha!
Bhoono nimiriiri haangʼi na ekisima kinu,
na abhahara bha omugi gunu bharaaja okutaha amanji.
14 Mbe,
ebhe ega,
hanú ndaakeerye omuhara oumwi gati yaabho ega,
‘Ndasabha otuure ensengo yaaho,
nnywe amanji,’
yankyukya ega,
‘Nunywe,
na egingamia gyaho gyonse,
ndagitahira!’
Uyo ngʼo abhe unú osoreeri omugaya waaho Esaaka.
Na kwa eringʼana riyo,
nakamanye ega,
osereenerye omukuru waani.”
15 Hanú yaaringa akyamusabha Waryubha,
haryaharya akeebhuka omuhara oumwi,
eriina ryaye Rebheka,
omuhara wa Bhetweri,
agegeri ensengo yaaye kwiriko.
Bhetweri yaaringa omwana wa Mirika omukari wa Nahoori,
omumura waabho Abhurahamu.
16 Omuhara uyo,
yaaringa omujomu bhukongʼu,
na yaaringa atarataara na omusaaja.
Mbe,
akahiringita mukisekaani okutaha amanji,
akeejurya ensengo yaaye,
akamara akariina.
17 Nho,
omugaya urya,
akakenya bhwangu okumuturuungʼana.
Hanú yaamuhikiira,
akamukeerya ega,
“Ndasabha ungʼaane-ko amanji amakego ga munsengo yaaho nnywe!”
18 Wonse akamukyukya ega,
“N-ganu onywe,
omukuru waani.”
Akatuura ensengo yaaye bhwangu,
akaigwatirira okumunywensya.
19 Hanú yaamara okumuhaana amanji,
akamukeerya ega,
“Ndatahira egingamia gyaho gyonse amanji,
gyonsego ginywe okuhikira giiswe.”
20 Akakora bhwangu akahumira egingamia amanji mwitubha,
akamara akakenya okugya mukisima okutaha amanji agandi,
ga okunywensya egingamia gyaye.
21 Mbe,
omugaya uyo,
akabha aramumaahirira bira okugamba kyokyonse,
naho amanye nyoore OMUKURU Waryubha ajomerye orugendo rwaye kasi-ha.
22 Egingamia girya hanú gyamara okunywa amanji,
akagega epete ya kumongo ya egijahaabhu,
akahaana omuhara uyo.
Akamuhaana na ebhikooja bhibhiri bhya egijahaabhu.
Ebhintu bhiyo bhyonsego bhyaringa na obhurito obhunene.
23 Akamubhuurya ega,
“Uuwe m-muhara wawi?
Omweya gwa okuraara bheetu guratuuka iika oweenyu?”
24 Omuhara uyo,
akamukyukya ega,
“Oni m-muhara wa Bhetweri,
omwana wa Mirika,
omukari wa Nahoori.”
25 Kweki akamukeerya ega,
“Oweetu,
haana obhunyanki,
ahasi ha okwisa okuriisirya na omweya gwa okuraara abhageni guriho.”
26 Omugaya uyo,
akatema ebhiru akahiinya obhusu bhukahika hansi,
okumugungya OMUKURU,
27 aragamba ega,
“Agungibhwe OMUKURU,
Waryubha wa omukuru waani Abhurahamu,
kwa okubha yoorokerye okumukorera Abhurahamu amajomu na obhuheene bhwaye.
OMUKURU Waryubha yankangatiiri oni omwene okuhikira kubhahiiri bha omukuru waani!”
28 Omuhara uyo,
akakenya okugya okukeerya abhantu bha iika owaabho,
eguru ya eringʼana riyo.
29-30 Rebheka yaaringa na omumura waabho,
unú yaabhirikirwanga Rabhani.
Rabhani uyo,
hanú yaarora epete inú eringi kumongo na ebhikomo kumabhoko ga omuhara waabho,
na okwigwa amangʼana ganú Rebheka akeeriibhwe na omugaya urya,
akakenya okugya okusikana nawe mukisima erya.
Akamunyoora yeemiriiri haangʼi na egingamia gyaye embarika wa ekisima.
31 Akamukeerya ega,
“Geniha oweetu,
omunonkwa na OMUKURU.
Ndeegwa oreemirira kibhara hayo?
Mmariri okukuseemerya enyumba na omweya gwa egingamia guriho.”
32 Nho,
omugaya uyo,
akagya okusoha munyumba.
Emijigo gikeetuumibhwa okurwa kugingamia,
gyonse gikahaanwa obhunyanki na ebhyakurya.
Omugaya uyo na abhantu bhaaye,
bhakahaanwa amanji ga okoogya amaguru.
33 Nho,
abheene omugi bhakamureetera ebhyakurya,
nawe akagamba ega,
“Ntakurya ekintu okuhikira mbakeerye kinú ndeenda okugamba.”
Rabhani akamukeerya ega,
“Mbe bhoono,
gamba!”
34 Akagamba ega,
“Oni m-mugaya wa Abhurahamu.
35 OMUKURU Waryubha amunonkeri omukuru waani,
abheeri omuniibhi bhukongʼu.
Amuheeri emiganda eminene gya amangʼondi,
egimburi na egingʼombe.
Amuheeri egingamia na egintikiri,
ebhigera bhya egimbirya na egijahaabhu,
hamwi na abhagaya bha ekisaaja na abha ekihara.
36 Saara omukari wa omukuru waani,
yaamwibhurira omwana wa ekisaaja mubhukungu bhwaye,
ngʼo Abhurahamu akamuhaana ebhintu bhyaye bhyonsego.
37 Nho,
omukuru waani Abhurahamu akandiisya emuuma akagamba ega,
‘Otariija okutetya omwana waani Esaaka,
omukari wowonse okurwa kubhahara bha mukyaro kya Kanaani kinu mmenyeri-mo.
38 Nawe,
oriija okugya okuhikira mumugi gwa abhahiiri bhaani,
omutunire omwana waani Esaaka omukari.’
39 Nkamubhuurya ega,
‘Bhoono,
hanú omuhara uyo aryanga okuuja mukyaro munu,
eraabhe egaki?’
40 Nawe,
akankyukya ega,
‘OMUKURU,
unú ndeegwa koko,
ngʼo arituma maraika waaye agye hamwi na uuwe.
Arikujomerya orugendo rwaho,
ogegere omwana waani omukari,
okurwa kubhahiiri bhaani,
mukiseku kya taata.
41 Na nyoore orihika kubhahiiri bhaani,
bhaange okukuhaana omuhara uyo,
emuuma inu etarikugwata.’”
42 Omugaya uyo,
akagendererya okugamba ega,
“Reero,
hanú nhikiri mukisima,
naasabha ega,
‘Ee OMUKURU,
Waryubha wa omukuru waani Abhurahamu!
Ndakusabha umbeere,
orugendo rwani rwa reero rujome.
43 Maaha!
Bhoono nimiriiri haangʼi na ekisima kinu.
Mbe,
ebhe ega,
omuhara unú araaje okutaha amanji,
mmusabhe yangʼaane amanji okurwa munsengo yaaye,
nnywe,
44 wonse yankyukya ega,
“Nunywe,
na egingamia gyaho gyonse,
ndagitahira!”
Uyo ngʼo abhe omukari unú uuwe OMUKURU osoreeri omwana wa omukuru waani.’
45 “Eribhaga naari nkyari okumara okumusabha mumutima gwani,
rumwigo,
Rebheka yaahika agegeri ensengo yaaye kwiriko.
Arahiringita mukisima,
na okutaha amanji.
Nkamukeerya ega,
‘Ndasabha-ko amanji nnywe!’
46 Rumwigo,
akatuura ensengo yaaye,
yaankeerya ega,
‘Ambe nunywe na egingamia gyaho ndagitahira.’
Nho naanywa,
na yaatahira na egingamia gyani.
47 “Kimwi,
naamubhuurya ega,
‘Uuwe m-muhara wawi?’
Yankyukya ega,
‘Oni m-muhara wa Bhetweri,
omwana wa Nahoori omukari wa Mirika.’
Nho,
naamuturira epete kumongo,
na okumwibhohya ebhikomo kumabhoko.
48 Naatema ebhiru naahiinya obhusu bhukahika hansi,
okumugungya OMUKURU,
Waryubha wa omukuru waani Abhurahamu,
kwa okubha yaankangatiri kunjira yaani na okunyorokya omwijukuru wa omuhiiri wa omukuru waani,
okubha omukari wa omwana waaye.
49 “Mbe bhoono,
munkeerye,
nyoore mureenda okukorera omukuru waani amajomu na obhuheene.
Nyoore mutakwenda munkeerye,
oni nimanya ekya okukora.”
50 Rabhani na Bhetweri bhakakyukya ega,
“Turarora ega,
eringʼana rinu,
rirareka ku MUKURU Waryubha omwene,
bheetu tutakutura okukora kyokyonse kweki.
51 Rebheka ngʼ-unu hanu,
omugege mugende,
abhe omukari wa omwana wa omukuru waaho,
kya ego OMUKURU Waryubha agambiri.”
52 Omugaya uyo,
hanú yeegwa ego,
akatema ebhiru,
akahiinya obhusu bhukahika hansi,
okumugungya OMUKURU.
53 Kimwi,
akaruusya ebhintu bhinú bhyaturwa kwa ebhigera bhya egimbirya,
na ebhya egijahaabhu,
hamwi na emyenda,
akahaana Rebheka.
Hanú yaamara,
akahaana omumura waabho na ngʼina waabho ebhintu ebhyaru bhya obhuguri.
54 Nho,
weeki hamwi na abhantu bhanú yaaringa nabho bhakarya,
bhakanywa na okuraara hayo.
Hanú bheemuka nyenkyo,
omugaya uyo akagamba ega,
“Ndasabha nhunjuke owa omukuru waani.”
55 Nawe,
omumura waabho Rebheka,
hamwi na ngʼina waabho,
bhakagamba ega,
“Omutige omuhara weetu,
yeekare na bheetu eribhaga rya muna eginsiku ekumi,
nho agye.”
56 Nawe,
weeki akagamba ega,
“OMUKURU Waryubha amariri okujomya orugendo rwani.
Mbe,
mutantigitya kweki!
Mutige nhunjuke owa omukuru waani.”
57 Bhonse bhakagamba ega,
“Ganya,
tubhirikire omuhara tumubhuurye,
twigwe omwene kya ego araagambe.”
58 Bhakabhirikira Rebheka na okumubhuurya ega,
“Rebheka,
oreekirirya okugya na omusaaja unu?”
Weeki akakyukya ega,
“Ndagya!”
59 Nho,
bhakamutiga Rebheka omuhara waabho,
agye na omureri waaye,
omugaya wa Abhurahamu,
na abhantu bha omugaya wa Abhurahamu.
60 Abhahiiri bha Rebheka,
bhakamunonka,
bharagamba ega,
“Ee omuhara weetu!
Waryubha akukore obhe omwibhuri wa ebhiku na ebhiku!
Na orwibhuro rwaho,
bhagabhe emigi gya abhasigu bhaabho.”
61 Rebheka akeemuka na abhagaya bhaaye,
bhakariina egingamia,
bhakamuseeta omugaya uyo.
Ego niigo omugaya wa Abhurahamu yaagega Rebheka,
akagya nawe.
62 Eribhaga riyo,
Esaaka yaaringa ahunjukiri okurwa kukisekaani kya Bheeri-Rahai-Roi,
akabha amenyeri orubhaara rwa Negebhu.
63 Orusiku rumwi kumugoroobha,
akagya mumugunda okwiganirirya.
Hanú yaaringa areeganirirya akatiirura ameeso,
akarora egingamia giraaja owaaye.
64 Rebheka wonse,
akatiirura ameeso gaaye,
akamurora Esaaka.
Hanú yaamurora,
akeeka okurwa kungamia.
65 Akabhuurya omugaya uyo ega,
“Urya aragenda mumugunda,
araaja okututuruungʼana niwi?”
Wonse akamukyukya ega,
“M-mukuru waani Esaaka.”
Mbe,
Rebheka akagega esyera yaaye,
akeekundikirya.
66 Omugaya uyo,
akaamba okutondera Esaaka,
gonsego ganú akoreri.
67 Esaaka hanú yeegwa gayo,
akasohya Rebheka mwibhuru rinú ryaringa erya ngʼina waabho.
Akamukora okubha omukari waaye.
Akamuhanja bhukongʼu,
akahorisibhwa na Rebheka kwa okukwirwa ngʼina waabho.