Abhurahamu aragura ahasi ha okubhiikira omukari waaye
23
Saara yeekara emyaka egana rimwi na mirongo ebhiri na muhungati.
2 Akakwira Kiriati-Aribha (eginsiku ginu,
n-Hebhuroni),
mukyaro kya Kanaani.
Abhurahamu akamukuurira,
na okumufumbira oruku.
3 Nho,
Abhurahamu akatiga omuku kwiseero,
akagya akagambana na Abhahiti abheene ekyaro kiyo,
akagamba ega,
4 “Oni mmenyeri gati yeenyu hanu kya omugeni.
Ndasabha mungurirye ahasi habhe ahaani,
naho mbiike mukaani,
arwe embere yaani.”
5 Abhahiti bhayo,
bhakamukyukya ega,
6 “Ee omukuru weetu,
otwitegeerere!
Uuwe nuuwe omutungi omukuru gati yeetu,
sora ahasi hohonse hanú oreenda okubhiika mukaaho.
Atariho omuntu unú arakwima ahasi ha okubhiika mukaaho.”
7 Kwa ego,
Abhurahamu akeemirira,
akeehiinya kwa omukumo embere ya Abhahiti,
abheene ekyaro kiyo.
8 Akabhakeerya ega,
“Nyoore muranyikirirya mbiike omuku waani,
arwe embere yaani,
ndabhasabha munyigwe,
munyisasaamire ku Efuroni omwana wa Sohari,
9 yangurirye erisana ryaye rinú riringi Makipera,
kurutunga rwa omugunda gwaye.
Mumutongere yangurirye kwa obhuguri bhunú bhureenderwa,
naho habhe ahasi haani ha okubhiikiranga abhaku bhaani.”
10 Eribhaga riyo,
Efuroni yaaringa yeekeeri hamwi na Abhahiti bhanú bhaaringa bheekumeenʼye,
mukiita kya omugi.
Nho akakyukya Abhurahamu embere yaabho bhonsego ega,
11 “Tiigo-ha omukuru waani,
ndakusabha unyitegeerere.
Ndakugurirya omugunda gurya na erisana ryendemo.
Ndakugurirya embere ya Abhahiti abharikyani,
obhiike omuku waaho.”
12 Abhurahamu akeehiinya kweki embere ya Abhahiti bhonsego.
13 Akakeerya Efuroni,
enu abhantu bhonsego bhareetegeerera ega,
“Ndakusabha unyitegeerere!
Ndakuriha egimbirya gya okwisa okugura omugunda guyo.
Ndakusabha ogege,
naho nnyoore ahasi ha okubhiika mukaani.”
14 Efuroni akamukyukya ega,
15 “Omukuru weetu,
unyitegeerere!
Omugunda guyo,
gugurwe kwa ebhibhaara magana gane bhya ebhigera bhya egimbirya,
nawe bhoono,
giina obhwera-ki gati yaani na uuwe?
Uuwe bhiika muyo mukaaho.”
16 Ego,
Abhurahamu akeekirirya obhuguri bhwa Efuroni bhuyo,
akamurengera endengo inú yeendanga,
embere ya Abhahiti abharikyaye.
Endengo iyo,
ngʼyo ya obhurito bhunú abhakori bha ebhyasara bha eribhaga riyo bhaaguryanga.
17 Mbe,
ego niigo Abhurahamu yaahaanwa omugunda gwa Efuroni ogwa Makipera,
haangʼi na Mamure,
hamwi na erisana ryendemo na emiti gyonsego,
naho bhibhe bhyaye.
18 Eringʼana riyo,
ryakoreka embere ya Abhahiti bhonsego,
bhanú bhaaringa bheekumeenʼye mukiita kya omugi guyo.
19 Hanú gayo gaahwa,
Abhurahamu akabhiika omukari waaye Saara,
mwisana rinú ryaringa mumugunda gwa Makipera haangʼi na Mamure (eginsiku ginu,
n-Hebhuroni),
mukyaro kya Kanaani.
20 Niigo Abhahiti bhaamugurirya Abhurahamu omugunda gurya na erisana ryendemo,
habhe ahasi haaye ha okubhiika abhaku bhaaye.