Waryubha aramusakya Abhurahamu
22
Eribhaga hanú ryahita,
Waryubha akasakya Abhurahamu.
Akamubhirikira ega,
“Abhurahamu!”
Abhurahamu akeetabha ega,
“Ndingi hanu.”
2 Waryubha akamukeerya ega,
“Gega omwana waaho omumwemwe Esaaka,
unú ohanjiri,
ogende nawe mukyaro kya Moria,
munkuku inú nakakoorokye.
Eyo,
omuruusye ekimwenso kya okusikibhwa.”
3 Mbe,
ejo wendeko nyenkyo juri,
Abhurahamu akeemuka,
akaseemya eginkwi gya okusambira ekimwenso.
Kweki,
akagega entikiri yaaye,
na abhagaya bhaaye abhabhiri,
hamwi na omwana waaye Esaaka.
Nho,
akaamba orugendo rwa okugya ahasi hanú yaaringa akeeriibhwe na Waryubha.
4 Orusiku rwa kasatu rwa orugendo rwabho,
Abhurahamu akatiirura ameeso,
akarora ahasi harya kwa hare.
5 Akakeerya abhagaya bhaaye ega,
“Mutigare hanu na entikiri inu.
Oni na omwana waani,
tiga tugende erya,
naho tumusyengere Waryubha.
Hanú twakamare,
twakabhahindire kweki.”
6 Kimwi,
Abhurahamu akagega eginkwi gya okusambira ekimwenso,
akeetikya omwana waaye Esaaka.
Omwene,
akagega omururo na ekigeso,
bhakagya hamwi abhabhiri ego.
7 Hanú bhaaringa bhakyari kunjira,
Esaaka akabhirikira esewaabho ega,
“Taata!”
Wonse akeetabha ega,
“Ndingi hanu,
omwana waani.”
Esaaka akamubhuurya ega,
“Rora!
Tuuna omururo na eginkwi,
nawe eringʼondi rya okuruusya ekimwenso riringi-ha?”
8 Abhurahamu akamukyukya ega,
“Omwana waani!
Waryubha omwene ngʼo areeruusirye eringʼondi rya okuruusya ekimwenso.”
Kwa ego,
abhabhiri bhayo,
bhakagendererya na orugendo rwabho.
9 Hanú bhaahika ahasi harya Waryubha yaaringa amoorokerye,
Abhurahamu akakora ahasi ha okumwensera,
akatuura-ko eginkwi.
Hanú yaamara,
akabhoha omwana waaye Esaaka,
akamuraarya eguru ya eginkwi.
10 Akeemya okubhoko kwaye,
akagega ekigeso,
naho agooge omwana waaye.
11 Nho,
maraika wa OMUKURU akamubhirikira okurwa murwire,
ega,
“Abhurahamu,
Abhurahamu!”
Akeetabha ega,
“Ndingi hanu!”
12 Maraika uyo,
akagamba ega,
“Otasakya okunyahaara omwana waaho,
na otamukorera kyokyonse!
Bhoono mmanyiri ega,
oramwigwa Waryubha,
kwa okubha otanyimiri omwana waaho omumwemwe.”
13 Abhurahamu akatiirura ameeso gaaye,
akarora eguruki eringi enyuma waaye,
igajirye amatira gaaye kukisaka.
Kwa ego,
akatiga omwana waaye,
akagya akagega eguruki iyo,
akairuusya ekimwenso kya okusikya.
14 Abhurahamu akahabhirikira ahasi hayo ega,
Yehobha-Yire,
ensonga yaaye niiga,
OMUKURU areeruusirye!
Nkyo kirakora,
okuhikira reero abhantu bharagamba ega,
“Munkuku ya OMUKURU,
erituuka.”
15 Maraika wa OMUKURU,
akabhirikira Abhurahamu orwa kabhiri okurwa murwire,
16 akamukeerya ega,
“OMUKURU aragamba ega,
‘Kwa okubha otanyimiri omwana waaho omumwemwe,
ndiiri emuuma oni omwene ega,
17 ndakunonka uuwe,
na orwibhuro rwaho ndirwaruhya bhukongʼu,
kya eginjota murwire,
na kya omusenyi kumurambo gwa enyanja.
Orwibhuro rwaho rurigega emigi gya abhasigu bhaabho,
18 na okuhitira orwibhuro rwaho ruyo,
ebhyaro bhyonsego bhirinonkwa,
kwa okubha unyigwiri.’”
19 Kimwi,
Abhurahamu akahindira abhagaya bhaaye,
bhonsego bhakahunjuka hamwi okuhikira Bheeri-Sheebha,
na Abhurahamu akagendererya okumenya eyo.
Abhaana bha Nahoori
20 Hanú amangʼana gayo gaahwa,
Abhurahamu akakeeribhwa ega,
“Itegeerera!
Mirika wonse,
yeebhuriri omumura weenyu Nahoori,
abhaana!
21 Omutangi arabhirikirwa Usi,
na unú aramoosera arabhirikirwa Bhuji,
unú aroosera uyo,
arabhirikirwa Kimweri esewaabho Aramu,
22 abhandi bhaaringa Kesedi,
Hajo,
Piridashi,
Yidirafu na Bhetweri.”
23 Bhetweri ngʼo esewaabho Rebheka.
Mirika yaamwibhurira Nahoori,
omumura waabho Abhurahamu,
abhaana munaane bhayo.
24 Omumeega wa Nahoori,
Reuma,
wonse yaamwibhurira abhaana abhandi.
Abhaana bhayo m-banu,
Tebha,
Gahamu,
Tahashi,
na Maka.