Abhurahamu aramungʼena Abhimereki
20
Mbe,
Abhurahamu akarwa Mamure,
akabhata orubhaara rwa taragweta kukibhara kya Negebhu.
Hanú yaahika eyo,
akamenya gatigati ya emigi gya Kadeshi na Shuri.
Nho kweki,
akagya okumenya kya omugeni mumugi gwa Gerari kwa eribhaga ekego.
2 Abhurahamu hanú yaaringa eyo,
akagamba ega,
omukari waaye Saara m-musubhati waaye.
Kwa ego,
Abhimereki omukama wa omugi guyo,
akatuma abhantu,
bhamureetere Saara munyumba yaaye.
3 Nawe,
Waryubha akamwibhukira Abhimereki mukirooto obhutiku,
akamukeerya ega,
“Uuwe oringi haangʼi okukwa,
kwa okubha omukari unú ogegeri,
m-mukari wa omuntu!”
4 Eribhaga riyo,
Abhimereki yaaringa akyari okuraara na Saara,
akakyukya ega,
“Omukuru,
oreeta abhantu abhaheene?
5 Abhurahamu omwene ngʼo agambiri ega,
omukari uyo,
m-musubhati waaye!
Kweki na Saara omwene agambiri ega,
Abhurahamu m-mumura waabho!
Kwa ego,
rinú nkoreri,
ndikoreri kwa omutima omujomu,
ntaana obhusarya bhobhonse!”
6 Nho,
Waryubha akamukeerya mukirooto kiyo ega,
“Oni mmanyiri ega,
okoreri gayo kwa omutima omujomu.
Nooni nkuribhiiri otansarirya,
nkyo kikoreri ntakwikiririirye omukunʼye omukari uyo.
7 Bhoono omuhindye omukari uyo kumusaaja waaye.
Omusaaja waaye m-murooti,
arikusabhira obhe omuhoru.
Nawe,
nyoore otaamuhindye,
omanye obhuheene ega,
uuwe orikwa hamwi na abhantu bhaaho bhonsego.”
8 Ejo wendeko nyenkyo juri,
Abhimereki akabhabhirikira abhagaya bhaaye bhonsego.
Kimwi akabhakeerya amangʼana gayo gonsego,
bhonse bhakoobhoha bhukongʼu!
9 Nho,
Abhimereki akamubhirikira Abhurahamu,
akamubhuurya ega,
“Otukoreeri eringʼana-ki?
Nkusariirye-ki,
okuhikira oreeteri eguru yaani na eguru ya abhantu bha obhukama bhwani,
obhusarya obhunene?
Unkoreeri amakorwa ganú gatakwenderwa okukorwa.”
10 Abhimereki akagendererya okubhuurya Abhurahamu ega,
“Bhoono waari na ameetegeerero-ki okukora eringʼana rinu?”
11 Abhurahamu akamukyukya ega,
“Nkoreri ego,
kwa okubha nduuji ega,
ahasi hanu,
atariho omuntu unú aramwigwa Waryubha.
Kwa ego,
nkoobhoha ega,
mukanyitiri naho mugege mukaani.
12 Hamwi na gayo,
m-maheene ega,
weeki m-musubhati waani.
Taata ngʼ-umwi nawe bhamaayi mbo abhahagari,
nkyo yaabha mukaani.
13 Waryubha hanú yaankora ngende orugendo,
okurwa iika owa taata,
nkakeerya mukaani ega,
‘Kira ahasi hanú turaagyenga,
worokye obhuhanje bhwaho kuoni,
kwa okugamba ega,
“Unu m-mumura weetu.”
’ ”
14 Mbe,
Abhimereki akahaana Abhurahamu amangʼondi,
egingʼombe,
na abhagaya bha ekisaaja na abha ekikari,
akamuhindirya na omukari waaye Saara.
15 Kweki,
akakeerya Abhurahamu ega,
“Rora,
ekyaro kinu kyonsego kiringi embere yaaho,
n-kyani.
Menya ahasi hohonse hanú oreenda.”
16 Kimwi,
Abhimereki akakeerya Saara ega,
“Rora!
Ndamuriha omuhiiri waaho,
ebhibhaara ekiku kimwi bhya ebhigera bhya egimbirya,
embere ya abhantu bhonsego bhanú bharingi hamwi na uuwe,
ebhe amariho ga obhusarya bhunú nkukoreeri.
Kwa okukora ego,
eroorokya embere ya abhantu bhonsego ega,
otakora eringʼana eribhiibhi.”
17-18 Mbe,
kwa okubha Abhimereki yaaringa agegeri omukari wa Abhurahamu,
OMUKURU akamujigarya,
na omukari waaye akamubhoha okwibhura,
hamwi na abhagaya bhonsego bha ekikari bha iika owaaye.
Nho,
Abhurahamu akamusabha Waryubha,
kimwi Waryubha akamuhwenʼya obhujigaru bhwaye,
omukari waaye,
na abhagaya bhaaye bhonse,
bhakatura okwibhura kweki.