Okusikibhwa kwa emigi gya Sodoma na Gomora
19
Kumugoroobha,
bhamaraika bhabhiri bhayo,
bhakahika Sodoma.
Eribhaga riyo,
Ruutu yaaringa yeekeeri mukiita kya omugi.
Hanú yaabharora,
akagya okubhaturungʼana,
akatema hansi ebhiru,
akahiinya obhusu bhukahika hansi kwa okubhasuuka.
2 Akagamba ega,
“Abhakuru bhaani,
mugenihe munyumba yaani,
oni omugaya weenyu.
Moogye amaguru,
na muraare owaani obhutiku bhwa reero.
Nyenkyo juri,
mwakagendererye na orugendo rwenyu.”
Nawe,
bheeki bhakakyukya ega,
“Tiigo-ha,
bheetu twakaraare kurubhanja hanu.”
3 Ruutu akagendererya okubhakomererya bhukongʼu okuhikira bhakeekirirya.
Kwa ego,
bhakasoha owaaye.
Nho,
Ruutu akabhakorera obhugeni,
akabhakarira emikaate ginú gitaana ekimera,
akabhahaana,
bhakarya.
4 Mbe,
eribhaga bhaaringa bhakyari okuraara,
abhasaaja bhonsego okurwa mbaara gyonsego gya omugi gwa Sodoma,
abhamura na abhakaruka,
bhakeenaara enyumba ya Ruutu.
5 Bhakamubhirikira ega,
“Ee Ruutu!
Abhasaaja bhanú bhasoheri munyumba yaaho munu,
bharingi-ha?
Bhahurukye kibhara!
Tureenda tubhakore abhakari.”
6 Ruutu akahuruka kibhara,
akasiika ekiseku enyuma waaye.
7 Akabhakeerya ega,
“Abhahiiri bhaani,
mutige!
Abhantu bhanu,
mutabhakorera amabhiibhi ganu!
8 Murore!
Niina abhahara abhabhiri bhanú bhataramanya abhasaaja.
Mutige mbahurukirye bhayo,
mubhakore kya ego mureenda.
Nawe,
abhasaaja bhanu,
mutabhakorera eribhiibhi ryoryonse kwa okubha bheeki m-bageni bhaani.”
9 Nawe bheeki,
bhakamukyukya ega,
“Reka hanu!
Uuwe m-mugeni hanu,
bhoono wonse oreenda okubha omubhuturi wa ekiina!
Mbe,
twakakukorere amabhiibhi,
okukira kya ego tukakoreeri abhageni bhaaho bhayo!”
Kimwi,
bhakamusukuma Ruutu,
bhakahika haangʼi na ekiseku,
bhakeenda okukibhuna.
10 Nho,
bhamaraika bhayo,
bhakasiikura-ho ekiseku,
bhakeemya amabhoko gaabho,
bhakarutira Ruutu munyumba,
bhakamara bhakasiika-ho ekiseku.
11 Kimwi,
bhakahokya abhantu bhayo bhonsego,
abhake na abhakuru.
Kwa ego,
bhataatura kweki okurora ekiseku.
12 Mbe,
bhamaraika bhayo,
bhakabhuurya Ruutu ega,
“Uuna omuntu oundi hanu,
hamwi abhooru bhaaho,
abhaana bhaaho bha ekimura na abha ekihara?
Bhonsego bhanú uunabho mumugi munu,
obharuusye-mo bhwangu!
13 Okore ego,
kwa okubha ekiriro eguru ya obhusarya bhwa abhantu bha omugi gunu,
n-kyaru bhukongʼu,
kihitireenʼye embere ya OMUKURU.
Nkyo kikoreri,
atutumiri tuuje okubhasikya.”
14 Mbe,
Ruutu akagya kubhooru bhaaye,
bhanú bhaaringa bharombeeri obhuko abhahara bhaaye.
Akabhakeerya ega,
“Murwe mumugi munu bhwangu,
kwa okubha OMUKURU areenda okugusikya.”
Nawe abhooru bhaaye bhayo,
bhakamurora muna arakaarana.
15 Hanú bhwakya nyenkyo,
bhamaraika bhayo,
bhakamukomererya Ruutu ega,
“Kora bhwangu,
ogege mukaaho,
na abhahara bhaaho abhabhiri bhanu,
murwe munu,
mutaaja okusikibhwa,
hanú omugi gunu gwakajibhibhwe.”
16 Ruutu,
akabha muna areeta amaguru,
nawe OMUKURU akamurorera ekyabhira.
Nho,
bhamaraika bhayo bhakabhagwata amabhoko Ruutu,
omukari waaye,
hamwi na abhahara bhaaye,
bhakabhahurukya kibhara wa omugi.
17 Hanú bhaabhahikya kibhara wa omugi,
maraika oumwi akabhakeerya ega,
“Mungʼose,
naho mwihonʼye!
Mutaaja okumaaha enyuma,
kora mutaaja okwimirira ahasi hohonse mwiteka riyo.
Mungʼosere munkuku,
mutaaja okusika.”
18 Ruutu akabheesasaama ega,
“Tiigo-ha,
abhakuru bheetu!
19 Rora!
Munnonkeri oni omugaya weenyu,
munsereenerye bhukongʼu kwa okunhonʼya.
Nawe,
oni ndabheesasaama ntangʼosera munkuku,
kwa okubha eringi hare bhukongʼu.
Engʼanga inu yakanyoore nkyari okuhika eyo,
nakakwe.
20 Rora!
Omugi omuke guringi erya,
ndasabha unyikiririrye ngʼosere muyo,
kwa okubha n-hangʼi,
na kweki m-muke,
nho ndaahone.”
21 Oumwi waabho akamukyukya ega,
“M-bwaheene,
nkwikiririirye na eringʼana rinu ryonse.
Ntakugusikya omugi gunú ogambiri.
22 Bhoono ngʼosera muyo bhwangu.
Ntaature okukora ryoryonse okuhikira hanú wakahike muyo.”
Nkyo kikakora omugi guyo gukatogwa ega,
Soari.a
23 Ruutu hanú yaahika Soari,
eryubha ryaringa rituriri.
24 Rumwigo,
OMUKURU akeetuumya omururo omuhaari gwa ekibhiriiti,
gukagwa mumigi gya Sodoma na Gomora.
25 Akasikya emigi ebhiri giyo na eriteka ryonsego,
abhantu bhonsego na emiti gyonsego.
26 Emigi giyo hanú gyasikanga,
omukari wa Ruutu yaaringa aramusoorana kwa enyuma,
na eribhaga riyo akeekyukya okumaahirira-yo.
Niigo yeekyukya ego,
akahinduka okubha entimu ya omuunyu.
27 Mbe,
hanú bhwakya nyenkyo,
Abhurahamu akagya ahasi harya yaaringa yeemiriiri na OMUKURU.
28 Hanú yaahika,
akamaahirira orubhaara rwa Sodoma na Gomora,
na eriteka ryonsego.
Akarora engesi endito ereegunda,
kya engesi ya eribheri erinene.
29 Mbe,
Waryubha hanú yaasikyanga emigi gya mwiteka riyo,
yaahiituka amasabho ga Abhurahamu.
Kwa ego,
yaamuruusya Ruutu mungʼanga enene,
inú yaaringa enyooreri emigi ginú Ruutu yaamenyanga-mo.
Abhahara bha Ruutu bhararaara na esewaabho
30 Ruutu akoobhoha okumenya Soari,
kwa ego,
weeki na abhahara bhaaye,
bhakariina munkuku.
Eyo,
bhakamenya mwisana.
31 Orusiku rumwi,
omuhara omukuru akakeerya omuke waaye ega,
“Taata yaagoteri.
Na atariho omusaaja wa okututeta,
kya ego eringi kubhakari bhonsego bha mukyaro kyonsego.
32 Bhoono,
tumunywensye edivai arehwe,
nho tuture okuraara nawe,
tukiinʼye orwibhuro rwetu,
kwa okuhitira kuweeki.”
33 Mbe,
obhutiku bhuryabhurya,
bhakanywensya esewaabho edivai akarehwa,
omuhara waaye omukuru akaraara nawe.
Esewaabho kora ataamanya kya ego omuhara waaye yaasoha akaraara nawe,
na kya ego yaarwa-mo.
34 Hanú bhwakya nyenkyo,
omuhara omukuru akamukeerya omuke waaye ega,
“Oni obhutiku nareeri na taata.
Bhoono!
Reero kweki tumunywensye,
uuwe wonse oraare nawe.
Nho,
bhonsego turaanyoore abhaana,
na orwibhuro rwetu rukiine.”
35 Mbe,
obhutiku bhuyo,
kweki bhakanywensya esewaabho edivai,
omuhara omuke wonse akaraara nawe.
Esewaabho ataamanya kya ego omuhara uyo yaasoha,
na kya ego yaarwa-mo.
36 Kwa ego,
abhahara bha Ruutu bhayo bhonsego bhabhiri,
bhakagega eginda okuhitira kwisewaabho.
37 Kimwi omuhara omukuru akeebhura omwana wa ekisaaja,
akamutoga Moabhu.
Uyo ngʼo esewaabho Abhamoabhu okuhikira reero.
38 Omuhara waaye omuke,
wonse akeebhura omwana wa ekisaaja,
akamutoga Bhenami.
Uyo ngʼo esewaabho Abhaamooni okuhikira reero.