Waryubha aramwibhukira Abhurahamu kweki
18
Orusiku rumwi,
OMUKURU yaamwibhukira Abhurahamu,
haangʼi na emiti eminene gya omurembe egya Mamure.
Eribhaga rya eribhiriira rya omubhasu,
Abhurahamu yaaringa yeekeeri mukiita kya eribhuru ryaye.
2 Akatiirura ameeso gaaye eguru,
akarora abhantu abhasatu bheemiriiri hare-ko embere waaye.
Hanú yaabharora,
akakenya okurwa mukiseku hayo bhwangu,
akagya okubhaturungʼana.
Hanú yaabhahikiira,
akatema ebhiru akahiinya obhusu bhukahika hansi okoorokya kya ego arabhasuuka,
3 akagamba ega,
“Ee omukuru waani!
Oni m-mugaya weenyu!
Ndabhasasaama munyikiririrye,
mutahitiranʼya mtamwe okuhika owaani.
4 Ndasabha muganye mureeterwe amanji ga okoogya amaguru,
mumare mumuunye mukiiriiri kya omuti gunu.
5 Munyijiiri omugaya weenyu,
kwa ego,
muganye mbakorere ebhyakurya ebhikego,
naho mukongʼe okugendererya na orugendo rwenyu.”
Bhonsego bhakakyukya ega,
“M-bwaheene!
Kora kya ego ogambiri.”
6 Kwa ego,
Abhurahamu akasoha bhwangubhwangu mwibhuru,
akakeerya omukari waaye Saara ega,
“Kora bhwangu,
gega egindengo esatu gya obhusye obhujomu bhwa abhageni,
onoke na okore emikaate.”
7 Kimwi,
Abhurahamu akakenya bhwangubhwangu,
okugya mwihijo rya egingʼombe,
akasora ekigeni kimwi ekinure,
akahaana omugaya waaye.
Omugaya uyo,
akakigooga bhwangubhwangu na okukiteeka.
8 Hanú ebhyakurya bhyabha,
Abhurahamu akagega amaguta ga egingʼombe,
amabheere,
na enyama iyo,
akabheekarirya abhageni bhayo.
Hanú bhaaringa bhararya,
Abhurahamu yaaringa yeemiriiri haangʼi nabho hansi wa omuti guyo.
9 Abhageni bhayo,
bhakamubhuurya ega,
“Omukari waaho Saara,
aringi-ha?”
Abhurahamu akabhakyukya ega,
“Aringi mwibhuru.”
10 Oumwi waabho akagamba ega,
“Maheene,
omwaka guyo guraaja,
kwibhaga kya rinu,
ndihunjuka,
na Saara aribha akwibhuriri omwana wa ekisaaja.”
Eribhaga riyo,
Saara yaaringa enyuma yeemiriiri mukiseku kya eribhuru areetegeerera.
11 Abhurahamu na Saara,
bhaaringa bhagoteri.
Na Saara yaaringa atiniri,
okuringʼaana na obhumuri bhwa abhakari.
12 Kwa ego,
Saara akaseka,
akeegambira mumutima gwaye ega,
“Ndeegwa oni ndingi omugotu bhukongʼu!
Na omusaaja waani wonse m-mugotu.
Bhoono mubhugotu munu,
nintura okubha na obhujomerwa bhwa okuraara na omusaaja?”
13 Kimwi,
OMUKURU akabhuurya Abhurahamu ega,
“Kwaki Saara asekeri,
enu areebhuurya ega,
‘Heene ndibhura omwana mubhugotu bhwani bhunu?’
14 Ririho eringʼana ryoryonse erikongʼu rinú ritakuturika ku MUKURU?
Na omwaka guyo guraaja,
kwibhaga kya rinu,
ndihunjuka,
na Saara aribha amariri okwibhura omwana wa ekisaaja.”
15 Nawe,
kwa okubha Saara yaaringa yoobhoheri,
akahakaana ega,
“Oni ntasekeri!”
OMUKURU akagamba ega,
“Kora okanga,
osekeri.”
Abhurahamu arabhasabhira abhantu bha Sodoma
16 Abhantu bhayo,
hanú bhaamara okurya ebhyakurya,
bhakeemuka,
na Abhurahamu akabhaheregesya.
Bhakahika ahasi hanú bhaaringa bharatura okurora insi mumugi gwa Sodoma.
17 Nho,
OMUKURU akeeganirirya ega,
“Bhoono mmubhise Abhurahamu eringʼana rinú ndeenda okukora?
18 Weeki aribha esewaabho orwibhuro orwaru bhukongʼu.
Na okuhitira kuweeki,
ebhyaro bhyonsego bhirinonkwa.
19 Mmusoreri omwene,
atongere abhaana bhaaye,
na orwibhuro rwaye,
bhabhe bharanyigwa,
kwa okukora amangʼana ga obhuheene na okugwata amaragiriryo gaani.
Kwa okukora ego,
na oni ndamukorera Abhurahamu kya ego naamuraga.”
20 Hayo,
OMUKURU akagamba ega,
“Nigwiri ekiriro ekyaru eguru ya emigi gya Sodoma na Gomora.
Obhusarya bhwabho,
m-bwaru bhukongʼu!
21 Mbe bhoono,
ndeetuuma naho ndore nyoore obhusarya bhunú bharakora,
bhuraringʼaana na ekiriro kinú kinhikiiri.
Nyoore tiigo,
ndimanya.”
22 Mbe,
abhantu abhabhiri bhayo,
bhakaroobha enjira ya okurwa harya okubhata Sodoma,
nawe Abhurahamu akatama yeemiriiri na OMUKURU.
23 Nho,
Abhurahamu akamusuntarira,
akamubhuurya ega,
“M-buheene ega,
orisikya abhaheene na abhasarya bhonsego hamwi?
24 Tugambe ega,
mumugi bharaatuuke-mo abhantu abhaheene mirongo etaanu.
M-buheene ega,
origusikya na kora otakugwabhira kurusumo rwa abhantu abhaheene mirongo etaanu bhayo?
25 Tiigo-ha etakuturika.
Otakwenderwa okwita abhaheene hamwi na abhasarya.
Ndamanya otakukora ego,
okukorera abhaheene kya abhasarya!
Omubhuturi wa ekiina wa ekyaro kyonsego,
atakutiga okukora aga heene!”
26 OMUKURU akamukyukya ega,
“Mumugi gwa Sodoma,
nkanyoora-mo abhantu abhaheene mirongo etaanu,
ndagwabhira omugi gonsego kurusumo rwabho!”
27 Abhurahamu akagamba kweki ega,
“Onyoora oni n-duteeri na eriibhu eryene,
nawe ndasabha okuhaira na Omukuru waani.
28 Nyoore bharaatuuke-mo abhaheene mirongo ena na bhataanu,
bhararebha okuhika mirongo etaanu,
origusikya omugi guyo gonsego kwa okubha bhasuuhiri abhantu bhataanu abhaheene?”
OMUKURU akamukyukya ega,
“Tiigo-ha!
Ntakugusikya omugi guyo,
nyoore bharaatuuke-mo abhaheene mirongo ena na bhataanu.”
29 Abhurahamu akagendererya okumubhuurya kweki ega,
“Bhoono,
nyoore bharaatuuke-mo abhaheene mirongo ena abheenego?”
Wonse akamukyukya ega,
“Kurusumo rwa abhaheene mirongo ena bhayo,
ntakugusikya.”
30 Abhurahamu akagamba kweki ega,
“Ee Omukuru,
ndakusabha otajima!
Unyikiririrye kweki.
Nyoore bharaatuuke-mo abhaheene mirongo esatu?”
OMUKURU akamukyukya ega,
“Nkanyoora-mo abhaheene mirongo esatu,
ntakugusikya.”
31 Abhurahamu akagamba ega,
“Ndasabha okuhaira na Omukuru waani.
Bhoono,
nyoore bharaatuuke-mo abhaheene mirongo ebhiri?”
OMUKURU akamukyukya ega,
“Kurusumo rwa abhaheene mirongo ebhiri bhayo,
ntakugusikya.”
32 Kubhuteero,
Abhurahamu akagamba ega,
“Omukuru waani,
ndakwisasaama bhukongʼu,
ngambe rumwigo.
Nyoore bharaatuuke-mo abhaheene ekumi?”
OMUKURU akamukyukya ega,
“Kurusumo rwa abhaheene ekumi bhayo,
ntakugusikya omugi guyo.”
33 OMUKURU hanú yaamara okuhaira na Abhurahamu,
akeemuka.
Abhurahamu wonse,
akahunjuka iika owaaye.