Obhwambiro 17

Waryubha arahaana Abhuramu ekimanyiiriryo kya eriragano

Hanú Abhuramu yaahikya emyaka mirongo kenda na kenda, OMUKURU akamwibhukira, akamukeerya ega, “Nooni Waryubha wa Obhuturo bhonsego. Ogwate ameehigiryo gaani, na wikare embere waani otasuuhirwa. 2 Na oni ndakora eriragano gati yaani na uuwe, na ndyaruhya orwibhuro rwaho bhukongʼu.”

3 Hayo, Abhuramu akatema ebhiru, akahiinya obhusu bhukahika hansi okumusyengera. Nho Waryubha akamukeerya ega, 4 “Eriragano ryani na uuwe n-dinu, oribha esewaabho amakabhira amaaru. 5 Okwambira reero otakubhirikirwa Abhuramu kweki, oraabhenga orabhirikirwa Abhurahamu, kwa okubha nkukoreeri okubha esewaabho amakabhira amaaru. 6 Ndakukora obhe na orwibhuro orwaru bhukongʼu, na okurwa murwibhuro rwaho, amakabhira amaaru gariibhuka-mo, na abhakama bhariibhuka-mo.

7 “Ndikora eriragano ryani na uuwe rinage koko, eginyibhuro kwa eginyibhuro. Eribha egoego, gati yaani na orwibhuro rwaho. Na ndibha Waryubha waaho na Waryubha wa orwibhuro runú ruriija enyuma yaaho, koko. 8 Ndakuhaana uuwe na orwibhuro rwaho, ekyaro kya Kanaani kinú omenyeri bhoonwego kya omugeni, kibhe kyenyu koko. Na oni ndibha Waryubha waabho.”

9 Kimwi, Waryubha akakeerya kweki Abhurahamu ega, “Uuwe, hamwi na orwibhuro rwaho na eginyibhuro gyaho gyonsego, mugwate eriragano ryani. 10 Kwa okukora ego, kira omusaaja gati yeenyu asaarwe. Ego niigo mureenderwa mukore, uuwe na orwibhuro rwaho, naho okugwata eriragano ryani. 11 Mubhenga murasaarwa. Na eringʼana riyo ribhe ekimanyiiriryo kya eriragano, gati yaani na bheenyu. 12 Kira omwana wa ekisaaja, orwibhuro kwa orwibhuro, areenderwa asaarwe orusiku rwa munaane. Na abhagaya bhanú bheebhurirwa iika owaaho, na bhanú bhaagurwa kwa egimbirya okurwa kubhageni, bhonse bhasaarwe. 13 Kira omusaaja unú yeebhurirwa iika owaaho, kasi unú yaagurwa kwa egimbirya gyaho, areenderwa asaarwe. Kiyo nkyo kirabha ekimanyiiriryo kya eriragano ryani kumibhiri gyenyu koko. 14 Kira omusaaja unú atarisaarwa, aryahurwa okurwa mubhantu bhaaye, kwa okubha aribha asarirye eriragano ryani.”

Abhurahamu araragwa okunyoora omwana wa ekisaaja

15 Kimwi, Waryubha akagendererya okukeerya Abhurahamu ega, “Okurwa reero, omukari waaho Sarai, otamubhirikira kweki Sarai. Eriina ryaye riraabhe Saara. 16 Na ndimunonka okuhikira akwibhurire omwana wa ekimura. Ndigendererya okumunonka abhe maayi wa amakabhira amaaru. Na okurwa murwibhuro rwaye ruyo, abhakama bhariibhuka-mo.”

17 Kweki Abhurahamu akatema ebhiru, akahiinya obhusu bhukahika hansi, akaseka na okwiganirirya ega, “Omuntu wa emyaka egana rimwi, aratura okwibhura omwana? Na Saara wa emyaka mirongo kenda, aratura okwibhura?” 18 Kimwi Abhurahamu akakeerya Waryubha ega, “Ekaabheeri bhujomu wikirirye, Ishimaeri ngʼo anyoore enonkwe yaaho iyo.”

19 Waryubha akamukyukya ega, “Tiigo-ha! Nawe omukari waaho Saara arikwibhurira omwana wa ekisaaja, na uuwe oriija okumutoga ega, Esaaka. Oni ndikora eriragano ryani kumwene na orwibhuro rwaye rugume koko! 20 Na kurubhaara rwa Ishimaeri, nigwiri amasabho gaaho eguru yaaye. Wonse, mmunonkeri, ndimukora abhe na orwibhuro orwaru na ndirwaruhya bhukongʼu. Aribha esewaabho abhatungi ekumi na abhabhiri, na oni ndimukora abhe omwibhuri wa abhantu abhaaru bhukongʼu. 21 Nawe eriragano ryani rirya, ririnaga ku Esaaka omwene. Maheene, omwaka guyo guraaja, kwibhaga kya rinu, ndihunjuka, na Saara arikwibhurira omwana uyo.” 22 Hanú Waryubha yaamara okuhaira na Abhurahamu, akamutiga.

23 Orusiku ruyoruyo, Abhurahamu akagega omwana waaye Ishimaeri, hamwi na bhonsego bhanú bheebhurirwa iika owaaye, na bhanú bhaagurwa kwa egimbirya gyaye, kira omusaaja wa iika owaaye, akamusaara kya ego Waryubha yaaringa amuragiriirye.

24 Abhurahamu wonse akasaarwa. Eribhaga rinú yaasaarwa, yaaringa na emyaka mirongo kenda na kenda, 25 na omwana waaye Ishimaeri wonse, yaaringa na emyaka ekumi na esatu. 26 Abhurahamu na omwana waaye Ishimaeri, bhaasaarwa orusiku ruyoruyo, 27 hamwi na abhasaaja bhonsego bhanú bheebhurirwa iika owaaye, na bhanú bhaagurwa kwa egimbirya okurwa kubhageni.