Sarai na Hajiri
16
1-3 Hanú Abhuramu yaaringa amariri emyaka ekumi mukyaro kya Kanaani, Sarai, omukari waaye, yaaringa akyari okumwibhurira omwana. Nawe, yaaringa na omugaya wa ekihara. Omugaya uyo, yaaringa Omumisiri, eriina ryaye yaabhirikirwanga Hajiri. Mbe, Sarai akakeerya Abhuramu ega, “Omanyiri ega, OMUKURU yanyimiri orwibhuro. Bhoono ndakusabha, ogege omugaya waani Hajiri, hamwi nkaanyoora abhaana okuhitira kuweeki.” Abhuramu akeekirirya ameetegeerero ga Sarai gayo. Kimwi, Sarai akamuhaana omugaya waaye wa ekihara, Hajiri Omumisiri, abhe omukari waaye. 4 Mbe, Abhuramu akamugega Hajiri, wonse akagega enda. Hanú yaamanya ega, aringi enda, akaamba okumujeera Sarai kuuku waabho. 5 Kwa ego, Sarai akakeerya Abhuramu ega, “Amabhiibhi ganú ndanyoora, gabhe eguru yaaho. Oni naakuhaana omugaya waani, abhe mukaaho. Nawe, hanú yaamanya ega, aringi enda, akaamba okunjeera. OMUKURU atwamurire gati yaaho na oni!” 6 Abhuramu wonse akamukeerya ega, “Omugaya waaho aringi mumabhoko gaaho. Omukorere rinú orarora rirakujomera.” Kimwi Sarai akaamba okunyankya Hajiri okuhikira akamungʼosa.Okwibhurwa kwa Ishimaeri
7 Nho, maraika wa OMUKURU akasikana na Hajiri, haangʼi na ekisekaani kya amanji kukibhara. Ekisekaani kiyo, kyaringa kunjira ya okubhata mumugi gwa Shuri. 8 Maraika akamubhuurya ega, “Hajiri, omugaya wa Sarai! Orwiri-ha? Na oragya-ha?” Hajiri akamukyukya ega, “Ndamungʼosa kuuku Sarai.”
9 Maraika akamukeerya ega, “Hinda kukuuku weenyu, na obhenga oramwigwa.” 10 Akagendererya okumukeerya ega, “Ndyaruhya orwibhuro rwaho bhukongʼu, kora bhatige okuturika okubharwa.” 11 Akagendererya okumukeerya ega, “Uuwe bhoono oringi enda, oriibhura omwana wa ekisaaja. Omutoge Ishimaeri,a kwa okubha, OMUKURU yeegwiri ekiriro kya enyanko yaaho. 12 Ishimaeri uyo, aribha kya entikiri ya mwisisib kubhantu, arirwananga na kira omuntu, na abhantu bhonsego bharihakaananʼyanga nawe. Aribhanga areekara kwa eriihe na abhahiiri bhaaye bhonsego.”
13 Mbe, Hajiri akamutoga eriina OMUKURU unú yaahaira nawe eyo ega, “Uuwe nuuwe Waryubha unú orandora,”c kwa okubha yaagamba ega, “Bhoono mmuruuji weeki unú arandora oni.” 14 Kiyo nkyo kyakora ekisekaani kiyo kikabhirikirwa ega, Bheeri-Rahai-Roi.d Ekisekaani kiyo, kiringi gatigati ya emigi gya Kadeshi na Bheredi.