Waryubha arakora eriragano na Abhuramu
15
Amangʼana gayo hanú gaahwa, OMUKURU akatumira Abhuramu amangʼana mukirooto ega, “Ee Abhuramu! Tiga okoobhoha! Oni ni-ngubha yaaho, na ndaakuhaanenga omutuho omwaru deke.”2 Nawe, Abhuramu akagamba ega, “Ee OMUKURU Waryubha waani, oringʼaana-ki, enu oni ndakwa ntaana omwana? Kweki Eriejeri wa Damasikasi, omugaya waani unu, ngʼo arigabha ebhintu bhyani bhyonsego.” 3 Abhuramu akagendererya okugamba ega, “Otaangʼaana oni abhaana, kwa ego, omugaya unú yeebhurirwa iika owaani, ngʼo arigabha ebhintu bhyani!”
4 Nho, OMUKURU akamukeerya kweki ega, “Uyo, atarigabha ebhintu bhyaho, nawe unú arigabha m-mwana waaho wa okwibhura.” 5 Kwa ego, akamuhira kibhara, akagamba ega, “Maaha eguru murwire! Bhara eginjota, nyoore heene oratura okugibhara!” Kimwi akagendererya okumukeerya ega, “Ego niigo orwibhuro rwaho ruribha orwaru!” 6 Abhuramu akamwikirirya OMUKURU, kwa ego, Waryubha akamubhara okubha omuntu omuheene embere yaaye.”
7 Kimwi OMUKURU akamukeerya kweki ega, “Oni nooni OMUKURU! Nooni naakuruusya Uru, omugi gwa Abhakaridaayo, naho nkuhaane ekyaro kinu, kibhe engabho yaaho.” 8 Nawe Abhuramu akamubhuurya ega, “Ee OMUKURU Waryubha waani, nimanya egaki ega, ekyaro kinu ni-ngabho yaani?” 9 OMUKURU akamukyukya ega, “Ndeetera ekimoori kya emyaka esatu, emburi enkari ya emyaka esatu, eguruki ya emyaka esatu, ekiguuti na eryana rya enguuti.” 10 Abhuramu akamureetera bhiyo bhyonsego. Akabhigooga, akabhibhaarura amabhaara gabhiri kira ekimwi, akabhituura kumichafwa ebhiri bhimaahirireeni. Nawe ebhinyonyi, ataabhyahukanʼya. 11 Na amatoonyi gakaamba okwituuma kubhitundu bhiyo, Abhuramu akabha aragakenyia.
12 Eribhaga eryubha ryaringa rirasikira, Abhuramu akahitirwa na egintiro egindito. Rumwigo, ekisunte kikakurya kikamwinaara, akaamba okoobhoha bhukongʼu. 13 Kimwi, OMUKURU akamukeerya ega, “Uuwe, omanye obhuheene ega, orwibhuro rwaho ruribha orugeni mukyaro kinú kitaringi ekyabho abheene. Bheeki bharibha abhagaya na bharinyankibhwa kwa eribhaga rya emyaka magana gane. 14 Nawe ekyaro kinú bharikora emirimu kya abhagaya, ndikibhuturira ekiina. Nho orwibhuro rwaho bharirwa eyo, na ebhintu ebhyaru bhukongʼu. 15 Nawe uuwe, oreekare emyaka emyaru. Orikwa kwa omurembe, na oribhiikwa bhujomu. 16 Orwibhuro rwaho, rurihunjuka mukyaro kinu, kurwibhuro rwa kane, kwa okubha obhusarya bhwa Abhaamoori bhutarahikira endengo ya eguru.”
17 Eryubha hanú ryamara okusikira na ekisunte okusoha, rumwigo eribheri rya engesi, na egindimi gya omururo gunú gurooka, bhikeebhuka na okuhita gati ya amabhaara ga eginyama girya. 18 Orusiku ruyo, OMUKURU yaakora eriragano na Abhuramu, aragamba ega, “Nheeri orwibhuro rwaho ekyaro kinu, okwambira muruuji rwa Misiri, okugya okuhikira muruuji orukuru rwa Efurate. 19 Mbaheeri ebhyaro bhinú bhimenyerwe na Abhakeni, Abhakeniji, Abhakidimoni, 20 na ebhya Abhahiti, Abhaperiji, Abharefai, 21 na ebhya Abhaamoori, Abhakanaani, Abhagirigashi, na Abhayebhusi.”