Abhuramu aramutuurya Ruutu kwa obhuhigi obhunene
14
Kwibhaga riyo, Amuraferi yaaringa omukama wa Shinari, Arioko yaaringa omukama wa Erasari, Kedoraomeri yaaringa omukama wa Eramu, na Tidari yaaringa omukama wa Goimu, 2 bhonsego kwa hamwi, bhakagya okurwana eriihe na abhakama abhataanu, Bheera omukama wa Sodoma, Bhirisha omukama wa Gomora, Shinabhu omukama wa Adima, Shemebheri omukama wa Sebhoimu na omukama wa Bheeri. Eriina erindi rya Bheeri ndyo Soari. 3-4 Kwa eribhaga rya emyaka ekumi na ebhiri, abhakama abhataanu bhayo, bhaamwigwanga omukama Kedoraomeri. Nawe, kumwaka gwa ekumi na esatu, bhakajeema. Kimwi, bhakakumanʼya hamwi abhasirikare bhaabho, bhakasoha mwiteka rinú ryabhirikirwanga ega, Sidimu. Ensonga ya eriina Sidimu, niiga, “Enyanja ya Omuunyu.”5 Omwaka gwa ekumi na ena, omukama Kedoraomeri na abhakama abharikyaye bhanú bhaaringa bhagwateeni, bhakagya bhakabharwanʼya na okubhahiga Abharefai bha mumugi gwa Asitaroti-Karinaimu, Abhajuji bha mumugi gwa Hamu, na Abhaemi bha mumugi gwa Shawe-Kiriataimu, 6 na Abhahoori munkuku yaabho ya Seiri. Bhakabhasonga okuhikira Eri-Parani, kurutunga rwa ekibhara. 7 Kimwi bhakahunjuka enyuma, bhakahika Eni-Mishipati, eriina erindi ndyo Kadeshi, bhakagega ekyaro kyonsego kya Abhaamareki, na ekya Abhaamoori, bhanú bheekaranga Hasasoni-Tamaari.
8 Abhakama abhataanu bharya, hanú bhaagya okuseemya eriihe mwiteka rya Sidimu, 9 bhakarwana na omukama Kedoraomeri wa Eramu, Tidari wa Goimu, Amuraferi wa Shinari, na Arioko wa Erasari. Abhakama abhane bhayo, bhakarwanibhwa na bhataanu bharya.
10 Kuginsiku giyo, mwiteka rya Sidimu ryaringa riijwiri amatuko ga eraami. Nho, abhakama bha Sodoma na Gomora bhakahigwa eriihe, bhakangʼosa, bhakatubhira mumatuko gayo. Nawe bhanú bhaasaaga, bhakangʼosera munkuku. 11 Mbe, abhakama abhane bhanú bhaabhahiga, bhakagega ebhintu na ebhyakurya bhyonsego bhya Sodoma na Gomora, bhakagya owaabho. 12 Ruutu, omwana wa omumura waabho Abhuramu, yaaringa amenyeri Sodoma, wonse bhakamugega hamwi na ebhintu bhyaye bhyonsego.
13 Omuntu umwi akeebhisa, akagya akamukeerya Abhuramu Omwibhurania, amangʼana gayo. Kwibhaga riyo, Abhuramu yaaringa amenyeri haangʼi na emiti eminene gya omurembe egya Mamure, Omwamoori. Omwamoori uyo, hamwi na abhahiiri bhaaye Eshikori na Aneri, bhonsego bhaaringa bharireeni emuuma na Abhuramu.
14 Abhuramu hanú yeegwa ega, omwana wa omumura waabho agegerwe okubha omugaya, akabhahaana ebhigwato abharwani bhaaye magana gasatu na ekumi na munaane, bhanú bhaaringa bheebhuriirwe owaaye. Kimwi bhakaseeta abhasigu bhayo okuhikira mumugi gwa Daani. 15 Obhutiku, Abhuramu akagabhanʼya abhantu bhaaye kumiganda, naho bhabharwanʼye abhasigu bhaabho. Bhakabharwanʼya, bhakabhahiga na okubhakenyia okuhikira mumugi gwa Hobha, goosi ya Damasikasi. 16 Kimwi, akahunjukya ebhintu bhyonsego, na Ruutu omwana wa omumura waabho, na ebhintu bhyaye, hamwi na abhakari na abhantu abhandi.
Merikijedeki aramunonka Abhuramu
17 Abhuramu hanú yaahunjukanga okurwa okurwanʼya omukama Kedoraomeri hamwi na abhakama abharikyaye, omukama wa Sodoma akamuturuungʼana mwiteka rya Shawe (riyo ndyo ryaringa Eriteka rya Omukama).
18 Nho omukama umwi unú yaabhirikirwanga Merikijedeki, akareeta emikaate na edivai. Weeki yaaringa omukama wa Saremu na omusyengeri wa Waryubha wa eguru ya bhyonsego. 19 Kimwi akamunonka Abhuramu, aragamba ega, “Waryubha wa eguru ya bhyonsego, omubhumbi wa orwire na ekyaro, amunonke Abhuramu! 20 Na weeki Waryubha wa eguru ya bhyonsego, unú ateeri abhasigu bhaaho mumabhoko gaaho, agungibhwe!” Kimwi Abhuramu akamuhaana ejaaka okurwa kubhintu bhinú yaatumbarira mwiihe. 21 Omukama wa Sodoma akamukeerya Abhuramu ega, “Ngʼaana abhantu bhaani, nawe ebhintu ebhindi bhyonsego, obhigege uuwe.” 22 Nawe Abhuramu akamukeerya ega, “Ndarya emuuma embere ya OMUKURU, Waryubha wa eguru ya bhyonsego, omubhumbi wa orwire na ekyaro, 23 ega, ntakugega oruji kora orugoye rwa okubhohera enkeeto, kora ekintu kyaho kyokyonse, otaaja wigungye ega, ‘Nooni m-muniibhirye Abhuramu.’ 24 Ntakugega kyokyonse, hamwi ebhintu bhinú abhamura bhaani bhaarya, na ebhya abhantu bhanú bhaagya hamwi na oni. Na abhantu bhayo m-banu Aneri, Eshikori, na Mamure. Bhayo mbo bhahaanwe omwandu gwabho.”