13
Kwa ego, Abhuramu akarwa Misiri na omukari waaye, na ebhintu bhyabho bhyonsego. Ruutu wonse akagya nabho. Bhakahunjuka kweki orubhaara rwa Negebhu.
Abhuramu na Ruutu bharaahukana
2 Kwibhaga riyo, Abhuramu yaaringa omuniibhi bhukongʼu wa egintugo njaaru, ebhigera bhya egijahaabhu na ebhigera bhya egimbirya.
3 Kimwi, akarwa Negebhu, akabha aragya kwa okungʼanyangʼanya okuhikira akahika mumugi gwa Bheteri. Hayo nho yaaringa ahagaajiri eribhuru ryaye, gatigati ya Bheteri na Ayi. 4 Na hayo nho, yaaringa amariri okumuhagaajira OMUKURU ahasi ha okumwensera. Nho akamusyengera.
5 Mbe, Ruutu unú yaagendanʼyanga hamwi na Abhuramu, wonse yaaringa omuniibhi bhukongʼu, yaaringa na amahijo amanene ga amangʼondi, egimburi, egingʼombe, na amabhuru amaaru. 6 Egintugo gyabho gyaringa njaaru bhukongʼu, kwa ego ekyaro kirya kitaabhesa okumenya hamwi. 7 Ego, rikeebhuka eriihe gati ya abhariisya bha Abhuramu na abha Ruutu. Na kwibhaga riyo ryonse, Abhakanaani na Abhaperiji, mbo bhaaringa abhamenyi bha mukyaro kiyo.
8 Kwa ego, Abhuramu akamukeerya Ruutu ega, “Ritabha-ho eriihe gati yaani na uuwe, kora gati ya abhariisya bhaani na abhaaho, kwa okubha bheetu m-bamwi. 9 Bhoono maaha ekyaro kinu kyonsego embere yaaho. Twahukane! Nyoore oragya orubhaara rwa obhumosi, oni ngye orubhaara rwa obhuryo. Nyoore oragya orubhaara rwa obhuryo, oni ngye orubhaara rwa obhumosi.” 10 Ruutu akatiirura ameeso gaaye, akarora eriteka rya oruuji rwa Yorodani okuhikira mumugi gwa Soari, akarora ega, riina amanji amaaru, kya ekyaro kya Misiri, na mubhusitani ya OMUKURU inú erabhirikirwa Edeni. Na eribhaga riyo, Omukuru yaaringa atarasikya emigi gya Sodoma na Gomora. 11 Kwa ego, Ruutu akeetoora eriteka ryonsego rya Yorodani, akabhata orubhaara rwa bhuturira-ryubha. Ego niigo abhahiiri bhayo, bhaahukana.
12 Abhuramu akatigara mukyaro kya Kanaani muyo, nawe Ruutu weeki akagya okumenya haangʼi na emigi ginú gyaringa mwiteka rirya, akangʼanyirya amabhuru gaaye haangʼi na omugi gwa Sodoma. 13 Nawe abhantu bha Sodoma bhaaringa abhabhiibhi bhukongʼu, bhaaringa bharakora obhusarya bhukongʼu, embere ya OMUKURU. 14 Ruutu hanú yaamara okwahukana na Abhuramu, OMUKURU akamukeerya Abhuramu ega, “Bhoono tiirura ameeso gaaho, omaahe mbaara gyonsego, goosi, taragweta, bhuturira-ryubha na bhusikirira-ryubha. 15 Ekyaro kyonsego kinú orarora, ndikuhaana, uuwe na orwibhuro rwaho, kibhe kyenyu koko. 16 Ndikora orwibhuro rwaho, rubhe orwaru kya oruteeri rwa ekyaro. Nyoore ariho wowonse unú aranagya okubhara oruteeri, mbe orwibhuro rwaho ruribharwa. 17 Mbe bhoono, ogendegende mukyaro kinu, ogende obhutambi na obhugari, kwa okubha ekyaro kinu, ndikuhaana uuwe.”
18 Nho, Abhuramu akeeha amabhuru gaaye, akagya okumenya mukyaro kya Hebhuroni, haangʼi na emiti eminene gya omurembe egya Mamure. Hanú yaahika eyo, akamuhagaajira OMUKURU ahasi ha okumwensera.