Waryubha aramubhirikira Abhuramu
12
Orusiku rumwi, OMUKURU akakeerya Abhuramu ega, “Orwe mukyaro kyaho, otige abhahiiri bhaaho, na oruganda rwa eseweenyu, ogye mukyaro kinú ndikoorokya.2 Ndikukora obhe esewaabho ekyaro ekinene,
na ndikunonka!
Ndirikiinʼya eriina ryaho,
na uuwe oribha enonkwe kubhandi.
3 Abhantu bhanú bharikunonka na oni ndibhanonka.
Nawe, bhanú bharikwihiima na oni ndibheehiima.
Kwa okuhitira kuuwe, ndinonka abhantu bha amakabhira gonsego ga mukyaro!”
4-5 Mbe, Abhuramu akeemuka mumugi gwa Haraani, kya ego OMUKURU yaaringa amukeerye. Eribhaga riyo, yaaringa na emyaka mirongo muhungati na etaanu. Akamugega omukari waaye Sarai, Ruutu omwana wa omumura waabho, na ebhintu bhyabho bhyonsego bhinú bhaaringa nabhyo, hamwi na abhakori bha emirimu bhaaye, bhanú yaaringa anyooreri Haraani eyo. Nho bhakagendererya na orugendo ruyo, okuhikira mukyaro kya Kanaani. 6 Abhuramu na abhahiiri bhaaye, bhakahita gatigati wa ekyaro kiyo, bhakahika ahasi hanú haaringa na omuti omunene gwa omurembe gunú guringi More, haangʼi na omugi gwa Shekemu. Eribhaga riyo, Abhakanaani mbo bhaaringa abhamenyi bha mukyaro kiyo.
7 Nho, OMUKURU akamwibhukira Abhuramu, akamukeerya ega, “Ekyaro kinu, ndikihaana orwibhuro rwaho.” Abhuramu hanú yeegwa ego, akahagaajira OMUKURU ahasi ha okumwensera ahasi hayo, kwa okubha yaamwibhukira.
8 Kimwi Abhuramu akarwa eyo, akabhata egimbaara gya eginkuku, bhuturira-ryubha rwa mumugi gwa Bheteri. Akatuura eyo eribhuru ryaye, orubhaara rwa bhusikirira-ryubha rwa omugi gwa Ayi. Hayo honse, akamuhagaajira OMUKURU ahasi ha okumwensera, akamusyengera.
9 Kimwi, Abhuramu akagendererya na orugendo okugya taragweta orubhaara rwa Negebhu.
Abhuramu mukyaro kya Misiri
10 Mbe, mukyaro kya Kanaani muyo, ekeebhuka-mo enjara. Kwa okubha enjara iyo yaaringa enduru bhukongʼu, Abhuramu akahiringita okugya mukyaro kya Misiri, okumenya eyo, kwa eribhaga ekego.
11 Hanú yaaringa haangʼi okusoha Misiri, akakeerya omukari waaye Sarai ega, “Oni mmanyiri ega, uuwe m-mukari omujomu bhukongʼu. 12 Abhamisiri hanú bhakakurore, bhakagambe ega, ‘Unu m-mukari waaye!’ Kwa ego, bhakanyite, na uuwe, bhakakutige omuhoru. 13 Bhoono, uuje obhakeerye ega, uuwe m-musubhati waani, naho nkorerwe amajomu kurusumo rwaho, mbe omuhoru.”
14 Mbe, Abhuramu na Sarai, hanú bhaahika Misiri, Abhamisiri bhakamurora Sarai m-mukari omujomu bhukongʼu. 15 Abhaangarariri bha omukama wa Misiria hanú bhaamurora, bhakamugungirya omukama uyo. Kimwi bhakamuhira Sarai munyumba ya omukama. 16 Mbe, omukama akamuserenʼya Abhuramu kurusumo rwa Sarai. Akamuhaana amangʼondi, egingʼombe, egintikiri, egingamia na abhagaya bha ekisaaja na abha ekihara.
17 Nawe, kwa okubha omukama yaaringa amugegeri Sarai omukari wa Abhuramu, OMUKURU akamujibhya bhururu, hamwi na abhantu bhonsego bha iika owaaye. 18 Nho, omukama uyo, akamubhirikira Abhuramu, akamubhuurya ega, “Uuwe! Unkoreeri-ki kinu? Ndeegwa otaankeerya ega, unu m-mukaaho? 19 Kwaki waagamba ega, m-musubhati waaho, kora nkamugega okubha mukaani? Mbe, bhoono gega mukaaho, orwe hanu!”
20 Kimwi omukama uyo, akabhahinda abhantu bhaaye, bhamuheregesye Abhuramu na omukari waaye, hamwi na ebhintu bhyaye bhyonsego.