Ekinsongyo kya Bhabheri
11
Hanú abhantu bhaaringa bhataranyaragana mukyaro, bhonsego bhaahairanga ekigambo kimwi. 2 Hanú abhantu bhaagya orubhaara rwa bhuturira-ryubha, bhakarora ahasi ha orwanjaare mukyaro kya Shinari, bhakamenya hayo.3 Kimwi bhakaragiriranʼya ega, “Ambe, tufyature amatafwari, tugasambe gahye bhujomu.” Kuginsiku giyo, abhantu bhaahagaajira amatafwari na eraami bhakatiga amagina na echokaa. 4 Kimwi bhakagamba ega, “Twihagaajire omugi hamwi na ekinsongyo kinú ensonga yaaye erahika murwire, naho tumanyikane, tutariija okunyaragana mukyaro kyonsego.”
5 Nawe OMUKURU akeetuuma hansi, naho arore omugi na ekinsongyo kinú kyaringa kirahagaajwa na abhantu. 6 Hanú OMUKURU yaabhirora, akagamba ega, “Abhantu bhanu m-bamwi, bharahaira ekigambo kimwi, na emirimu giyo m-bwambiro bhwa ganú bharaakore. Mbe, ritariho eringʼana rinú bhareende okukora, ritige okuturikana. 7 Ambe, twike eyo, tubhasarirye ekigambo kyabho, naho bhateegwirana abheene kwa abheene.”
8 Ego, OMUKURU akabhanyaraganʼya mukyaro kyonsego, bhonse bhakatiga okuhagaaja omugi guyo. 9 Nkyo, kyakora omugi guyo gukabhirikirwa Bhabheri, kwa okubha hayo nho, OMUKURU yaasarirya ekigambo kya ekyaro kyonsego, na okurwa hayo, yaanyaraganʼya abhantu mukyaro kyonsego.
Orwibhuro rwa Shemu
10 Runu ndo orwibhuro rwa Shemu.
Hanú obhusiki bhwa amanji bhwahwa, gikahita emyaka ebhiri, Shemu akeebhura Arufakisadi. Eribhaga riyo, Shemu yaaringa na emyaka egana rimwi. 11 Hanú yaamara okwibhura Arufakisadi, akeekara emyaka magana gataanu, yeebhura abhaana abhandi bha ekimura na abha ekihara.
12 Arufakisadi hanú yaaringa na emyaka mirongo esatu na etaanu, akeebhura Shera. 13 Hanú yaamara okwibhura Shera, akeekara emyaka magana gane na esatu, yeebhura abhaana abhandi bha ekimura na abha ekihara.
14 Shera hanú yaaringa na emyaka mirongo esatu, akeebhura Ebheri. 15 Hanú yaamara okwibhura Ebheri, akeekara emyaka magana gane na esatu, akeebhura abhaana abhandi bha ekimura na abha ekihara.
16 Ebheri hanú yaaringa na emyaka mirongo esatu na ena, akeebhura Peregi. 17 Hanú yaamara okwibhura Peregi, akeekara emyaka magana gane na mirongo esatu, yeebhura abhaana abhandi bha ekimura na bha ekihara.
18 Peregi hanú yaaringa na emyaka mirongo esatu, akeebhura Reu. 19 Hanú yaamara okwibhura Reu, akeekara emyaka magana gabhiri na kenda, yeebhura abhaana abhandi bha ekimura na abha ekihara.
20 Reu hanú yaaringa na emyaka mirongo esatu na ebhiri, akeebhura Serugi. 21 Hanú yaamara okwibhura Serugi, akeekara emyaka magana gabhiri na muhungati, yeebhura abhaana abhandi bha ekimura na abha ekihara.
22 Serugi hanú yaaringa na emyaka mirongo esatu, akeebhura Nahoori. 23 Hanú yaamara okwibhura Nahoori, akeekara emyaka magana gabhiri, yeebhura abhaana abhandi bha ekimura na abha ekihara.
24 Nahoori hanú yaaringa na emyaka mirongo ebhiri na kenda, akeebhura Teera. 25 Hanú yaamara okwibhura Teera, akeekara emyaka egana rimwi na ekumi na kenda, yeebhura abhaana abhandi bha ekimura na abha ekihara.
26 Teera hanú yaahikya emyaka mirongo muhungati, akeebhura Abhuramu, Nahoori na Harani.
Orwibhuro rwa Teera
27 Runu ndo orwibhuro rwa Teera. Teera yeebhura Abhuramu, Nahoori na Harani. Harani wonse akeebhura Ruutu. 28 Harani yaakangatira esewaabho okukwa. Yaakwira mumugi gwa Uru mukyaro kya Abhakaridaayo munú yeebhurirwa. 29 Abhuramu na Nahoori, bhakateta abhakari. Omukari wa Abhuramu yaabhirikirwanga Sarai na omukari wa Nahoori yaabhirikirwanga Mirika, omuhara wa Harani, esewaabho Isika. 30 Sarai yaaringa omugumba, kwa ego ataaringa na abhaana.
31 Teera akagega omwana waaye Abhuramu na omukari waaye Sarai, hamwi na omwijukuru waaye Ruutu, omwana wa Harani. Bhonsego bhakarwa mumugi gwa Uru mukyaro kya Abhakaridaayo, bhakagwata enjira okugya mukyaro kya Kanaani. Nawe, hanú bhaahika mumugi gwa Haraani, bhakamenya eyo. 32 Teera hanú yaahikya emyaka magana gabhiri na gataanu, akakwira Haraani.