Ebhyaro bhinú bhyebhuka kubhaana bha Nuhu
10
Obhusiki bhwa amanji hanú bhwahwa, Shemu, Hamu na Yafeti, abhaana bha Nuhu, bhakeebhura abhaana. Runu ndo orwibhuro rwabho.2 Abhaana bha Yafeti bhaaringa Gomeri, Magogu, Madai, Yabhani, Tubhari, Mesheki na Tirasi. 3 Abhaana bha Gomeri bhaaringa Ashikenaji, Rifati na Togarima. 4 Abhaana bha Yabhani bhaaringa Erisha, Tashishi, Bhakitimu na Abharodanimu. 5 Okurekana na abhaana bha Yabhani bhayo, abhantu bhaanyaragana kumirambo gya enyanja, bhonsego kwa ebhigambo bhyabho na kwa egihamati gyabho, mubhyaro bhyabho.
6 Abhaana bha Hamu bhaaringa Kushi, Misiri, Puti na Kanaani. 7 Abhaana bha Kushi bhaaringa Seebha, Habhira, Sabhuta, Raama na Sabhuteka. Na abhaana bha Raama bhaaringa, Sheebha na Dedani.
8 Kweki, Kushi yeebhura omwana oundi, eriina ryaye Nimurodi. Weeki akabha omuhaari wa eginguru owa okwamba mukyaro. 9 OMUKURU yaamukora okubha omuhaari wa okubhwima egintyenyi. Nkyo kirakora abhantu bharagamba ega, “Omuntu unu n-kya Nimurodi, unú OMUKURU yaakora okubha omubhwimi omuhaari wa egintyenyi.” 10 Emigi ginú yaambira obhukama bhwaye gyaringa Bhabheri, Ereki, Akadi na Karine, mukyaro kya Shinari.a 11 Okurwa mukyaro kiyo, Nimurodi akangʼanyira mukyaro kya Ashuru, akahagaaja emigi gya Ninaawi, Rehobhoti-Iri, Kara, 12 na Reseni. Reseni, nho gatigati ya Ninaawi na omugi omunene gwa Kara.
13 Misiri akeebhura Abharudi, Abhaanamu, Abharehabhi, Abhanafutuhi, 14 Abhakafutori, Abhapaturusi na Abhakasiruhi, bhayo mbo obhusimuka bhwa Abhafirisiti.
15 Kanaani akeebhura omwana waaye omutangi Sidoni, kweki Heeti, 16 na Abhayebhusi, Abhaamoori, Abhagirigashi, 17 Abhahibhi, Abhaariki, Abhasini, 18 Abhaaribhadi, Abhasemaari na Abhahamati. Kubhuteero kweki abhantu bha egihamati gya Abhakanaani bhakabha bhanyarageeni. 19 Ahasi ha ekyaro kyabho haambira Sidoni orubhaara rwa goosi, okubhata Gerari okuhikira Gaja orubhaara rwa taragweta. Kweki okubhata Sodoma, Gomora, Adima, Sebhoimu okuhikira Rasha orubhaara rwa bhuturira-ryubha. 20 Bhayo mbo abhaana bha Hamu, kira abhantu kwa ebhigambo bhyabho na kwa egihamati gyabho, mubhyaro bhyabho.
21 Shemu, omukuru wa Yafeti, ngʼo yaaringa jaaji waabho abhaana bhonsego bha Ebheri. 22 Abhaana bha Shemu bhaaringa Eramu, Ashuru, Arufakisadi, Rudi na Aramu. 23 Abhaana bha Aramu bhaaringa Usi, Huri, Geteri na Mashi. 24 Arufakisadi yaaringa esewaabho Shera, wonse Shera akeebhura Ebheri. 25 Ebheri akeebhura abhaana abhabhiri, omwana waaye omutangi akamutoga Peregi,b kwa okubha, kwibhaga riyo abhantu bha ekyaro bhaanyaragana. Omuhiiri waaye akatogwa Yokitani. 26 Yokitani akeebhura Arimodadi, Sherefu, Hasarimaweti, Yera, 27 Hadoramu, Ujari, Dikira, 28 Obhari, Abhimaeri, Sheebha, 29 Ofiri, Habhira na Yobhabhu. Bhayo bhonsego bhaaringa abhaana bha Yokitani. 30 Ekyaro kinú abhantu bhayo bhonsego bhaaringa bhamenyeri, kyambira munkuku gya Mesha okubhata Sefari munkuku gya bhuturira-ryubha. 31 Bhayo mbo abhaana bha Shemu, kira abhantu kwa ebhigambo bhyabho, na kwa egihamati gyabho, mubhyaro bhyabho.
32 Bhayo mbo oruganda rwa abhaana bha Nuhu, okurekana na orwibhuro rwabho na mubhyaro bhyabho. Obhusiki bhwa amanji hanú bhwahwa, na okurekana na bhayo, abhantu bhaanyaragana na okubha amakabhira mukyaro kyonsego.