Waryubha arakora eriragano na Nuhu
9
Nho, Waryubha akanonka Nuhu na abhaana bhaaye, aragamba ega, “Mwibhurane, mwaruhe, mwijurye ekyaro. 2 Egintyenyi gyonsego gya mukyaro, ebhinyonyi, eginswi gyonsego na bhinú bhireengʼuurira enda, bhirabhenga bhirabhoobhoha, kwa okubha mbiteeri mumabhoko geenyu. 3 Egintyenyi gyonsego eginhoru, giribha ebhyakurya bhwenyu, kya ego naabhahaana emikubhi, bhoono ndabhahaana bhinu bhyonsego. 4 Nawe mutasakya okurya enyama inú amanyinga gakyari-mo, kwa okubha obhuhoru bhwa entyenyi bhuringi mumanyinga. 5 Wowonse unú ariita omurikyaye maheene ndimujibhya. Na kira entyenyi inú eriita omuntu, ndiijibhya. 6 Kira omuntu yaabhumbwa kwa entuubho yaani, ego, wowonse unú ariita omuntu, wonse ariitwa na omuntu. 7 Mbe, na bheenyu mwibhurane, mwaruhe, mubhe abhaaru bhukongʼu, mwijurye ekyaro.”8 Kimwi Waryubha akakeerya Nuhu na abhaana bhaaye ega, 9 “Mwitegeerere! Oni ndakora eriragano na bheenyu na orwibhuro rwenyu runú ruribhabhata-ko, 10 na ebhibhumbwa bhyonsego ebhihoru, ebhinyonyi, egintugo na egintyenyi gya kibhara, gyonsego ginú gyahuruka okurwa muryato, kira ekibhumbwa ekihoru mukyaro. 11 Ndakora eriragano rinu na bheenyu ega, ntarisikya kweki ebhibhumbwa bhyonsego kwa enjira ya obhusiki bhwa amanji. Bhutaribha-ho obhusiki obhundi bhwa amanji, bhunú bhurisikya ekyaro.”
12 Waryubha akagamba kweki ega, “Kinu nkyo ekimanyiiriryo kya eriragano rinú ndakora gati yaani na bheenyu, na kira ekibhumbwa ekihoru kinú kiringi hamwi na bheenyu. Eriragano rinu rirabha kora kunyibhuro gyonsego ginú giribhabhata-ko. 13 Ntuuriri eritaabhasi ryani mumasaaru, ryeki riribha ekimanyiiriryo kya eriragano gati yaani na ebhibhumbwa bhyonsego mukyaro. 14 Eribhaga rinú ndahiingyenga amasaaru eguru wa ekyaro, na eritaabhasi riramaahikana mumasaaru, 15 hayo nho, ndahiitukenga eriragano ryani rinú riringi gati yaani na bheenyu na ebhibhumbwa ebhihoru bhyonsego. Obhusiki bhwa amanji bhutakyaja kweki, okusikya ebhibhumbwa bhyonsego. 16 Mbe, eritaabhasi rya embura riyo, hanú ririmaahikana mumasaaru, nho na oni ndirihiituka eriragano rya koko rinú rirabha gati yaani, na ebhibhumbwa ebhihoru bhya amanga gonsego ga mukyaro.” 17 Waryubha akamariisya kwa okukeerya Nuhu ega, “Kinu nkyo ekimanyiiriryo kya eriragano rinú ntuuriri gati yaani na ebhibhumbwa ebhihoru bhyonsego mukyaro.”
Abhaana bha Nuhu
18 Abhaana bha Nuhu bhanú bhaarwa muryato n-Shemu, Hamu na Yafeti. Hamu ngʼo yaaringa esewaabho Kanaani. 19 Abhaana abhasatu bhayo mbo bhaaringa abhaana bha Nuhu, na okurekana na bhayo abhantu bhaanyaragana mukyaro.
20 Nuhu ngʼo yaaringa omurimi, akabha omuntu wa okwamba okuhamba emijabhibhu. 21 Orusiku rumwi, akanywa edivai, akarehwa. Kimwi akaraara kinaabhi mwibhuru ryaye. 22 Hamu, esewaabho Kanaani, akarora ekinaabhi kya esewaabho, akahuruka kibhara na okukeerya abhamura bhaabho Shemu na Yafeti. 23 Nho, Shemu na Yafeti bhakagega omwenda kwiriko, bhakagya kihuteete, bhakakundikirya esewaabho, enu ameeso gaabho gamaahiriri embarika, kora bhataarora ekinaabhi kya esewaabho.
“Kanaani yeehiimwe!
Ariija okubha omugaya wa insi bhukongʼu kubhahiiri bhaaye.”
26 Akagamba kweki ega,
“Agungibhwe OMUKURU, Waryubha wa Shemu!
Na Kanaani abhe omugaya wa Shemu.
27 Waryubha yoongerye Yafeti erirobha na orwibhuro,
yeekare kwa omurembe gati ya amabhuru ga Shemu.
Na Kanaani abhe omugaya wa Yafeti.”