Okuhwa kwa obhusiki bhwa amanji
8
Kimwi Waryubha akagendererya okumuhiituka Nuhu, egintugo na egintyenyi gyonsego gya kibhara, ginú yaaringa nagyo muryato. Mbe, akatiimura omuyaga mukyaro, amanji gakaamba okusuuha. 2 Ebhisekaani bhya mwirobha munsi bhyaringa bhiribhiri, na embura okurwa mumasaaru yaaringa ekyeri. 3 Amanji gakagendererya okusuuha ngʼorangʼora mukyaro. Kurusiku rwa egana rimwi na mirongo etaanu, 4 orusiku rwa ekumi na muhungati rwa omweri gwa muhungati, eryato rikagobha eguru ya eginkuku gya ekyaro kya Ararati. 5 Amanji gakagendererya okusuuha, okuhikira kumweri gwa ekumi. Orusiku rwa okwamba rwa omweri guyo, ebhisonga bhya eginkuku bhikaamba okurobhoka.6 Eginsiku mirongo ena hanú gyahita, Nuhu akasiikura ekisyeri kinú yaaringa akoreri kuryato. 7 Akahurukya nyamuko kibhara. Nyamuko uyo, akabha areebhururuka eyo na eyo, okuhikira hanú amanji gooma mukyaro. 8 Hanú nyamuko yaatamwa okuhunjuka, Nuhu akahurukya enguuti, naho arore nyoore amanji goomeri mukyaro. 9 Nawe enguuti iyo, ekabhura ahasi ha okwituura, kwa okubha amanji gaaringa gakyatandiri mukyaro kyonsego. Kwa ego, ekahunjuka ku Nuhu. Wonse akeemya okubhoko, akaigega na okuisohya muryato. 10 Nuhu akaganya eginsiku muhungati, akahurukya kweki enguuti irya. 11 Hanú yaahika kumugoroobha, enguuti iyo ekahunjuka, iina eriisya eribhisi rya omujeituni mumunwa. Hayo, Nuhu akamanya ega, amanji gasuuhiri mukyaro. 12 Nuhu akaganya kweki eginsiku muhungati egindi, akahurukya kweki enguuti iyo. Nawe orugendo runu, enguuti etahunjuka kweki.
13 Kurusiku rwa okwamba rwa omweri gwa okwamba, Nuhu hanú yaaringa na emyaka magana gasansabha na ogumwi, amanji gakabha gahweri kukyaro kyonsego. Akaribhura ekihunyo kya kuryato, akarora ekyaro kyonsego kitaana amanji. 14 Orusiku rwa mirongo ebhiri na muhungati, orwa omweri gwa kabhiri, ekyaro kyonsego kikabha kyomeri chwe. 15 Nho, Waryubha akakeerya Nuhu ega, 16 “Nuurwe muryato, uuwe hamwi na mukaaho, abhaana bhaaho na abhakari bhaabho. 17 Ohurukye kibhara ebhibhumbwa bhyonsego bhinú mwaringa nabhyo hamwi, ebhinyonyi, egintugo na bhinú bhireengʼuurira enda. Bhyonsego bhiibhurane, bhyaruhe na okwijura mukyaro.”
18 Mbe, Nuhu akarwa muryato, hamwi na omukari waaye, abhaana bhaaye na abhakari bhaabho. 19 Ebhibhumbwa bhyonsego bhikahuruka muryato, egintugo, ebhinyonyi, na bhinú bhireengʼuurira enda, kira ekimwi kwa amanga gaakyo.
Nuhu araruusirya Waryubha ekimwenso
20 Kimwi Nuhu akahagaajira OMUKURU ahasi ha okumwensera. Akagega egintyenyi egindi eginjomu okuruusya ekimwenso, muntugo na mubhinyonyi, akabhiruusya ekimwenso kya okusikibhwa ku Waryubha. 21 OMUKURU hanú yeegwa obhurangasiru obhujomu bhwa ekimwenso kiyo, akabhujomererwa, akeegambira mumutima gwaye ega, “Ntarihiima ekyaro kweki, kwa ekisigo kya abhantu, onyoora ameetegeerero gaabho m-mabhiibhi okwambira obhwana bhwabho. Ntarisikya kweki ebhibhumbwa ebhihoru bhyonsego kya ego naakora.
22 Kwibhaga rinú ekyaro kikyari-ho,
kuribha-ho na eribhaga rya okuhamba na erya okugesa,
kuribha-ho na eribhaga rya embeho na erya eribhiriira,
kuribha-ho na eribhaga rya eriranga na erya embura,
kuribha-ho na eribhaga rya obhutiku na erya omubhasu.
Amabhaga gayo gonsego, gataryanga okubha-ho.”