Obhusiki bhwa amanji
7
Nuhu hanú yaamara okukora gonsego, OMUKURU akamukeerya ega, “Soha muryato, na abhahiiri bhaaho bha haangʼi bhonsego. Gati ya abhantu bhonsego bha eribhaga rinu, nuuwe omwene nduuji omuheene embere yaani. 2 Osohye egintugo gya amanga gonsego, muhungati muhungati eginjomu okuruusibhwa ekimwenso, eginsaaja na eginkari. Nawe egintugo ginú gitaringi njomu okuruusibhwa ekimwenso, osohye ebhiri ebhiri, eginsaaja na eginkari. 3 Kweki osohye ebhinyonyi amanga gonsego, muhungati muhungati ebhisaaja na ebhikari, obhibhiike bhitame okubha egimbusuro mukyaro. 4 Okwambira bhoono, hanú eginsiku muhungati giraahwe, ndireeta embura mukyaro. Embura iyo, eritwa eginsiku mirongo ena obhutiku na omubhasu. Ebhibhumbwa bhyonsego ebhihoru bhinú naabhumba mukyaro, ndibhisikya.” 5 Nuhu akakora gonsego, kya ego OMUKURU yaaringa amuragiriirye.6 Obhusiki bhwa amanji hanú bhweebhuka mukyaro, Nuhu yaaringa na emyaka magana gasansabha. 7 Kwa ego, Nuhu akasoha muryato na omukari waaye, abhaana bhaaye, na abhakamwana bhaaye, naho bhatasika kwa amanji. 8 Egintyenyi eginjomu gya okuruusibhwa ekimwenso, na ginú gitaringi eginjomu okuruusibhwa ekimwenso, ebhinyonyi na bhyonsego bhinú bhireengʼuurira enda, 9 bhikaaja bhibhiri bhibhiri, ebhikari na ebhisaaja, bhikasoha muryato ku Nuhu, kya ego Waryubha yaaringa amuragiriirye. 10 Eginsiku muhungati hanú gyahwa, amanji ga obhusiki gakaamba okukundikirya ekyaro.
11 Kumwaka gwa erigana rya kasansabha gwa obhumenyi bhwa Nuhu, orusiku rwa ekumi na muhungati rwa omweri gwa kabhiri, obhusiki bhwa amanji bhukahika. Orusiku ruyo, ebhisekaani bhyonsego kora ebhya mwirobha munsi, bhikarwa amanji kwa eginguru. Orwire ronse rukasiikuka, embura enjaru bhukongʼu ekatwa. 12 Embura yaatwa eginsiku mirongo ena, obhutiku na omubhasu.
13 Orusiku runú embura yaamba okutwa, ndo Nuhu, omukari waaye na abhaana bhaabho, Shemu, Hamu, na Yafeti, hamwi na abhakari bhaabho, bhaaringa muryato. 14 Bhaasoha hamwi na amanga gonsego ga egintyenyi gya kibhara, egintugo, ebhinyonyi na bhinú bhireengʼuurira enda. 15 Ebhibhumbwa ebhihoru, bhinú bhyasoha muryato ku Nuhu, bhyaringa bhibhiri bhibhiri. 16 Bhyonsego bhyaringa ekisaaja na ekikari, kya ego Waryubha yaaringa aragiriirye Nuhu. Nho OMUKURU omwene, akamara akamusiikira ekiseku kwa kibhara.
17 Obhusiki bhuyo, bhwaguma mukyaro kwa eribhaga rya eginsiku mirongo ena. Amanji gakagendererya okwaruha, gakeemukya eryato, rikaamba okwereera eguru ya amanji. 18 Amanji gayo, gakagendererya okwijura bhukongʼu, na eryato ekabha erereera eguru ya amanji. 19 Amanji gakaaruha bhukongʼu, okuhikira gakakundikirya eginkuku egintambi gyonsego mukyaro. 20 Amanji hanú gaaruha bhukongʼu, gakakira eginkuku kwa obhutambi bhwa amakubha muhungati na etuugati, okugya eguru.
21 Kira ekibhumbwa kinú kyaringa kiragenda mukyaro, kyasika, ebhinyonyi, egintugo, egintyenyi gya kibhara, bhinú bhireengʼuurira enda na abhantu bhonsego. 22 Ego, ebhibhumbwa bhyonsego bhinú bhyaringa bhiraheejera mukyaro, bhyakwa. 23 Waryubha yaasikya kira ekintu kinú kyaringa ekihoru mukyaro, abhantu, egintugo, kira bhinú bhireengʼuurira enda na ebhinyonyi. Akatama Nuhu na abhahiiri bhaaye bharya, hamwi na bhinú yaasoha nabhyo muryato, ebhyenego. 24 Obhusiki bhwa amanji bhuyo, bhwagendererya okukundikirya ekyaro, kwa eribhaga rya eginsiku egana rimwi na mirongo etaanu.