Waryubha arasurumbara kwa obhwaru bhwa obhusarya bhwa abhantu
6
Abhantu hanú bhaamba okwaruha mukyaro na abhaana bha ekikari bheebhurwa kubheeki, 2 abhaana bha Waryubhaa bhakarora ega, abhahara bha abhantu bhayo m-bajomu, bhakateta wowonse unú bheendanga bhabhe abhakari bhaabho.3 Nho, OMUKURU akagamba ega, “Omwika gwani gwa obhuhoru gutariikara kumubhiri gwa omuntu koko, kwa okubha weeki ngʼ-wa okukwa. Kwa ego, emyaka gyaye gya okumenya, gitaryambuka egana rimwi na mirongo ebhiri.”
4 Kuginsiku giyo na eribhaga erindi, amantu gaaringa mukyaro. Amantu gayo, gaabhirikirwanga ega, Abhanefiri. Abhaana bha Waryubha bhakeebhura na abhaana bha abhantu bhayo. Na bhanú bheebhurwa bhaaringa abhahaari, na abhantu bhanú bhaamanyikana kuginsiku gya akare giyo.
5 OMUKURU akarora ega, obhusarya bhwa abhantu bhwaruhiri bhukongʼu mukyaro, abhantu bhaaringa na ameetegeerero ga obhusarya, eginsiku gyonsego. 6 Akasurumbara kwa okubhumba omuntu mukyaro, na yaaringa arajimibhwa bhukongʼu mumutima gwaye, 7 akagamba ega, “Ndisikya abhantu bhanú naabhumba mukyaro, ndisikya egintugo, egintyenyi gya kibhara, na ginú gireengʼuurira enda, na ebhinyonyi. Ndehiitya ega, kwaki naabhibhumba.” 8 Nawe, Nuhu, ngʼo yeekiriribhwa na OMUKURU.
Waryubha aramukeerya Nuhu akore eryato
9 Rinu ndyo erigano rya Nuhu na orwibhuro rwaye. Nuhu yaaringa omuheene, yaaringa omuntu unú atakusuuhirwa gati ya abhantu bhonsego bha eribhaga ryaye, yeekarananga bhwaheene na Waryubha. 10 Nuhu yaaringa na abhaana abhasatu bha ekimura, Shemu, Hamu na Yafeti.
11 Kwibhaga riyo, ekyaro kikabha kiijwiri obhusarya, na kikabhiihira Waryubha. 12 Waryubha akarora kya ego ekyaro kyaringa kibhiihiri, yaaroranga ega, kira omuntu yaaroobhanga na enjira yaaye embiibhi. 13 Nho, Waryubha akakeerya Nuhu ega, “Namwiri okusikya abhantu bhonsego, kwa okubha bheejwirye obhusarya mukyaro. Maheene ndibhajibhya hamwi na ekyaro! 14 Bhoono, wikorere eryato rya omuti gunú gurabhirikirwa ega, omubhinje. Muryato muyo, otuure-mo ebhinyumba, na oihake eraami munsi na kibhara. 15 Oikore obhutambi ebhe na amakubha egana rimwi na mirongo esatu na kenda, obhugari bhwaye bhubhe, amakubha mirongo ebhiri na etaanu, na obhwima bhwaye okugya eguru, bhubhe amakubha ekumi na etaanu. 16 Eryato riyo, orikore ribhe na amarongo gasatu, erya insi, erya gati na erya eguru. Orubhaara orumwi, orutuurire ekiseku, okituurire orusara, kimwi otige omweya gwa obhutambi bhwa okubhoko okumwi gubhe gati ya orusara na erirongo.
17 “Maheene, ndireeta obhusiki bhwa amanji, naho nsikye kira ekibhumbwa ekihoru. Ebhibhumbwa bhyonsego mukyaro bhirisikibhwa. 18 Nawe, ndikora eriragano ryani na uuwe.b Orisoha muryato, hamwi na mukaaho, abhaana bhaaho na abhakari bhaabho. 19 Wonse oriija okusohya amanga gonsego ga ebhibhumbwa ebhihoru, bhibhiri bhibhiri, ekisaaja na ekikari, naho obhyangarire hamwi na uuwe. 20 Ego, amanga gonsego ga ebhinyonyi, egintyenyi, na bhinú bhireengʼuurira enda, bhyonsego bhirikuseeta bhibhiri bhibhiri, mubhisohye naho obhyangarire. 21 Ogege ebhyakurya amanga gonsego, bhibhe ekibhumbiko kyenyu na egintyenyi gyonsego.” 22 Mbe, Nuhu akakora gonsego kya ego Waryubha yaaringa amuragiriirye.