Orwibhuro rwa Adamu
5
1-2 Eribhaga rinú Waryubha yaabhumba abhantu, yaabhabhumba kwa entuubho yaaye. Yaabhumba omusaaja na omukari, kimwi akabhanonka, akabhatoga, “Abhantu.” Runu ndo orwibhuro rwa Adamu.3 Adamu hanú yaahikya emyaka egana rimwi na mirongo esatu, akeebhura omwana unú yaaringa atuubheeni nawe, akamutoga, Seeti. 4 Hanú yaamara okumwibhura Seeti, akeekara emyaka egindi, magana munaane. Kumyaka giyo, yeebhura abhaana abhandi bha ekimura na abha ekihara. 5 Hanú yaahikya emyaka magana kenda na mirongo esatu, akakwa.
6 Seeti hanú yaahikya emyaka egana rimwi na etaanu, akeebhura Enoshi. 7 Hanú yaamara okwibhura Enoshi, akeekara emyaka egindi, magana munaane na muhungati. Kumyaka giyo, yeebhura abhaana abhandi bha ekimura na abha ekihara. 8 Seeti hanú yaahikya emyaka magana kenda na ekumi na ebhiri, akakwa.
9 Enoshi hanú yaahikya emyaka mirongo kenda, akeebhura Kenani. 10 Hanú yaamara okwibhura Kenani, akeekara emyaka egindi, magana munaane na ekumi na etaanu. Kumyaka giyo, yeebhura abhaana abhandi bha ekimura na abha ekihara. 11 Enoshi hanú yaahikya emyaka magana kenda na etaanu, akakwa.
12 Kenani hanú yaahikya emyaka mirongo muhungati, akeebhura Maharareri. 13 Hanú yaamara okwibhura Maharareri, akeekara emyaka egindi, magana munaane na mirongo ena. Kumyaka giyo, yeebhura abhaana abhandi bha ekimura na abha ekihara. 14 Kenani hanú yaahikya emyaka magana kenda na ekumi, akakwa.
15 Maharareri hanú yaahikya emyaka mirongo esansabha na etaanu, akeebhura Yaredi. 16 Hanú yaamara okwibhura Yaredi, akeekara emyaka egindi, magana munaane na mirongo esatu. Kumyaka giyo, yeebhura abhaana abhandi bha ekimura na abha ekihara. 17 Maharareri hanú yaahikya emyaka magana munaane na mirongo kenda na etaanu, akakwa.
18 Yaredi hanú yaahikya emyaka egana rimwi na mirongo esansabha na ebhiri, akeebhura Enoki. 19 Hanú yaamara okwibhura Enoki, akeekara emyaka egindi, magana munaane. Kumyaka giyo, yeebhura abhaana abhandi bha ekimura na abha ekihara. 20 Yaredi hanú yaahikya emyaka magana kenda na mirongo esansabha na ebhiri, akakwa.
21 Enoki hanú yaahikya emyaka mirongo esansabha na etaanu, akeebhura Metuseera. 22 Hanú yaamara okwibhura Metuseera, Enoki yeekara emyaka magana gasatu, yeekarananga bhwaheene na Waryubha. Kumyaka giyo, yeebhura abhaana abhandi bha ekimura na abha ekihara. 23 Yeekara emyaka magana gasatu na mirongo esansabha na etaanu. 24 Enoki yeekarananga bhwaheene na Waryubha. Kimwi akabhura, kwa okubha yaagegwa na Waryubha.
25 Metuseera hanú yaahikya emyaka egana rimwi na mirongo munaane na muhungati, akeebhura Rameki. 26 Hanú yaamara okwibhura Rameki, akeekara emyaka egindi, magana muhungati mirongo munaane na ebhiri. Kumyaka giyo, yeebhura abhaana abhandi bha ekimura na abha ekihara. 27 Metuseera hanú yaahikya emyaka magana kenda na mirongo esansabha na kenda, akakwa.
28 Rameki hanú yaahikya emyaka egana rimwi na mirongo munaane na ebhiri, akeebhura omwana wa ekimura, 29 akamutoga Nuhu. Akagamba ega, “Omwana unu, ngʼo aribhanga aratuhorisyanga kumirimu gyetu emikongʼu ginú turakora kwa amabhoko geetu, kwirobha rinú ryeehiimwa na OMUKURU.” 30 Hanú yaamara okwibhura Nuhu, akeekara emyaka egindi, magana gataanu na mirongo kenda na etaanu. Kumyaka giyo, yeebhura abhaana abhandi, abha ekimura na abha ekihara. 31 Rameki hanú yaahikya emyaka magana muhungati na mirongo muhungati na muhungati, akakwa.
32 Nuhu, hanú yaahikya emyaka magana gataanu, akeebhura Shemu, Hamu na Yafeti.