Kaini na Abheri
4
Adamu akahaana omukari waaye Haawa enda, akeebhura omwana, akatogwa Kaini. Haawa akagamba ega, “Nibhwiri omwana wa ekimura, kwa obhuturo bhwa OMUKURU.” 2 Haawa akagega enda kweki, akeebhura omwana oundi wa ekimura, akatogwa Abheri. Abheri akabha omutugi wa egintugo, na Kaini weeki, yaaringa omurimi.3 Eribhaga hanú ryahita, Kaini akaruusirya OMUKURU esadaaka ya ebhyakurya bhyaye. 4 Abheri wonse, akareeta egintugo gya okwamba okwibhurwa, gyaringa eginure. OMUKURU akeekirirya Abheri na ekimwenso kyaye. 5 Nawe, ataamwikirirya na Kaini na esadaaka yaaye. Kwa ego, Kaini akajima bhukongʼu, na obhusu bhwaye bhukasisinyara.
6 OMUKURU akabhuurya Kaini ega, “Kwaki ojimiri ego? Na kwaki obhusu bhwaho bhusisinyeeri? 7 Hanú oraakore bhujomu, oreekiriribhwa. Nawe, hanú oratamwe okukora bhujomu, obhusarya bhurakusuntarira haangʼi, bhurakwigomba. Nawe oreenderwa obhuhige.”
8 Kimwi, Kaini akakeerya omuke waaye Abheri ega, [“Tugende mumugunda.”] Hanú bhaaringa mumugunda, Kaini akatema omuke waaye, akamwita.
9 Kimwi, OMUKURU akabhuurya Kaini ega, “Omuke waaho Abheri aringi-ha?” Kaini akamukyukya ega, “Ntakumanya, oni ntaringi omwangarariri wa omuke waani!”
10 OMUKURU akagamba ega, “Niki kinu okoreri? Amanyinga ga omuke waaho, garankuurira okurwa mwirobha. 11 Mbe bhoono, uuwe wihiimirwe! Otakyarima kweki erirobha rinú ryanywa amanyinga ga omuke waaho, unú weeta. 12 Hanú oririma erirobha riyo, ritarikuhaana ebhyakurya. Oribhanga omwereeri unú otaribha na emenyo mukyaro.”
13 Kaini akakeerya OMUKURU ega, “Obhujibhu bhunú ungʼeeri m-burito bhukongʼu, ntakubhunagya! 14 Maaha, reero unkenyerye okurwa mukyaro kya erigesa, na nibhise hare na uuwe. Ndibha omuntu wa okwereera mukyaro, na kira omuntu unú arindora, aritura okunyita.”
15 OMUKURU akakyukya ega, “Tiigo-ha, omuntu wowonse unú arikwita, aririhibhwa ekisiiyomba mara muhungati.” Nho, OMUKURU akatema Kaini orubhaaso, naho omuntu wowonse unú arimurora, atamwita.
16 Kimwi, Kaini akarwa embere ya OMUKURU, akagya okwikara mukyaro kya Nodi,a orubhaara wa bhuturira-ryubha rwa Edeni.
Orwibhuro rwa Kaini
17 Kaini akaraara na omukari waaye, wonse akagega enda, akeebhura omwana, akamutoga Enoki. Kimwi, Kaini akahagaaja omugi, akagubhirikira Enoki, eriina rya omwana waaye.
18 Enoki, akeebhura Iradi, Iradi wonse akeebhura Mehuyaeri.
Mehuyaeri, akeebhura Metushaeri, Metushaeri wonse akeebhura Rameki.
19 Rameki akateta abhakari abhabhiri, oumwi yaabhirikirwanga Ada, na oundi Siira. 20 Ada akeebhura Yabhari, na ngʼo esewaabho abhantu bhanú bhaaringa bhamenyeri mumabhuru na okutuga egintugo. 21 Omumura waabho Yubhari, ngʼo yaaringa esewaabho abhatemi bha ekironge na encheche. 22 Siira wonse, akeebhura Tubhari-Kaini, uyo ngʼo yaaringa omuturi wa ebhintu bhya okubhuturira egishaba na ebhyuma. Omuhara waabho Tubhari-Kaini yaabhirikirwanga Naama.
23 Rameki akakeerya abhakari bhaaye ega,
“Bheenyu Ada na Siira, munyitegeerere!
Abhakari bhaani, mwitegeerere amangʼana gaani.
Oni neeta omuntu kwa okubha yaankorera ekironda.
Neeta omumura uyo, kwa okubha yaanyahaara.
24 Nyoore Kaini aririhibhwa ekisiiyomba mara muhungati,
mbe kuoni eribha mara mirongo muhungati na muhungati!”
Okwibhurwa kwa Seeti na Enoshi
25 Adamu akaraara na omukari waaye, wonse akagega enda, akeebhura omwana wa ekimura, akamutoga Seeti. Akagamba ega, “Waryubha yanonkeri, kwa okungʼaana omwana oundi, kumweya gwa Abheri, unú Kaini yeeta.” 26 Seeti hanú yakiina, wonse akeebhura omwana wa ekimura, akamutoga Enoshi.
Okwambira hayo, nho abhantu bhaamba okusyengera kwa eriina rya OMUKURU.