Adamu na Haawa bharakora obhusarya
3
Kugintyenyi gya kibhara gyonsego ginú OMUKURU Waryubha yaabhumba, enjoka ngʼyo yaaringa engʼeeni okukira egindi. Orusiku rumwi, enjoka ekabhuurya omukari, “Ega, maheene Waryubha yaagamba ega, ‘Mutariija okurya emisumo gya emiti gyonsego ginú giringi mumugunda’?”2 Omukari akaikyukya ega, “Tiigo-ha, emisumo gya kumiti gya mumugunda, tureekiriribhwa okugarya. 3 Nawe, emisumo gya kumuti gwa gatigati ya omugunda, Waryubha yaagamba ega, ‘Mutariija okugarya kora okugakunʼya. Hanú murigakunʼya na okugarya, murikwa!’”
4 Nho, enjoka ekakeerya omukari uyo ega, “Maheene mutarikwa! 5 Waryubha yaagamba ego, kwa okubha amanyiri ega, hanú murirya emisumo gya omuti guyo, murinyoora obhungʼeeni na muribha kya omwene, murimanya amajomu na amabhiibhi.”
6 Omukari uyo, hanú yaarora ega, erisumo rya omuti guyo ni-rijomu okuriibhwa na rirajoma okurimaaha, gonse gukaamureeteeri egintungwa, akatwa akarya. Kimwi akahaana-ko omusaaja waaye, wonse akarya. 7 Hayo, bhakanyoora obhungʼeeni bhwa okumanya amajomu na amabhiibhi, bhakeemanya ega, bhonsego bharingi kinaabhi. Nho, bhakatwa amasya bhakagatuma, bhakeekorera emyenda, bhakeebhoha mubhukende.
8 Hanú yaahika mugoroobha eribhiriira risuuhiri, bhakeegwa emikindo gya OMUKURU Waryubha, aragenda mumugunda. Hanú bhaamwigwa, bhakeebhisa gatigati ya emiti gya mumugunda guyo, naho atabharora.
9 Nawe, OMUKURU Waryubha akabhirikira ega, “Adamu, oringi-ha?”
10 Wonse akamukyukya ega, “Nigwiri emikindo gyaho oragenda mumugunda, noobhoha, kwa okubha ndingi kinaabhi, ego neebhisa.”
11 OMUKURU Waryubha akamubhuurya ega, “Niwi akukeererye ega, oringi kinaabhi? Kasi oriiri emisumo gya omuti gunú naakukanʼya otarya?”
12 Adamu akamukyukya ega, “Omukari unú waangʼaana abhe hamwi na oni, ngʼo yangʼeeri erisumo rya omuti guyo, naarya.”
13 Nho, OMUKURU Waryubha akabhuurya omukari uyo ega, “Uuwe! Unkoreeri-ki kinu?” Wonse akamukyukya ega, “Enjoka ngʼyo ingʼenereerye naarya.”
Ameehiimo ga Waryubha eguru ya obhusarya
14 Kimwi, OMUKURU Waryubha akakeerya enjoka ega,
“Kwa okubha okoreri ego,
nkwihiimiri uuwe omwene
gati ya egintugo gyonsego na egintyenyi gya kibhara gyonsego.
Oraabhenga oreengʼuurira enda,
na oraabhenga orarya oruteeri,
eginsiku gyonsego gya obhuhoru bhwaho.
15 Ndatuura obhusigu gati yaaho na omukari uyo,
na gati ya orwibhuro rwaho na orwaye.
Orwibhuro ruyo, bharaabhenga bharakubhondora omutwe,
na uuwe, oraabhenga orabharuma ekisugururo.”
16 Kimwi akakeerya omukari uyo ega,
“Ndakoongerya obhusungu, eribhaga rya okwibhura.
Oraabhenga oreebhura kwa obhururu.
Enamba yaaho, eraabhenga kumusaaja waaho,a
nawe, weeki araabhenga arakutunga.”
17 Kimwi, akakeerya Adamu ega,
“Kwa okubha wigwiri amangʼana ga mukaaho,
na okarya emisumo gya omuti gunú naakukanʼya ega, otariija okurya,
erirobha rihiimirwe kurusumo rwaho.
Oraabhenga oranyoora ebhyakurya kwa okukora emirimu emikongʼu,
eginsiku gyonsego gya obhuhoru bhwaho.
18 Erirobha ririkwibhurira emichongoma na amahwa,
kora ego oribhanga orarya emikubhi.
19 Oraabhenga oranyoora ebhyakurya kwa ebhigeri,
okuhikira hanú orihunjuka mwirobha,
kwa okubha, muyo mmo waaruusibhwa.
Uuwe n-duteeri,
na muruteeri, orihunjuka kweki.”
20 Kimwi, Adamub akatoga omukari waaye ega, Haawa,c kwa okubha, ngʼo ngʼina waabho abhahoru bhonsego. 21 OMUKURU Waryubha, akakorera Adamu na omukari waaye emyenda gya amaseero, akabheebhohya.
Adamu na Haawa bharakenyibhwa mumugunda
22 Kimwi, OMUKURU Waryubha akagamba ega, “Bhoono, omuntu unu abheeri kya oumwi weetu, amanyiri amajomu na amabhiibhi. Bhoono mmuribhire, atariija okurya emisumo gya omuti gwa okuhaana abhantu obhuhoru gonse, kwa okubha hanú araarye, arabha omuhoru koko.” 23 Kwa ego, OMUKURU Waryubha, akabhakenyia okurwa mumugunda gwa Edeni, naho Adamu agye okurima kwirobha rinú yaaruusibhwa-mo. 24 Hanú yaamara okubhakenyia, akatuura amakerubhid orubhaara rwa bhuturira-ryubha rwa omugunda gwa Edeni, bharingi na omuhyu gwa omururo, gunú gweekyukyanga mbaara gyonsego, okwiyangararira enjira ya okugya kumuti gwa okuhaana abhantu obhuhoru.