2
Ego niigo, orwire na ekyaro na bhyonsego bhinú bhirimo, bhyabhumbwa bhikabha.2 Orusiku rwa muhungati, Waryubha akabha amariri emirimu gyaye gyonsego gya obhubhumbi, akatiga.3 Akarunonka orusiku rwa muhungati na okurukora okubha orukuru, kwa okubha, orusiku ruyo yaatiga emirimu gyaye gya obhubhumbi.
Omugunda gwa Edeni
4 Rinu ndyo erigano rya okubhumbwa kwa ekyaro na orwire.
OMUKURU Waryubha hanú yaabhumba ekyaro na orwire, 5 ebhiimerya bhyonsego bhyaringa bhitarabha-ho, kora emikubhi gyaringa gitarabha kukyaro, kwa okubha, kuginsiku giyo OMUKURU Waryubha yaaringa atarakora embura etwe kukyaro, na ataaringa-ho omuntu wa okurima erirobha. 6 Nawe amanji gakeebhuka kwirobha okurwa hansi, gakabha garajejya erirobha ryonsego. 7 Mbe, OMUKURU Waryubha akabhumba omuntu, kwa oruteeri rwa erirobha, akamuhutira omwika gwa obhuhoru mumyongo, omuntu uyo, akabha omuhoru.
8 Kimwi, OMUKURU Waryubha akahamba omugunda orubhaara rwa bhuturira-ryubha Edeni eyo. Akatuura-mo omuntu unú yaaringa abhumbiri, 9 na muyo, akamerya emiti gya amanga gonsego. Na emiti giyo, gyaringa girajomera okugimaaha, na gyaringa giraruusya emisumo emijomu okuriibhwa. Gatigati ya omugunda guyo, gwaringa-ho omuti gwa okuhaana abhantu obhuhoru, na omuti gwa okumanya amajomu na amabhiibhi.
10 Edeni hayo, haaringa na oruuji runú rwageryanga amanji na okwitirira omugunda. Okwambira hayo, rukataana gikabha eginyuji ena. 11 Oruuji rwa okwamba rwabhirikirwanga Pishoni, ndo rureenaara ekyaro kya Habhira kyonsego. Ekyaro kiyo, kyaringa na egijahaabhu, 12 na egijahaabhu gya muyo ni-njomu. Kweki kyaringa na amaguta ga okurangasira ganú gaabhirikirwanga ega, Bhedora, na amagina amajomu ganú gaabhirikirwanga ega, Shohamu. 13 Oruuji rwa kabhiri rurabhirikirwa Gihoni, ndo rureenaara ekyaro kyonsego kya Kushi. 14 Oruuji rwa kasatu rurabhirikirwa Tigirisi, ndo ruragerya amanji orubhaara rwa bhuturira-ryubha rwa ekyaro kya Ashuru. Na oruuji rwa kane rurabhirikirwa Efurate.
15 OMUKURU Waryubha hanú yaatuura omuntu mumugunda muyo, yaamutuura-mo naho agurime na okugwangararira. 16 OMUKURU Waryubha akamuragirirya ega, “Oreekiriribhwa okurya emisumo gya emiti gyonsego, mumugunda munu. 17 Nawe, otariija okurya emisumo gya omuti gwa okumanya amajomu na amabhiibhi, kwa okubha hanú orirya emisumo gya omuti guyo, maheene orikwa.”
18 Kimwi, OMUKURU Waryubha akagamba ega, “Etaringi bhujomu, omuntu unu yeekare omwene, ndimukorera omuntu wa okumubheera unú amutuubheeni.” 19 Mbe, OMUKURU Waryubha akabhumba kwa obhutoto, egintyenyi gyonsego gya kibhara, na ebhinyonyi bhyonsego. Nho akareetera Adamu, naho arore amariina ganú araabhitoge. Na kira ekibhumbwa ekihoru, eriina rinú Adamu yaakitoga, ndyo rikabha eriina ryakyo. 20 Ego, egintugo gyonsego, egintyenyi gya kibhara, na ebhinyonyi bhyonsego, Adamu yaabhitoga amariina. Nawe, ataamaahikana wa okumubheera unú areenderwa.
21 Kwa ego, OMUKURU Waryubha akareetera Adamu egintiro egindito, wonse akaraara. Kimwi, OMUKURU Waryubha, akamuruusya orubharu rwaye orumwi, akamara akaribha na enyama ahasi harya yaaruusya orubharu. 22 Orubharu runú yaaruusya ku Adamu, akarukora okubha omukari. Kimwi, akareeta omukari uyo ku Adamu. 23 Nho, Adamu akagamba ega, “Bhoono, unu ni-riguha okurwa kumaguha gaani, na ni-nyama okurwa kunyama yaani! Aribhanga arabhirikirwa ‘Omukari,’ kwa okubha aruusiibhwe kumusaaja.” 24 Kwa ego, omusaaja aribhanga aratiga esewaabho na ngʼina waabho, arisoorana na omukari waaye, bhonse bharibha omubhiri gumwi.
25 Adamu na omukari waaye bhaaringa kinaabhi, nawe, bhataaroranga eginsoni.