Ekitabho kya Obhwambiro
Okubhumbwa kwa ekyaro na orwire
1
Kubhwambiro hayo, Waryubha yaabhumba ekyaro na orwire. 2 Kwibhaga riyo, ekyaro kitaaringa na ekintu, na kitaaringa na entuubho yoyonse. Eguru ya ekyaro, amanji gaaringa-ko, na eguru ya amanji ekisunte kyaringa kikundikiirye, na Omutima wa Waryubha yaaringa atandariri eguru ya amanji.3 Kimwi, Waryubha akagamba ega, “Obhurabhu bhubhe-ho.” Obhurabhu bhukabha-ho. 4 Waryubha akarora ega, obhurabhu bhuyo m-bujomu. Kwa ego, akaahukanʼya obhurabhu na ekisunte. 5 Nho obhurabhu akabhubhirikira “Omubhasu,” na ekisunte akakibhirikira “Obhutiku.” Ekabha mugoroobha, ekabha nyenkyo, orusiku rwa okwamba.
6 Kimwi, Waryubha akagamba ega, “Habhe na omweya gati ya amanji, gwahukanʼye amanji ga eguru ya orwire na aga insi ya orwire.” 7 Kwa ego, yaabhumba omweya guyo, gukaahukanʼya amanji ga eguru ya orwire, na aga insi ya orwire, ekabha ego. 8 Akabhirikira omweya guyo ega, “Orwire.” Ekabha mugoroobha, ekabha nyenkyo, orusiku rwa kabhiri.
9 Kimwi, Waryubha akagamba ega, “Amanji ganú garingi insi ya orwire, geekumanʼye hamwi, naho ahasi ahomu harobhoke.” Ekabha ego. 10 Ahasi ahomu hayo, akahabhirikira ega, “Ekyaro.” Na ahasi hanú amanji geekumanʼya, akahabhirikira ega, “Enyanja.” Waryubha akarora ega, m-bwaheene.
11 Kimwi, Waryubha akagamba ega, “Kukyaro kuyo, bhimere-ko ebhiimerya bhya egimbusuro amanga gonsego, na emiti gya emisumo ginú giina egimbusuro.” Ekabha ego. 12 Ebhiimerya bhya egimbusuro amanga gonsego, na emiti gya emisumo ginú giina egimbusuro amanga gonsego, bhikamera kukyaro. Waryubha akarora ega, m-bwaheene. 13 Ekabha mugoroobha, ekabha nyenkyo, orusiku rwa kasatu.
14 Kimwi, Waryubha akagamba ega, “Habhe-ho na obhurabhu murwire, obhurabhu bhuyo bhwahukanʼye omubhasu na obhutiku, bhubhe bhuroorokya eribhaga, eginsiku na emyaka. 15 Obhurabhu bhuyo, bhubhe murwire, bhubhare kukyaro.” Ekabha ego. 16 Kwa ego, yaakora obhurabhu obhunene amanga gabhiri, eryubha ribhare omubhasu, na omweri gubhare obhutiku, akakora na eginjota. 17 Akabhituura murwire, bhibhenga bhirabhara kukyaro, 18 bhiture okubhara omubhasu na obhutiku, bhibhenga bhiraahukanʼya obhurabhu na ekisunte. Waryubha akarora ega, m-bwaheene. 19 Ekabha mugoroobha, ekabha nyenkyo, orusiku rwa kane.
20 Kimwi, Waryubha akagamba ega, “Amanji geejuribhwe na ebhibhumbwa ebhihoru, na ebhinyonyi bhibhenga bhireebhururuka eguru kurwire.” 21 Kwa ego, akabhumba eginswi eginene,a na ebhibhumbwa ebhindi ebhihoru okuringʼaana na amanga gaabhyo, bhikabha bhireerema na okwijura mumanji. Na akabhumba ebhinyonyi, okuringʼaana na amanga gaabhyo. Waryubha akarora ega, m-bwaheene.
22 Waryubha akabhinonka aragamba ega, “Mwibhurane mwaruhe, mwijurye amanji ga enyanja, na ebhinyonyi bhyaruhe kukyaro.” 23 Ekabha mugoroobha, ekabha nyenkyo, orusiku rwa kataanu.
24 Kimwi, Waryubha akagamba ega, “Ekyaro kiruusye ebhibhumbwa ebhihoru okuringʼaana na amanga gaabhyo, egintugo, egintyenyi ginú gireengʼuurira enda, na egintyenyi gya kibhara, kira entyenyi okuringʼaana na amanga gaaye.” Ekabha ego. 25 Kwa ego, Waryubha yaabhumba egintyenyi gyonsego okuringʼaana na amanga gaabho, egya kibhara, egintugo, na ginú gireengʼuurira enda. Waryubha akarora ega, m-bwaheene.
26 Kimwi, Waryubha akagamba ega, “Tubhumbe omuntu kwa entuubho yeetu, atuubhane na bheetu. Atunge eginswi, ebhinyonyi, egintugo, ekyaro kyonsego, na kira kinú kireengʼuurira enda, eguru ya ekyaro.” 27 Kwa ego, Waryubha yaabhumba omuntu kwa entuubho yaaye, kwa entuubho ya Waryubha, yaabhumba omusaaja na omukari. 28 Akabhanonka aragamba ega, “Mwibhurane mwaruhe, mwijurye ekyaro na okukitunga. Mutunge eginswi, ebhinyonyi na kira ekibhumbwa ekihoru, kinú kiragenda kukyaro.”
29 Kimwi, Waryubha akagamba ega, “Mwitegeerere, ndabhahaana kira ekiimerya kukyaro kyonsego, kinú kiraruusya egimbusuro, hamwi na emiti ginú emisumo gyaye giraruusya egimbusuro. Bhiyo bhiribha ebhyakurya bhyenyu. 30 Kweki egintyenyi gyonsego gya mukyaro, na ebhinyonyi bhyonsego bhya kurwire, ebhibhumbwa bhyonsego bhinú bhiragenda eguru ya erirobha, kira ekibhumbwa kya omwika gwa obhuhoru, ndibhihaana amasya ga ebhiimerya bhyonsego, ngo gabhe ebhyakurya bhyabho.” Ekabha ego.
31 Waryubha akarora ega, kira ekintu kinú yaabhumba, n-kijomu bhukongʼu. Ekabha mugoroobha, ekabha nyenkyo, orusiku rwa kasansabha.