Dachi Akõred̶e ijãa nii ʉ̃rʉbena
11
1 Dachiba Dachi Akõred̶e ijãa panuud̶eeba kuitaa panuu chi dachiba esed̶aubadau mau biawãra adaud̶ai. Maud̶e chi dachiba unud̶akau mau b̶uabarii kuitaa panuu. 2 Dachi nabẽraed̶ebenarãba Dachi Akõred̶e ijãa panasiid̶eeba Dachi Akõreba maarã biꞌia unusii.3 Dachiba Dachi Akõred̶e ijãa panuud̶eeba kuitaa panuu Dachi Akõre berrearuuba nau iujãa maud̶e bajãa joma wausii. Maka chi dachiba unud̶akaud̶ebena joma dachiba unubadau wausii.
4 Abelba Dachi Akõred̶e ijãa b̶uasiid̶eeba Cainba dead̶a audeara ne bia b̶uu deasii. Ijãasiid̶eeba ichiba dead̶a Dachi Akõreba biꞌia unuped̶a jarasii ichi jipa nii. Abel biusmina ichiba biawãra ijãa b̶uasiid̶eeba dachimaa wabid̶a kuitaabi b̶uu Dachi Akõred̶e ijãad̶ai panuu.
5 Enocba Dachi Akõred̶e ijãa b̶uasiid̶eeba Dachi Akõreba mau biubiimaaba chokae adoesii. Mau adoesiid̶eeba waya unud̶aabasii. Dachi Akõre bed̶ead̶e b̶ʉ kub̶uu Enoc adooi naed̶e Dachi Akõreba chi mau biꞌia unusii. 6 Maamina chi Dachi Akõred̶e ijãawẽa nii ichiba biꞌia unukau. Chi Dachi Akõremaa neei kʉ̃ria b̶uuba ijãai b̶uu ichi biawãra nii maud̶e joma chi ichi jʉrʉʉduu karibabarii.
7 Dachi Akõreba Noemaa jarasii chi wabid̶a unukau neei ʉ̃rʉbena. Noeba mau ijãasiid̶eeba, Dachi Akõre wapea b̶uasiid̶eeba jãba mechiu wausii ichi ded̶ebenarã karibai baita. Maka nau iujãad̶ebenarãmaa kachiruad̶e duanuu unubiasii. Ichiba ijãasiid̶eeba Dachi Akõreba ichi jipa nii unusii.
8 Dachi Akõreba Abrahammaa jarasii ichiba deai jarad̶a druad̶aa wãmera. Abrahamba Dachi Akõred̶e ijãasiid̶eeba samaa wãaruu adua b̶umina ichi drua b̶ʉiped̶a wãsii. 9 Ijãasiid̶eeba ichi Dachi Akõreba deai jarad̶a druad̶e neeped̶a, ãyarebena druad̶ebena need̶a kĩra paru de waud̶ad̶e b̶uabachii. Ichi warr Isaac maud̶e chi ãicheke Jacob ara mau kĩra panabachid̶au, ãchimaa bid̶a mau drua deai jarasiid̶eeba. 10 Abraham maka b̶uabachii, bajãad̶e b̶uu puuru wãꞌãekaud̶aa b̶uad̶e wãi baita kʉ̃ria b̶uasiid̶eeba. Mau puuru Dachi Akõreba ãrea kʉ̃risiaped̶a joma wausii.
11 Abraham chõra b̶uasiid̶e, ichi wẽra Sara warr adauka basmina, Abrahamba ijãasii Dachi Akõreba ichimaa warr unubii b̶uu. Dachi Akõreba jaraaruu maka waubarii ijãasiid̶eeba warr biawãra unusii.a 12 Maka Abraham biuimaa b̶uasmina chi ichid̶ebena ẽbẽrarã ãrea neesid̶au pusterrearã ãrea kĩra maud̶e mar ibu poyaa juasiibai b̶uu kĩra.
13 Joma maarã ẽbẽrarã Dachi Akõred̶e ijãa badaped̶aad̶a biusid̶au. Maamina Dachi Akõreba deai jarad̶a ãchiba nau iujãad̶e adaud̶aabasii. Maamina kuitaasid̶au kaad̶ebena ewarid̶e ichiba joma deai.b Maud̶eeba kĩrajʉʉsid̶au maud̶e arakʉd̶e jarasid̶au nau iujãad̶e ãchi ãyarebena druad̶ebena kĩra duanuu maud̶e ãibena druacha duanuu. 14 Maka jara panuud̶eeba arakʉd̶e kuitaabiasid̶au ãchi drua adaud̶ai baita esed̶au panuu. 15 Ãchi drua wãped̶aad̶ebena mamaa waya wãd̶ai kʉ̃risiaped̶aad̶a basirã poyaa waya wãd̶ai basii. 16 Maamina ãchiba drua aude biꞌiau bajãad̶e b̶uu kʉ̃ria panasid̶au. Maud̶eeba Dachi Akõre kĩra nejasiakau ãchi Akõre aaduud̶e. Maarã baita bajãad̶e puuru wau uru b̶uu.
17-18 Abrahamba biawãra ijãa b̶uu kuitaayua Dachi Akõreba jarasii ichi warr baa deamera. Maamina mau naed̶e Dachi Akõreba ichimaa biawãra naka jarasii: «Bichi warr Isaacd̶eeba bichi ãichekerã ãrea imid̶ai». Dachi Akõreba maka jarasiid̶eeba Abrahamba ichi warr ara ab̶a nii baa deai baita b̶uasii. 19 Abrahamba kʉ̃risiasii ichi warr Isaac bearuubʉrã Dachi Akõreba mau poyaa chokae jiradubii. Biawãra Isaac chokae jiradubisiid̶eeba Abrahamba chi warr chokae uru b̶eesii.
20 Isaacba Dachi Akõred̶e ijãa b̶uasiid̶eeba ichi warrarã Jacob maud̶e Esaú biꞌia jarasii Dachi Akõreba kaad̶ebena ewarid̶e aid̶amera.
21 Jacob biumaa b̶uasiid̶e Dachi Akõred̶e ijãa b̶uasiid̶eeba ichiba José warrarã ab̶aab̶aa biꞌia jarasii Dachi Akõreba aid̶amera. Maabae ichi dumamaa jidau ʉkʉ nub̶uuba Dachi Akõre biꞌia kʉ̃riasii.
22 José biumaa b̶uasiid̶e Dachi Akõred̶e ijãa b̶uasiid̶eeba israeld̶ebenarã Egipto druad̶ebena wãd̶ai asii. Wãaduud̶e ichi b̶ʉʉrʉ Canaán druad̶aa jau b̶ud̶e adoésturu asii.
23 Moisés chi naweba adaud̶a ewarid̶e faraonba israeld̶ebenarã mukĩra warrarã joma kenabiasii. Maamina Moisés akõrerãba Dachi Akõred̶e ijãa panasiid̶eeba chi mauba jarad̶a wapead̶aabasii. Chi naweba Moisés adausiid̶e unusid̶au chi mau warr mipitaa nii. Mau bearãamera jed̶ako õbea miru uru panasid̶au.
24 Moisesba Dachi Akõred̶e ijãa b̶uasiid̶eeba chõra b̶eesiid̶e kʉ̃riawẽa b̶uasii ẽbẽrarãba ichi faraón kau warr ad̶ai. 25 Ichimaarã kachirua wau b̶uud̶eeba kĩrajʉʉ b̶uadaui bad̶amaarã, biꞌia b̶uasii ẽbẽrarã Dachi Akõred̶erã ome ãbua ãrea biꞌiwãe b̶uai. 26 Dachi Akõreba Dachi Karibabarii deai jarad̶a biawãra neei ijãasiid̶eeba, ichiba kʉ̃risiasii Egiptod̶ebena ne bia uru b̶uai audeara biꞌia b̶uu ãrea biꞌiwãe b̶uai.c Kaad̶ebena ewarid̶e deai jarad̶a biꞌia adaui kʉ̃riasiid̶eeba maka kʉ̃risia b̶uasii.
27 Moisesba Dachi Akõred̶e ijãa b̶uasiid̶eeba faraón kĩrubi wapeawẽa Egiptod̶ebena wãsii. Chi Dachi Akõre dachiba unud̶akau unu b̶uu kĩra ichiba ijãa b̶uu ida b̶uubasii.
28 Moisesba Dachi Akõred̶e ijãa b̶uasiid̶eeba israeld̶ebenarãmaa Pascua ewari waubiasii.d Maud̶e decha poraad̶e oa jĩtod̶okabiasii chi beabariiba chi nabena mukĩra warrarã kenarãamera.
29 Dachi Akõred̶e ijãa panasiid̶eeba israeld̶ebenarã Dachi Akõreba Mar Purrd̶e chi o ewad̶a põasãad̶e wãsid̶au. Maamina Egiptod̶ebenarã arab̶au od̶e wãaduud̶e joma ʉ̃yaba jãri kinisid̶au.
30 Dachi Akõred̶e ijãa panasiid̶eeba israeld̶ebenarã 7 ewari Jericó puuru ad̶u purra b̶arisid̶au mau puuru ad̶u mo ka kub̶uad̶a joma ãrisii.
31 Israeld̶ebenarã omeeba Jericó puuru saka b̶uu kuitaai baita ichiad̶e wãsid̶aud̶e wẽra aud̶uabarii Rahaba Dachi Akõred̶e ijãa b̶uasiid̶eeba ãchi biꞌia irsibisii. Maud̶eeba chi mau puurud̶ebena Dachi Akõre ũribabaswãe nuree joma kenasid̶aud̶e chi mau bead̶aabasii.
32 ¿Dachi Akõred̶e ijãabadaurã ʉ̃rʉbena mʉʉba maucha kãare jaraima? Sansón, Gedeón, Barac, Jefté, David, Samuel maud̶e Dachi Akõre baita berreabadaurã ʉ̃rʉbena berreai baita ewari wãꞌãema. 33 Dachi Akõred̶e ijãa panasiid̶eeba chi nureeba drua poyaasid̶au, chi nureeba ãchi drua jipa uru nureasii maud̶e chi nureeba drua nau iujãad̶e Dachi Akõreba deai jarad̶a irsibisid̶au. Dachi Akõred̶e ijãa panasiid̶eeba chi nuree Dachi Akõreba imamamaa ida kobiabasii. 34 Chi nuree Dachi Akõred̶e ijãa panasiid̶eeba tʉbʉ aokoba baad̶aabasii. Chi nuree espadaba bead̶ai bad̶ad̶ebena jĩichoa wãurisid̶au. Chi nuree kakua meserãaswãe nuread̶a meserãa adausid̶au maud̶e chaarea paneesid̶au chĩod̶ai baita. Maud̶eeba chi kĩramaabadaurã jĩichoabiasid̶au.
35 Chi nuree wẽrarãba Dachi Akõred̶e ijãa panasiid̶eeba ãchi ded̶ebenarã biuped̶aad̶a chokae jiradusid̶au. Maamina chi nuree Dachi Akõred̶e ijãa panuu kakua ẽbẽrarãba ãrea sĩd̶aped̶a beasid̶au. Jʉ̃abadau ded̶e jʉ̃a uru panasid̶au, ãrea biꞌiwãe paneebiad̶ai baita. Aria ãchi enad̶ai asid̶au, Dachi Akõred̶e ijãa panuu waya ijãad̶aabai aped̶aad̶a basirã. Maamina ida beabiasid̶au, chokae jiradud̶aped̶a bibuara duanad̶ai esed̶ausid̶aud̶eeba. 36 Chi nuree Dachi Akõred̶e ijãa panuu kakua ẽbẽrarãba atua jarasid̶au, soaba pesid̶au maud̶e kaenaba jʉ̃d̶aped̶a jʉ̃a kub̶usid̶au. 37 Chi nuree mooba b̶ata beasid̶au. Maud̶e waabenarã ẽsa b̶ʉa ʉrratasid̶au. Chi nuree espadaba beasid̶au. Chi nuree de wãꞌãe nureed̶eeba samaa wãd̶ai adua wãsid̶au. Maud̶e ãchiba paru jʉ̃d̶ai baita wãꞌãe basiid̶eeba chivo e maud̶e oeja e waud̶a jʉ̃bachid̶au. Ãchi ne kaebea wãꞌãe nureasii. Ẽbẽrarãba ãchi ãrea biꞌiwãe panabiabachid̶au maud̶e kachirua waubachid̶au. 38 Chi nau iujãad̶ebenarã biꞌia duanad̶aabasii, ãchi baara duanad̶ai baita. Ãchi de wãꞌãe nureed̶eeba drua sirua wãꞌãe b̶uud̶e maud̶e ead̶e nibabachid̶au. Ea chob̶ead̶e maud̶e ioro chob̶ead̶e panabachid̶au.