Jesucristo ʉ̃rʉbena kʉ̃risia panásturu
12
1 Mau ẽbẽrarã ãreaba Dachi Akõred̶e maka biawãra ijãasid̶aud̶eeba, dachia bid̶a ara mau kĩra ijãa panad̶ai panuu. Chi dachimaa ida ijãabikau maud̶e ara dachiba kachirua waubadauba dachi b̶ʉra uru b̶uabarii ãyaa b̶ud̶aped̶a, maabae joma dauchia jãadua panuud̶eeba wã́duru chi need̶ai panuumaa bad̶ai baita. 2 Jesusd̶e kʉ̃risiáduru. Mauba karibasii dachiba naed̶e ijãad̶amera maud̶e aid̶abarii ewaricha ijãa panad̶amera. Kʉ̃risiásturu saka ichi cruzd̶e ãrea biꞌiwãe b̶uasii. Mau kakua kĩra nejasia b̶uai bad̶ad̶e kĩra nejasiabasii. Ichiba kuitaasii nau maad̶akare ãrea kĩrajʉʉ b̶uai. Biawãra Dachi Akõre rey ãkau jua biare akʉ b̶uu.3 Biꞌia kʉ̃risiásturu ẽbẽra kachiruarãba Jesús miadaa wausid̶aud̶e saka dauchia jãaduasii. Maka machi kakua ãkaa panad̶aabasii maud̶e machiba ijãa panuu ida b̶ud̶ai kʉ̃risiad̶aabasii. 4 Machi kachirua ome chĩo panumina wabid̶a machi bead̶awẽa panuu Jesús beaped̶aad̶a kĩra.a 5 Biꞌia ijãad̶amera Dachi Akõre bed̶ea b̶ʉ kub̶uu ¿machiba kʉde uru panuuwãeka? Ichi warrarãmaa naka jarasii:
«Mʉ warr, Dachi Mechiuba iadaaruud̶e mau ʉ̃rʉbena ãrea kʉ̃risiáse. Kĩrabia iadaaaruud̶e kĩra nomaarã́se.
6 Chi Dachi Mechiuba kʉ̃ria b̶uu ẽbẽrarã iadaabarii.
Maud̶e chi ichi warrarã kĩra ua b̶uurãba kachirua wauduud̶e ichiba maarã kĩrabia iadaabarii».
7 Machi Dachi Akõre warrarãd̶eeba, ãrea biꞌiwãe panuu ãwatásturu ichiba mau kakua jipa waubia b̶uud̶eeba. ¿Akõreba chi warr iadaabaika? 8 Dachi Akõreba ichi warrarã joma iadaabarii. Maka wauwẽebʉrã, machi ichi warrarãwãe. 9 Dachi nau iujãad̶ebena akõrerãba dachi iadaabachid̶aud̶eeba dachiba maarã wapeabachid̶au. Mauba ¿ewaricha chokae nuread̶ai baita dachi Bajãad̶ebena Akõre makaa wapead̶aabai panuka? 10 Dachi nau iujãad̶ebena akõrerã chokae panasid̶aud̶e dachi iadaabachid̶au ara ãchiba kʉ̃risia panad̶a kĩra. Maamina Dachi Akõreba maka waubarii ichi kĩra kachiruaswãe biꞌia nuread̶amera. 11 Iadaaduud̶e dachi kĩrajʉʉd̶akau maumaarã kĩra nomaabadau. Maamina maad̶akare chi jipa waud̶ai kuitaaped̶aad̶akare mau maka waubadau maud̶e jirukaraayuwãe nureabadau.
12 Mauburu machi jua ãkaa panumina maud̶e machi õdarr suriidu panuu waya chaareabiaduu kĩra biꞌia ijãa panásturu. 13 O jipaud̶e nibásturu. Maka chi poyaara nuree b̶aed̶aabai, maumaarã biꞌia ijãa panad̶ai.b
Dachi Akõre sõbia ida b̶ud̶aabai b̶uu
14 Jomaurã ome jirukaraayuwãe nureásturu. Maud̶e Dachi Mechiu baita biꞌia panásturu. Dachi Mechiu baita biꞌia nureewãed̶eeba ichi poyaa unud̶aabai. 15 Kauwa panásturu Dachi Akõreba ichi sõbiad̶eeba kariba b̶uu ab̶au bid̶a ida b̶urãad̶amera. Maud̶e kauwa panásturu machi tãed̶e ab̶a bid̶a ne karr kachirua kĩra panarãad̶amera. Mauba ãbarãmaa kachirua kʉ̃risiabiaped̶a ara mau kĩra panabiabarii. 16 Kauwa panásturu machi tãed̶e ab̶a bid̶a chi dachi kakuad̶eeba barikiu kachirua waurãad̶amera maud̶e chi Esaú kĩra Dachi Akõre ʉ̃rʉbena biꞌiwãe kʉ̃risiarãad̶amera. Esaú chi warr imina basiid̶eeba chi akõreba uru b̶uud̶ebena ãrea adaui b̶uasii. Maamina ichi ãbaba chiko b̶es ab̶a kobid̶a kakua, ichiba adooi b̶uad̶a joma ichi ãbamaa deasii. 17 Machiba kuitaa panuu nau maad̶akare Esauba kʉ̃ria b̶uasii chi akõreba ichi ʉ̃rʉbena biꞌia jarai Dachi Akõreba karibamera. Maamina chi akõreba ichi ida b̶usii. Esaú jẽasmina ichiba naed̶e waud̶a poyaa biꞌia b̶uubasii.
18 Machi Dachi Akõremaa neeped̶aad̶a israeld̶ebenarã neeped̶aad̶a kĩra b̶uwãema. Israeld̶ebenarã Sinaí ead̶aa wãurisid̶aud̶e, mau ea ara ãchi dauba unusid̶au.c Maud̶e chi ea baawãmaa b̶uasii, ewari pãriu nub̶eesii maud̶e ãrea pũatu kob̶eesii. 19 Ãchiba kachu jĩwaaruu maud̶e Dachi Akõreba jĩwa berrearuu ũrisid̶au. Mau ũrisid̶aud̶e wapeaba chi chuburia id̶isid̶au Dachi Akõre waa berrearãamera. 20 Ãrea perasid̶au Dachi Akõreba naka jarasiid̶eeba: «Barikiu ẽbẽra maebʉrã ãnimara nau ea kaita neeruubʉrã, mooba b̶ata bead̶ai panuu maebʉrã enadrumaba drʉ bead̶ai panuu».d 21 Israeld̶ebenarãba ichiamaa panuu ãrea kachirua b̶uud̶eeba Moisesba naka jarasii: «Wapeaba mʉ kakua urimaa b̶uu».
22 Maamina machi Dachi Akõremaa neesid̶aud̶e chi biawãra Sión ead̶aa maud̶e chi bajãad̶ebena Jerusalend̶aa neesid̶au. Mau puuru Dachi Akõre chokae niid̶ebʉ. Aria angelerã mil ãrea ãbua kĩrajʉʉ duanuu. 23 Machi Dachi Akõre warrarã araa ãbua duanuumaa neesid̶au. Dachi Akõremaarã joma Ichi warr iminabʉ. Bajãad̶ebenad̶eeba ãchi trʉ̃ aria b̶ʉ kub̶uu. Machi chi dachi nebʉra joma kastikabariimaa neesid̶au. Chi ẽbẽrarã jipa nuree Dachi Akõreba biꞌia duanud̶amaa neesid̶au. 24 Machi Jesusmaa neesid̶au. Ichid̶eeba ẽbẽrarã Dachi Akõred̶erã ome bed̶ea chiwid̶i deasiid̶e machi ichi oa jĩtod̶okad̶amaa neesid̶au. Jesús oa ched̶aba Abel oa ched̶a audeara kuitaabia b̶uu.e
25 Maud̶eeba kauwa duanásturu Dachi Akõreba jara b̶uu ida b̶urãad̶amera. Chi ichiba nau iujãad̶e Sinaí ead̶e jarad̶a ida b̶uped̶aad̶arã kastikad̶ebena poyaa jĩichoad̶aabasii. Maud̶eeba chi ichiba bajãad̶ebena dachi sõd̶e jara b̶uu ida b̶uuduubʉrã ¿jĩichoad̶aika? Jĩichoad̶aabai b̶uu. 26 Sinaí ead̶e Dachi Akõre berreasiid̶e ioromia baraasii. Maamina nau ʉ̃raud̶e ichiba naka jara b̶uu:
Waya mʉʉba ioromia baraabii. Maud̶e ab̶aburu nau iujãa uribiibai, maumaarã bajãa sid̶a uribii.
27 Waya uribiiruu asiid̶e Dachi Akõreba kuitaabiasii ne joma ichiba waukuad̶a uribiped̶a wãꞌãebii. Maud̶e ab̶aburu chi wãꞌãekáuturu b̶eei. 28 Dachi Akõre jua wãꞌãekaud̶e panad̶aid̶eeba ichimaa bichíturu kid̶ibai ad̶ai panuu. Ãrea wapea panuud̶eeba ichimaa biꞌia kʉ̃riad̶ai panuu ichiba kʉ̃ria b̶uu kĩra, 29 Dachi Akõreba tʉbʉ aokoba joma baabariid̶eeba.