10
1 Moisesba b̶ʉd̶aba joma ne bia Cristod̶eeba neei ʉ̃rʉbena biꞌia dod̶aa unubiwẽa b̶uu. Mau ne bia Moisesba b̶ʉd̶aba deakau. Maud̶eeba Moisesba b̶ʉd̶aba chi Dachi Akõremaa ãnimara baa dead̶e wãbadaurã poyaa jipa nibabiakau. 2 Moisesba b̶ʉd̶aba ãchi biawãra jipa nibabiad̶a basirã, waa ãnimara baa dead̶e wãd̶aabai basii. Mau ãnimara baa deaduud̶eeba biawãra kachiruaswãe paneed̶a basirã, waa ichi daad̶e nebʉrad̶e panuu kʉ̃risiad̶aabai basii. 3 Maamina añocha ãnimara baa deaduud̶e, mauba kĩrababiabarii ãchiba kachirua waubadau, 4 paka mukĩra oaba maud̶e chivo oaba kachirua poyaa awara b̶ukaud̶eeba. 5 Maud̶eeba Cristo nau iujãad̶aa neesiid̶e ichiba Dachi Akõremaa naka jarasii:«Bichiba ãnimara bichimaa baa dead̶ai maud̶e ne kaebea dead̶ai kʉ̃riawẽa b̶uu. Maamina bichiba mʉʉmaa kakua deasii mau deamera.
6 Ãchi kachirua kakua ãnimara baa deaduud̶e maud̶e ne kaebea deaduud̶e bichi kĩrajʉʉ b̶uabasii.
7 Maud̶eeba mʉʉba jarasii: “Dachi Akõre, mʉ nama b̶uu bichiba kʉ̃ria b̶uu waui baita,
Bichi Bed̶ead̶e mʉ ʉ̃rʉbena maka b̶ʉ kub̶uud̶eeba”».
8 Cristoba naa jarasii Dachi Akõreba kʉ̃riawẽa b̶uu ẽbẽrarãba ãchi kachirua kakua ãnimara ichimaa baa dead̶ai maud̶e ne kaebea dead̶ai. Moisesba b̶ʉd̶aba maka waubia b̶umina, Dachi Akõre kĩrajʉʉ b̶uakau asii. 9 Maabae Cristoba Dachi Akõremaa naka jarasii: «Mʉ nama b̶uu bichiba kʉ̃ria b̶uu waui baita». Mauba unubi b̶uu chi nabena Dachi Akõreba bed̶ea dead̶a Cristoba awara b̶usii, chi mawãarebena bed̶ea deai baita. 10 Dachi Akõreba kʉ̃ria b̶uu Jesucristoba joma wausii. Ara ichi ida beabisii. B̶es ab̶a maka waud̶aba dachi ewaricha Dachi Akõre baita biꞌia b̶usii.
11 Paarerãba ewaricha Dachi Akõre baita ne waubadau maud̶e ãnimara baa deabadau. Maamina mauba kachirua awara b̶ukau. 12 Maamina Jesucristoba ara ichi ida beabisii kachirua ewaricha awara b̶ui baita. Maabae Dachi Akõre jua biare akʉ b̶eesii. 13 Aria esed̶au b̶uu ab̶a Dachi Akõreba joma ichi kʉ̃riakaurãba ichi juad̶e b̶uuruud̶aa.a 14 Cristoba b̶es ab̶a ara ichi ida beabisiid̶eeba chi Dachi Akõre baita awara b̶ud̶arã jipa duanusii, maka ewaricha nuread̶amera. 15 Dachi Akõre Jauri bid̶a arab̶aud̶e dachimaa kuitaabia b̶uu. Naka jara b̶uu:
16 «Dachi Mechiuba naka jara b̶uu: Kaad̶ebena ewarid̶e mʉʉba bed̶ea chiwid̶i israeld̶ebenarãmaa deai: Mʉʉba chi Moisesba b̶ʉd̶a ãchi kʉ̃risiad̶e maud̶e ãchi sõd̶e b̶ui».
17 Mawãare naka jara b̶uu:
«Ãchiba kachirua wauped̶aad̶a mʉʉba joma perdonai. Ãchiba kachirua wauped̶aad̶a mʉʉba waa kʉ̃risia b̶uabai».
18 Dachi Akõreba dachi kachirua wauped̶aad̶a ida b̶usiid̶eeba, waa dachi kachirua kakua ichimaa ne kaebea dead̶aabai panuu.
Dauchia panad̶ai panuu
19 Maud̶eeba ãbarã, Dachi Akõre baita biꞌia b̶uu piezad̶e ed̶a wãaduu kĩra Jesucristo oad̶eeba Dachi Akõre kaita wapeawẽa wãd̶ai panuu. 20 Mau piezad̶e ed̶a paru eab̶ari jirab̶u kõawãaruu kĩra Jesús biusiid̶eeba o wid̶i wausii, chi Dachi Akõre kaita needuurã chokae nuread̶amera. 21 Dachiba Paare Mechiu bajãad̶e uru panuu. Ichiba ẽbẽrarã Dachi Akõred̶erã joma karibabarii. 22 Cristoba dachi kʉ̃risia kachirua panad̶a jipa b̶usii dachi sõ ichi oaba jĩtod̶okaaruu kĩra. Dachi Akõre daad̶e biꞌia duanuu dachi kakua bania pawãraaba jeraad̶a kĩra. Maud̶eeba kʉ̃risia ab̶ad̶eeba maud̶e biawãra ijãa panuud̶eeba wãd̶ai panuu. 23 Dachi Akõreba ichiba jarad̶a kĩra waubariid̶eeba dachiba kʉ̃risiabadau maud̶e jomaurãmaa jarabadau mau ab̶a bid̶a ida b̶ud̶aabai panuu. 24 Jʉrʉd̶ai panuu saka chiya aid̶ad̶ai aude kʉ̃riad̶ai baita maud̶e chi bia waud̶ai baita. 25 Ãbua duanad̶ai ida b̶ud̶aabai panuu chi nureeba waubadau kĩra. Maumaarã bari chiya aid̶ad̶ai panuu aude ijãad̶ai baita. Maka biꞌia waud̶ai panuu, Dachi Mechiuba nebʉra kastikai ewari kãꞌãabariwãed̶e neei kuitaa panuud̶eeba.
26 Maamina dachiba chi biawãra bed̶ea kuitaaped̶aad̶akare ara dachid̶eeba kachirua wauduubʉrã, waa wãꞌãe Dachi Akõremaa dead̶ai baita mau kachirua ida b̶umera. 27 Chi maka wau b̶uuba ab̶a wapead̶eeba esed̶au b̶uai b̶uu Dachi Akõreba mau kastikamera. Mau ewarid̶e Dachi Akõreba joma ichi kĩramaarã tʉbʉ aoko nub̶uud̶e jirakuai ewaricha baa nub̶eemera. 28 Naed̶e ab̶auba Moisesba b̶ʉd̶a ũri kʉ̃riawẽebʉrã, maud̶e ẽbẽra omeeba maebʉrã õbeaba biawãra maka b̶uu aaduubʉrã, mau ab̶aed̶e kĩra chuburiad̶awẽa beabachid̶au. 29 Maud̶eeba ¿saka kʉ̃risia panuma? ¿Dachi Akõreba chi ichi Warr ida b̶ubadaurã aude kastikaika? Dachi Akõreba ichi Warr oad̶eeba bed̶ea chiwid̶i deasii dachi ichi baita biꞌia b̶ui baita. Makarã ¿chi Dachi Akõreba ichi Warr oa ched̶a biꞌiwãe b̶uu abadaurã aude kastikaika? Mau awara Dachi Akõre Jauriba ichi sõbiad̶eeba dachi aid̶a b̶uu. Maka b̶uubʉrã ¿chi Dachi Akõre Jauri ʉ̃rʉbena kachirua jarabadaurã kastikawẽka? 30 Dachiba kuitaa panuu Dachi Akõreba naka jarasii: «Mʉaburu chi nebʉra kastikai. Jomaurãmaa deai ãchiba wauped̶aad̶a kĩra». Maud̶e naka jarasii: «Dachi Mechiuba ichi ẽbẽrarã nebʉra ichiai». 31 Dachi Akõre chokae niiba dachi nebʉra ichiaruubʉrã biawãra ãrea mia kachirua b̶uu.
32 Kĩrabásturu machiba naed̶e chi biawãra bed̶ea kuitaasid̶aud̶e saka panasii. Mau ewarid̶e machi ãrea biꞌiwãe panad̶a dauchia jãadua panasid̶au. 33 B̶esed̶e jomaurã daad̶e Cristo kakua kachirua jarabachid̶au maud̶e machimaa kachirua waubachid̶au. B̶esed̶e ãbarã Cristo kakua ãrea biꞌiwãe panuu baara ãrea biꞌiwãe paneebachid̶au. 34 Chi Cristo kakua jʉ̃aped̶aad̶a machiba aid̶asid̶au. Maud̶e machiba ne uru b̶ead̶a kĩrajʉʉ ida juakaa adaubiasid̶au, kuitaa panuud̶eeba mau audeara ne bia wãꞌãekau bajãad̶e uru panuu. 35 Maud̶eeba machiba Dachi Akõred̶e ijãa panuu ida b̶urã́sturu. Ijãa panuubʉrã, Dachi Akõreba bajãad̶e ne bia mechiu deai. 36 Machiba mau joma esed̶au panad̶ai panuu. Makaburu Dachi Akõreba kʉ̃ria b̶uu waud̶aped̶a ichiba deai jarad̶a joma adaud̶ai. 37 Dachi Akõre bed̶ead̶e naka b̶ʉ kub̶uu:
«Chi neei b̶uu kãꞌãabariwãed̶e neei. Ichi biawãra kãꞌãabariwãed̶e neei.
38 Chi jipa nii mʉʉd̶e ijãa niid̶eeba chokae nibai. Maamina ichiba ijãa b̶uu ida b̶uuruubʉrã, mʉʉba mau biꞌia unuubai».
39 Waabenarãba Dachi Akõred̶e ijãa panuu ida b̶ud̶aped̶a adua paneebadau. Maamina dachi mau ẽbẽrarã kĩra panuuwãema, maumaarã Dachi Akõred̶e ijãa panuud̶eeba ewaricha chokae panad̶ai.