Pabloba nau kartad̶e aanama b̶ʉd̶a
16
1 Mʉʉba machimaa dachi neekau Febe ʉ̃rʉbena biꞌia jaraaruu. Ichi Cencrea puurud̶e ijãabadaurã aid̶abariibʉ.a 2 Dachi Mechiu trʉ̃d̶eeba biꞌia irsibísturu ẽbẽrarã Dachi Akõred̶erãba waud̶ai panuu kĩra. Ichiba ẽbẽrarã ãrea aid̶asii. Mʉ sid̶a ãrea aid̶asii. Maud̶eeba ne jomad̶e ichi aid̶ásturu.3 Neekau Priscilamaa maud̶e ãba Aquilamaa jarásturu mʉʉba kʉ̃ria b̶uu maarã biꞌia panad̶ai. Ãchiba mʉ ome arab̶au traju Jesucristod̶e wau panuu. 4 Beraa biukausid̶au mʉ aid̶ad̶ai baita. Mʉʉba maud̶e joma ãbarã judiowãerãba ãchimaa ãchíturu kid̶ibai abadau. 5 Maud̶e ãbarã ãchi ded̶e araa ãbua imibadaurãmaa jarásturu mʉʉba kʉ̃ria b̶uu ãchi biꞌia duanad̶ai. Mʉ ãba ãrea kʉ̃ria b̶uu Epenetomaa ara mau kĩra jarásturu. Acaya druad̶e ichiba naa Jesucristod̶e ijãasii. 6 Neekau Mariamaa jarásturu mʉʉba kʉ̃ria b̶uu ichi biꞌia b̶uai. Ichiba machi ãrea aid̶a b̶uu. 7 Mʉ ãbarã judiorã Andronicomaa maud̶e Juniamaa ara mau kĩra jarásturu. Waabenarã biꞌia kuitaa panuu maarã Cristoba bʉid̶arã. Mʉʉba Cristod̶e ijãai naed̶e maarãba ijãasid̶au.
8 Mʉ ãba Ampliasmaa jarásturu mʉʉba kʉ̃ria b̶uu ichi biꞌia b̶uai. Dachi Mechiu Jesucristod̶e, mʉʉba ichi ãrea kʉ̃ria b̶uu. 9 Ãba Urbanomaa jarásturu mʉʉba kʉ̃ria b̶uu ichi biꞌia b̶uai. Ichiba dai ome ãbua Jesucristo ʉ̃rʉbena jaradea b̶uu. Ãba Estaquismaa bid̶a ara mau jarásturu. Ichi sid̶a mʉʉba kʉ̃ria b̶uu. 10 Ãba Apelesmaa jarásturu mʉʉba kʉ̃ria b̶uu ichi biꞌia b̶uai. Ichiba unubisii Cristo biawãra ijãa b̶uu. Joma Aristóbulo ded̶ebenarãmaa bid̶a ara mau kĩra jarásturu. 11 Mʉ ãba judio Herodionmaa jarásturu mʉʉba kʉ̃ria b̶uu ichi biꞌia b̶uai. Narciso ded̶ebenarã Dachi Mechiud̶e ijãa nureerãmaa jarásturu mʉʉba kʉ̃ria b̶uu ãchi biꞌia duanad̶ai. 12 Neekau Trifenamaa maud̶e Trifosamaa jarásturu mʉʉba kʉ̃ria b̶uu maarã biꞌia panad̶ai. Ãchiba Dachi Mechiu baita biꞌia wau panuu. Maud̶e neekau Persidamaa ara mau jarásturu. Mauba Dachi Mechiu baita biꞌia wau b̶uu. 13 Ãba Rufo Dachi Mechiuba jʉrʉ adaud̶amaa maud̶e ichi nawemaa jarásturu mʉʉba kʉ̃ria b̶uu maarã biꞌia panad̶ai. Ichi nawe mʉ nawe kĩra nii. 14 Ãba Asincritomaa, Flegontemaa, Hermesmaa, Patrobasmaa, Hermasmaa, maud̶e ãbarã ãchi ome duanuumaa jarásturu mʉʉba kʉ̃ria b̶uu ãchi biꞌia duanad̶ai. 15 Maud̶e ãba Filologomaa, Juliamaa, Olimpasmaa, Nereomaa, ichi neekaumaa maud̶e joma ẽbẽrarã Dachi Akõred̶erã ãchi ome duanuumaa jarásturu mʉʉba kʉ̃ria b̶uu ãchi biꞌia duanad̶ai. 16 Biawãra kʉ̃riad̶eeba chiya biꞌia berreásturu.b Joma Cristo ẽbẽrarãba kʉ̃ria panuu machi biꞌia duanad̶ai.
17 Ãbarã, mʉʉba machimaa chi chuburia id̶iiruu kauwa nuread̶amera. Waabenarãba ãbarãmaa aꞌawaraa kʉ̃risiabiabadau. Chi machiba biawãra bed̶ea kuitaaped̶aad̶a ãchiba ãyaa jaradeabadau. Mau ẽbẽrarã ome ãbua panarã́sturu. 18 Maarãba Dachi Mechiu Jesucristoba kʉ̃ria b̶uu wau panuuwãe, maumaarã ãchiba kʉ̃ria panuu wau panuu. Ãchi mipitaa berrea panuud̶eeba, chi biꞌia kʉ̃risiad̶awẽa nuree setaa kũruabadau.
19 Jomaurãba kuitaa panuu machiba Dachi Akõre bed̶ea biawãra wau panuu. Maud̶eeba mʉ kĩrajʉʉ b̶uu. Biawãra mʉʉba kʉ̃ria b̶uu machiba biꞌia waud̶ai kuitaad̶ai maud̶e kachirua waud̶aabai. 20 Chi dachi jirukaraayuwãe b̶uabiabarii Dachi Akõreba kãꞌãabariwãed̶e Satanás poyaaped̶a machi juad̶e b̶ui.c Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi aid̶a b̶uai.
21 Ãba Timoteo mʉ ome ãbua jaradea b̶uuba kʉ̃ria b̶uu machi biꞌia duanad̶ai. Maud̶e mʉ ãbarã judiorã Lucioba, Jasonba maud̶e Sosipateroba kʉ̃ria panuu machi biꞌia duanad̶ai.
22 Mʉ Terciobʉ. Pabloba berrea b̶uu mʉʉba nau kartad̶e b̶ʉmaa b̶uu. Dachi Mechiu Jesucristod̶eeba mʉʉba kʉ̃ria b̶uu machi biꞌia duanad̶ai.
23 Ãba Gayo bid̶a kʉ̃ria b̶uu machi biꞌia duanad̶ai. Mʉ ichi ded̶e b̶uu. Ãbarã jomaurã ichi ded̶e araa ãbua imi panuu. Nau puurud̶ebena chi nejarra nubarii Erastoba maud̶e ãba Cuarto kʉ̃ria panuu machi biꞌia duanad̶ai.
24 Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi aid̶a b̶uai.
Pabloba Dachi Akõremaa biꞌia jarad̶a
25-26 Mʉʉba chi bed̶ea bia Jesús ʉ̃rʉbena jaradea b̶uabarii. Ara mau bed̶ead̶eeba Dachi Akõreba machi poyaa aid̶ai chaarea nuread̶amera. Mau bed̶ea Dachi Akõreba naed̶e kuitaabiawẽa b̶uasii maamina id̶ibae kuitaabiasii. Ichi baita berreabadaurãba mau kartad̶e b̶ʉsid̶au. Dachi Akõre biukauba maka b̶ʉbiasii druachad̶ebenarãba ũrid̶aped̶a Jesucristod̶e ijãad̶amera. Dachi Akõremaa biꞌia berread̶ai panuu. 27 Ichi ab̶aburu nii. Ne joma kuitaa nii. Jesucristod̶eeba dachiba ewaricha ichimaa biꞌia kʉ̃riad̶ai panuu. Biꞌia b̶uu maka b̶uai.