Waabenarã aid̶ásturu biꞌia panad̶amera
15
1 Dachiba ijãa panuu ʉ̃rʉbena ãrea kuitaa nureerãba dachiba kʉ̃ria panuu waud̶ai audeara, chi adua nuree aid̶ad̶ai panuu. 2 Maumaarã waabenarãba kʉ̃ria panuu waud̶ai panuu maarã biꞌia nuread̶amera maud̶e biꞌia ijãad̶amera. 3 Biawãra Cristo bid̶a ara ichiba kʉ̃ria b̶uu waubasii, maumaarã Dachi Akõre bed̶ead̶e b̶ʉ kub̶uu kĩra makasii. Naka b̶ʉ kub̶uu: «Dachi Akõre, ãchiba bichi ʉ̃rʉbena kachirua jarasid̶aud̶e mʉ ʉ̃rʉbena sid̶a kachirua jarasid̶au». 4 Joma Dachi Akõre bed̶ead̶e b̶ʉd̶a dachimaa jaradeai baita b̶uu. Dachi sõbiabiabarii maud̶e aid̶abarii joma dauchia jãadua panad̶amera. Maka dachiba biawãra kuitaa panuu Dachi Akõre ome ewaricha biꞌia panad̶ai. 5 Mʉʉba kʉ̃ria b̶uu ara mau dachi sõbia nureabiabarii maud̶e joma dauchia jãadua panabiabarii Dachi Akõreba machi aid̶a b̶uai, arab̶aud̶e kʉ̃risiad̶amera Jesucristoba kʉ̃ria b̶uu kĩra. 6 Maka machiba Dachi Bajãad̶ebena Mechiu Jesucristo Akõremaa ãbua biꞌia berrea panad̶ai.Bed̶ea bia Cristo ʉ̃rʉbena judiowãerã baita bid̶a b̶uu
7 Cristoba machi biꞌia irsibid̶a kĩra, chiya biꞌia irsibísturu. Mau unuuduud̶e ẽbẽrarãba Dachi Akõremaa biꞌia berread̶ai. 8 Mʉʉba jaraaruu: Cristo neesii dai judiorã karibai baita. Dachi Akõreba judiorã nabẽraed̶ebena chi mechiurã ome bed̶ea dead̶a Cristoba wausii. Mauba unubisii ichiba jara b̶uu kĩra wau b̶uabarii. 9 Maud̶e Cristo neesii judiowãerãba Dachi Akõremaa biꞌia berread̶amera ãchi kĩra chuburiasiid̶eeba. Mau ʉ̃rʉbena Dachi Akõre bed̶ead̶e naka b̶ʉ kub̶uu:
«Mʉʉba bichi judiowãerã tãed̶e biꞌia berreai. Mʉʉba bichimaa biꞌia karii».a
10 Maud̶e naka b̶ʉ kub̶uu:
«Machi judiowãerã, Dachi Akõre puuru ome kĩrajʉ́sturu».
11 Maud̶e naka b̶ʉ kub̶uu:
«Joma machi judiowãerã, Dachi Mechiumaa biꞌia berreásturu.
Joma puuru b̶ee, ichimaa biꞌia berreásturu».
12 Maud̶e Isaiasba ichi kartad̶e naka b̶ʉsii:
«Isaid̶ebena ab̶a neei.b Mau puuru b̶ee Mechiu bai.
Judiowãerãba ichid̶e ijãad̶ai joma chi bia esed̶au panuu ãchimaa deamera».
13 Joma chi bia dachiba esed̶au panuu Dachi Akõreba deai. Machiba ichid̶e ijãa panuud̶eeba mʉʉba kʉ̃ria b̶uu ichiba machi ãrea kĩrajʉʉbiai maud̶e jirukaraayuwãe duanubiai. Maka Dachi Akõre Jauri poyaad̶eeba machiba biꞌia kuitaad̶ai joma chi bia dachiba esed̶au panuu biawãra adaud̶ai.
Pabloba judiowãerã jaradeabarii
14 Ãbarã, mʉʉba kuitaa b̶uu machiba biꞌia biawãra wau panuu maud̶e ãrea kuitaa panuud̶eeba poyaa chiya jaradead̶ai. 15 Maamina nau kartad̶e mʉʉba chi b̶ee kʉ̃risia b̶ʉsii machiba kĩrabad̶amera. Maka b̶ʉsii Dachi Akõreba ichi sõbiad̶eeba mʉ b̶usiid̶eeba, 16 judiowãerã tãed̶e Jesucristo baita bari trajabarii b̶uamera. Maud̶eeba chi bed̶ea bia Dachi Akõre ʉ̃rʉbena maarãmaa jaradea b̶uu. Ijãaduubʉrã paare judioba ãnimara baa dearuu kĩra mʉʉba ãchi Dachi Akõremaa dea b̶uu biꞌia unumera. Maud̶e Dachi Akõre Jauriba ãchi Dachi Akõre baita biꞌia b̶ui.
17 Jesucristo ome b̶uud̶eeba mʉʉba Dachi Akõre baita wau b̶uu kakua ãrea kĩrajʉʉ b̶uu. 18 Maamina ara mʉ ʉ̃rʉbena ne ab̶a bid̶a biꞌia berreabai. Biꞌia berrearuu Cristoba mʉʉd̶eeba waud̶a ʉ̃rʉbenáturu. Biawãra mʉʉd̶eeba Cristoba aid̶asii judiowãerãba Dachi Akõred̶e ijãad̶amera. Mʉʉba jaradea b̶uud̶eeba, wau b̶uud̶eeba, 19 maud̶e ẽbẽrarãba poyaa ne waud̶akau wau b̶uud̶eeba maka aid̶asii. Mʉʉba Dachi Akõre Jauri poyaad̶eeba joma mau wausii. Jerusalend̶ebena Ilírico druad̶aa bed̶ea bia Cristo ʉ̃rʉbena mʉʉba joma jaradeai b̶uad̶amaa jaradeasii. 20 Biawãra chi bed̶ea bia Cristo ʉ̃rʉbena mʉʉba jaradea kʉ̃ria b̶uu chi wabid̶a ũrid̶akaurãmaa. Ab̶auba jaradea b̶uumaa mʉ traja kʉ̃riawẽma. 21 Maka mʉʉba Dachi Akõre bed̶ead̶e b̶ʉ kub̶uu kĩra wau b̶uu. Naka b̶ʉ kub̶uu:
«Ichi ʉ̃rʉbena jarad̶awẽa panuurãmaa, ãchiba ũrid̶ai. Ichi ʉ̃rʉbena ũrid̶awẽa panuurãba kuitaad̶ai».
Pablo Romad̶aa wãi kʉ̃risiad̶a
22 Maud̶eeba b̶es ãrea mʉ machimaa wã kʉ̃ria b̶umina poyaa wãwẽa b̶uu. 23 Maamina namaria joma jaradeasiid̶eeba ara nama kaita wãꞌãema sama Cristo ʉ̃rʉbena jaradeai. Ãrea ba b̶uasii mʉ machi ichiad̶e wãi kʉ̃ria b̶uasiid̶eeba, 24 España druad̶aa wãaruud̶e machimaa wãi kʉ̃ria b̶uu. Machi baara kĩrajʉʉ b̶uad̶auped̶a kʉ̃ria b̶uu machiba poyaa aid̶ad̶ai mʉ biꞌia wãmera. 25 Jãabae mʉ Jerusalend̶aa wãi chi nejarra ẽbẽrarã Dachi Akõred̶erãmaa deai baita. 26 Mau chi nejarra ãbarã Macedonia druad̶ebenarãba maud̶e Acaya druad̶ebenarãba kĩrajʉʉ araa pesid̶au ẽbẽrarã Dachi Akõred̶erã Jerusalend̶ebena chi nejarr barauwãe nuree aid̶ad̶ai baita. 27 Mau ãbarã judiowãerãba kĩrajʉʉ mau chi nejarra ãbarã judiorã baita araa pesid̶au. Biawãra maka waud̶ai panasid̶au judiorãmaa dead̶ai baraa panasid̶aud̶eeba. Judiowãerãba ne joma biꞌia Dachi Akõre ʉ̃rʉbena judiorãd̶ebena adausid̶aud̶eeba, ãbarã judiorãmaa ne bia nau iujãad̶ebena dead̶ai panuu. 28 Mau chi nejarra ãbarã Jerusalend̶ebenarãmaa dearuud̶e mʉ España druad̶aa wãi. Wãaruud̶e machimaa wãi. 29 Mʉʉba kuitaa b̶uu machimaa neeruud̶e Cristoba dachi ãrea aid̶ai.c
30 Ãbarã, Dachi Akõre Jaurid̶eeba dachi chiya kʉ̃ria panuu. Maud̶eeba Dachi Mechiu Jesucristod̶eeba mʉʉba machimaa chi chuburia id̶iiruu mʉ aid̶ad̶ai Dachi Akõremaa ʉtaa id̶id̶amera. 31 Ichimaa ʉtaa id̶ísturu Judea druad̶ebena Jesusd̶e ijãad̶akaurãba mʉ kachirua waurãad̶amera. Maud̶e ʉtaa id̶ísturu mʉʉba chi nejarra ẽbẽrarã Dachi Akõred̶erã Jerusalend̶ebenarã baita adoeruu biꞌia adaud̶amera. 32 Maka Dachi Akõreba kʉ̃riaruubʉrã, mʉ machimaa kĩrajʉʉ wãi maud̶e machi tãed̶e biꞌia kʉrrjĩru b̶uai. 33 Mʉʉba kʉ̃ria b̶uu chi Dachi Akõre dachi jirukaraayuwãe duanabiabarii joma machi baara b̶uai. Biꞌia b̶uu maka b̶uai.