1 Corintios
Nabena karta Pabloba b̶ʉd̶a ãbarã Corinto puurud̶ebenarã baita
Pabloba nau karta ãbarã Corinto puurud̶ebenarã baita b̶ʉsii. Mau año 55 Éfeso puurud̶ebena urubʉisii.
Pabloba Corintod̶e chi bed̶ea bia Jesús ʉ̃rʉbena naa jaradeasii (Hechos 18:1-17). Chi judiorã araa ãbua imibadau ded̶e jaradea b̶uud̶eeba chi nuree judiorãba ijãasid̶au. Maabae judiorã awaraurãba Pablo duabʉisid̶aud̶e junebena ded̶e jaradea b̶eesii. Maka b̶uud̶e waabenarã griegorãba ijãasid̶au. Pablo Corintod̶e año ab̶a y medio b̶uasii.
Corinto puuru mechiu b̶uasii. Ẽbẽrarã 600.000 baidia duanasid̶au. Mau awara ãchi Dachi Akõre kĩra nuree juaba kaped̶aad̶a kʉ̃riabadau de ãrea uru panasid̶au. Maamina maarãd̶e ijãad̶ai baita mia pera kachirua waubachid̶au. Chi nureerãba Jesucristod̶e ijãasid̶amina wabid̶a ãibena ome kãi paneebachid̶au. Mau awara ãbarã tãed̶e nebʉra maucha baraasii.
Naa Pabloba maarã iadaasii ãchi chiya jiwaa berreayaa panuud̶eeba (1:1—4:21). Mawãare b̶ʉsii mia pera wau nibarãad̶amera (5:1—6:20). Mawãare chi ãbarãba kartad̶e naed̶e id̶iped̶aad̶a Pabloba panausii. Capítulo 7 miakãid̶ai ʉ̃rʉbena id̶iped̶aad̶a panausii. Capítulo 8—11 panausii chi Dachi Akõre kĩra nuree juaba kaped̶aad̶a baita saka waud̶ai panuu ʉ̃rʉbena. Capítulo 12—14 Dachi Akõre Jauriba waubi b̶uu ʉ̃rʉbena panausii.
Corintod̶e waabenarãba dachi chokae jiradud̶ai ʉ̃rʉbena biꞌiwãe kʉ̃risia panasid̶aud̶eeba Pabloba Capítulo 15 mau ʉ̃rʉbena b̶ʉsii. Capítulo 16 b̶ʉsii saka chi nejarra ped̶ai panuu maud̶e ãchi ichiad̶e wãi.