1 Corintios
Nabena karta Pabloba b̶ʉd̶a ãbarã Corinto puurud̶ebenarã baita
Nau kartad̶e Pabloba naa b̶ʉd̶a
1
1 Mʉ Pablobʉ. Dachi Akõreba ichi kʉ̃riad̶eeba mʉ iusii Jesucristoba bʉid̶a b̶uamera. Dachi ãba Sóstenes mʉ ome b̶uu. 2 Mʉʉba nau karta b̶ʉʉruu chi ẽbẽrarã Dachi Akõred̶erã Corintod̶ebena baita. Jesucristod̶eeba Dachi Akõreba machi awara b̶usii ichi baita biꞌia nuread̶amera. Ara mau kĩra ichiba druacha joma Dachi Mechiu Jesucristomaa ʉtaa id̶ibadaurã awara b̶usii. Ichimaarã Mechiubʉ maud̶e Dachi Mechiubʉ. 3 Daiba kʉ̃ria panuu Dachi Bajãad̶ebena Akõreba maud̶e Dachi Mechiu Jesucristo ãchi sõbiad̶eeba machi kariba panad̶ai maud̶e jirukaraayuwãe panabiad̶ai.Pabloba ãbarã baita Dachi Akõremaa ichíturu kid̶ibai ad̶a
4 Machi Jesucristo ome panuud̶eeba Dachi Akõreba ichi sõbiad̶eeba aid̶a b̶uu. Maud̶eeba mʉʉba Dachi Akõremaa ʉtaa id̶iiruucha machi baita ichíturu kid̶ibai abarii. 5 Jesucristo ome panuud̶eeba Dachi Akõreba machimaa joma deasii biꞌia waud̶amera. Ichi bed̶ea poyaa kuitaa jaradea panad̶ai maud̶e ichi ʉ̃rʉbena poyaa ãrea kuitaa panad̶ai. 6 Joma Dachi Akõreba machimaa dead̶aba unubi b̶uu chi Cristo ʉ̃rʉbena bed̶ea daiba jaradeaped̶aad̶a biawãra ara b̶uu. 7 Machiba Dachi Mechiu Jesucristo unud̶ai baita esed̶au panuumisa, Dachi Akõreba ichi Jaurid̶eeba dea b̶uu joma uru panuu. 8 Maud̶eeba Dachi Akõreba machi meserãa dea ua b̶uai ab̶a nau ewari wãꞌãeruud̶aa. Maka Dachi Mechiu Jesucristo neeruud̶e machi ʉ̃rʉbena kachirua jarad̶ayuswãe nuread̶ai. 9 Dachi Akõreba ara ichiba jara b̶uu kĩra waubarii. Ichiba machi iusii ichi Warr Dachi Mechiu Jesucristo ome ãbua nuread̶amera.
Ãbarã ãchi kakawaa kʉ̃risia uru panad̶a ʉ̃rʉbena
10 Ãbarã, Dachi Mechiu Jesucristod̶eeba mʉʉba machimaa chi chuburia id̶iiruu ãbua biꞌia duanad̶amera. Machi kʉ̃risia kakawaa uru panad̶aabai panuu, maumaarã kʉ̃risia ab̶aud̶e ãbua biꞌia duanad̶ai panuu. 11 Ãbarã, mʉʉba ũrisiid̶eeba maka jara b̶uu. Neekau Cloé ded̶ebenarãba mʉʉmaa jarasid̶au machi ijara berrea duanabadau. 12 Mau ʉ̃rʉbena biꞌia jaraaruu. Waabenarã machid̶ebenarãba jarabadau: «Mʉ Pablod̶e». Waabenarãba jarabadau: «Mʉ Apolosd̶e». Waabenarãba jarabadau: «Mʉ Pedrod̶e».a Maud̶e waabenarãba jarabadau: «Mʉ Cristod̶e» 13 Makarã ¿Cristorã ãreaka? ¿Mʉ machi kakua cruzd̶e jirab̶usid̶aka? ¿Machi mʉ trʉ̃d̶e boro easid̶aka? ¡Makawãema!
14 Mʉʉba ab̶a bid̶a machid̶ebena boro eabasiid̶eeba kĩrajʉʉ b̶uu. Mʉʉba ab̶a Crispo maud̶e Gayóturu boro easii. 15 Maka ab̶au bid̶a poyaa jarawẽe mʉ trʉ̃d̶e boro ead̶a. 16 Maud̶e mʉʉba ãba Estéfanas ded̶ebenarã sid̶a boro easii. Maarã awara waabenarã boro easiibʉrã mʉʉba kĩrabawẽma. 17 Cristoba mʉ bʉibasii ẽbẽrarã boro ea b̶uamera, maumaarã bʉisii chi bed̶ea bia ichi ʉ̃rʉbena jaradeamera. Nau iujãad̶ebena kʉ̃risia kuitaad̶eeba jaradeawẽa b̶uu, Cristo cruzd̶e biud̶a poyaaswãe b̶eerãamera.
Cristo, Dachi Akõre kʉ̃risia kuitaa maud̶e poyaabarii
18 Chi tʉbʉchia kiikaud̶aa wãd̶ai ẽbẽrarãmaarã, Cristo cruzd̶e biud̶a ʉ̃rʉbena bed̶ea kĩranema berrea b̶uu. Maamina dachi, chi Dachi Akõreba karibabadaurã, dachiba kuitaa panuu mau bed̶eaba Dachi Akõre poyaabarii kuitaabia b̶uu. 19 Dachi Akõre bed̶ead̶e naka b̶ʉ kub̶uu:
«Chi ãrea kuitaa nuree kʉ̃risia kuitaa, mʉʉba biꞌiwãe b̶uu unubiai. Chi kʉ̃risia kuitaa nureerãba waud̶ai kʉ̃risia panuu ida kabiabai».
20 Biawãra Dachi Akõreba nau iujãad̶ebena kʉ̃risia kuitaa biꞌiwãe b̶uu kuitaabiasii. Maud̶eeba ¿chi ãrea kuitaa nuree kãare sãasma? ¿Chi Moisesba b̶ʉd̶a jaradeabadaurã kãare sãasma? ¿Chi id̶ibaebena kʉ̃risia kuitaad̶eeba berreabadaurã kãare sãasma? 21 Dachi Akõreba ichi kʉ̃risia kuitaad̶eeba waud̶aba, ara ichi unubia b̶uu. Maamina nau iujãad̶ebenarãba ara ãchi kʉ̃risia kuitaad̶eeba ichi unud̶akau.b Chi daiba jaradea panuu kĩra kawawẽa b̶uu kĩra b̶umina Dachi Akõre baita bibuara b̶uu maud̶eeba joma chi ichid̶e ijãaduu karibai.
22 Chi judiorãba, Cristod̶e ijãad̶ai baita, ẽbẽrarãba poyaa ne waud̶akau unu kʉ̃riabadau. Chi judiowãerãba nau iujãad̶ebena kʉ̃risia kuitaa jʉrʉbadau. 23 Maamina daiba Cristo cruzd̶e biud̶a jaradea panuu. Mau bed̶ea judiorãba biꞌia ũrid̶akau. Judiowãerãba mau biꞌiwãe b̶uu kʉ̃risiabadau. 24 Maamina Dachi Akõreba chi nuree judiorã maud̶e chi nuree judiowãerã iusii Cristod̶eeba karibai baita. Maarãba kuitaa panuu Dachi Akõreba Cristod̶eeba chi poyaabarii maud̶e kʉ̃risia kuitaa unubiasii. 25 Ẽbẽrarãmaarã Cristo cruzd̶e biusiid̶eeba Dachi Akõre kuitaawãe nii maud̶e meserãaswãe nii. Maamina ne adua nii kĩra b̶umina Dachi Akõre joma nau iujãad̶ebenarã audeara ne kuitaa nii. Maud̶e meserãaswãe nii kĩra b̶umina joma nau iujãad̶ebenarã audeara meserãa nii.
26 Ãbarã, kʉ̃risiásturu Dachi Akõreba machi adausiid̶e saka nureasii. Ẽbẽrarãmaarã ãrea machid̶ebena ne kuitaa nuread̶aabasii, chi jaradea ua b̶uabadaurã nuread̶aabasii maud̶e chi nejarra barau nureed̶ebena need̶aabasii. 27 Maud̶eeba chi ne kuitaa nureerãmaarã machi ne adua nuree. Maamina Dachi Akõreba chi ne adua nuree jʉrʉ adausii chi ne kuitaa nuree kĩrakayad̶amera. Dachi Akõreba chi meserãaswãe nuree jʉrʉ adausii chi meserãa nuree kĩrakayad̶amera. 28 Nau iujãad̶ebenarãba chi nejarr barauwãe nuree abadau maud̶e chi maarãba ida b̶ubadau Dachi Akõreba jʉrʉ adausii. Maka chi mechiuwãe nuree jʉrʉ adausii chi mechiu nuree chi nejarr barauwãe nuread̶ai b̶ui baita. 29 Maud̶eeba ab̶au bid̶a ara ichi ʉ̃rʉbena Dachi Akõre daad̶e poyaa biꞌia berreawẽma. 30 Maawẽa Dachi Akõreba machi Jesucristo ome ãbua b̶usii. Maka Cristod̶eeba Dachi Akõreba ichi kʉ̃risia kuitaa dachimaa kuitaabiasii. Ichiba dachi jipa b̶usii, ara ichi baita biꞌia b̶usii, maud̶e kachiruad̶ebena karibasii. 31 Maud̶eeba Dachi Akõre bed̶ead̶e naka b̶ʉ kub̶uu kĩra dachiba waud̶ai panuu: «Ab̶auba biꞌia berrearuubʉrã, Dachi Mechiu ʉ̃rʉbena biꞌia berreai b̶uu».