Titā
1
Mui, Paule olungge Itchioro banidaji ar Jisu Kristor apostol. Itchiore akke dhori beitulliede sigunor bischiaso doge, pobitro ar soittio gyeno doge mui olungge ek jon apostol. 2 Sei pobitrogan ononto jibono ashaganot age. Somoibuo arambo no ode, gal madi no parede Itchiorbuoi sien protiggia gorsie. 3 Itchiore thik gorsiede somoibuot, tar hodagan prosaro darai janei dilo. Amar mukti gorie Itchiorbuor ugumano doge sei prosaran more die oie.4 Tita, mui tore legongor. Amar bischiaschano doge tui mor soittio dhormotto puo. Bab Itchiore ar amar mukti gorie Probu Jisu Kristoi tore doyegan, meyegan ar shantigan dedok.
Kret Dippuot Titar Haman
5 Kret dippuot mui tore phelei ejchiongge, bagi roiede hamani tui thik goribartei. Mui tore ugum duongge, prottiek sohorot mondoli borjon banes. 6 Mondoli borjonnuo duj neie uo poribo. The ekkuo mog-bola ar tar puo-shabagun bischiasi uo poribo. Thara duj di no parsie ar ohongkari no gorsie uo poribo. 7 Haron, Itchioro porsoni ole, duj neie uo poribo. Tar nijor monjokka doge gorie ar han gorommie oi no pebo. The mod no heie, mara-mari no gorsie ar oinniei gori lab no togeie uo poribo. 8 Sienir bodoli, gorba lobiot, ar goman tar hos pa poribo. The shantoshil, dharmigar pobitro manus uo poribo ar the nijore-nije domon oi pebo. 9 Bischiaso hodagan tare shigie jeiede doge the shokto gori dori thok jene the gom sigkie dinei manjiore the bujei pare para ar jigune biruddie solon, sigunore the tharar bhulani degei di pare para.
10 Haron onek ohongkari manjie ortho mormo neie hoda hon ar thogan. Sundu-sam happiegune bes siennie goron. 11 Thara jien sigkie dibar osit noi, oinniei labottei sien thara sigkie duon. Thara siennie gori sigkie dile, goda ghorbuogun jagulug gori duon. Tui tharar muoni bondo gori die poribo. 12 Thara nijor ek jon munie hoie, “Kret dippuor manuschune onsur gal madon. Thara olakke darittie emano dogkie, alsi ar nadanie.” 13 Sei hodagan soittio. Senottei, thara gome-dalei bischias goron para, tui tharare shokto gori bujes. 14 Judaiuno potchonani ar manjior ugumani thara hando no goron para, tui tharare bujes. Thara siennie gorilie, soittioganot no than. 15 Pobitro manuschunor begkani pobitro. Hintu, jara aw-pobitro ar bischias no goron, tharattei hitchu pobitro noi. Tharar monani ar idie-ittanio aw-pobitro. 16 Thara muendi Itchior hobor pan gori haam haan, hintu hame horjai tare haam no haan. Itchiore hos no paidie hamani thara goron. Thara olakke aw-mannio, ar je huno gom hamortei shobai gunor noi.