Aptar Dan
12
Bheilog, ikkie aptar dano sombonde tumi aw-gyen obartei mui no sang. 2 Tumi Be-jad ela bili hobor po. Hoda hoi no parsie mokti sidu tomare jindi pai pharok gorei nejeion. 3 Senottei mui sangge tumi hobor peda, jar Itchioro Apta age the hodo noi, “Jisu obisab heie.” Pobitro Apta darai no ole huno jone hodak noi, “Jisu olode Probu.”4 Nanan babottie bor age, hintu ekkui Apta. 5 Nanan babode lobiot gori pare, hintu ekkuo Probu. 6 Nanan babottie ham, hintu ekkuo Itchiore beg manuschuno bidirie begkanit ham gore.
7 Labottei jon bagene ekkan ekkan boksit denar darai Aptabuoi nijore-nije degeie. 8 Apta darai ek jonore gyeno hoda de, aro ek jonore sei Aptabuoi buddhir hoda de. 9 Ekkuo Apta darai Itchiore ek jonore bischiaschan de, aro ek jonore sei Aptabuo darai gom gori paribar bor de. 10 Ek jonore amok ham gori paribar bor de, ek jonore muni dogkie gori hoda hobar bor de, ek jonore aptagun hobor pebar boksit de, ek jonore nanan hodadi hoi paribar bor de ar ek jonore nanan hoda ortho bhangi di paribar bor de. 11 Hintu jei, sei ekkuo Aptai begkanit ham gore ar tar ischie doge prottiek jonore borani bhag gori de.
Ekkan Heye Hintu
Balukkani Onggo
12 Haron jedogkie gori heyegan olode ekkan ar ienot onek onggo age, hintu jhagkuo oleio jei ekkan heyet onggo. Kristoio sedogkie. 13 Haron ekkuo Aptar darai ami begkune heyettei baptisma loiei. Judai manus ok, Grik manus ok banidaji ok bah shadin manus ok ekkuo aptat begkunore habana oie.
14 Haron heyegan bana ekkan onggo noi, hintu onek onggo age. 15 Thengane judi hoi, “Mui ad noi hinottei, mui heyeganor noi.” Senottei thengane heyeganor noi ni na? 16 Ar hanane judi hoi, “Mui sog noi hinottei, mui heyeganor noi.” Senottei hanan heyeganor noi ni na? 17 Goda heyegan judi sog odo, hingori suno gelun? Goda heyegan judi han odo, hingori bas pa gelun? 18 Hintu Itchiore prottiek heyet onggo the jiot mone hoi siot bojei di die. 19 Beg onggogani judi ekkan odo, heyegan hudu olun? 20 Onek onggo hintu ekkan heye.
21 Sogkuoi adtanore hoi no paribo, “Tui mor dorkar nei.” Siriebuoi thenganore hoi no paribo, “Tui mor dorkar nei.” 22 Ami mone gori heyet hoiekkani onggo bol neie hintu sieni bes dorkari onggo. 23 Ami mone gori heyet hoiekkani onggor sorman nei. Sienire bes ami sorman gori. Hoiekkani onggo ami no degei. Sienire bes jottone thoi. 24 Hintu amar dega jaidie onggoganir no lage. Itchiore heyet onggogani gome-dalei jar jagat tare sorei di die. Sorman neie onggoganit bes The sorman di die. 25 Heyegan bhag bhag no obartei, hintu ekkan onggoi oinnio onggoganir sintie gore para The gori di die. 26 Ekkan onggoi dug phele, beg onggoganie sieno somare dug pai. Ar ek onggoi sorman phele beg onggoganie hujhi oi.
27 Tumi olade Kristor heyegan ar tumi prottiek jon heyeganor onggo. 28 Mondolit agonde igunore Itchiore thik gorsie. Akke apostolun, the munigun, sei jeredi mastorun. Sei porendi, amok ham goribartei Itchiore hoiek jon thoie. Sei porendi, gom goribar baro hoiek jonottei the thoie. Manjiore sahajjio goribartei hoiek jon the thoie. Hoiek jon murubbi obartei ar nanan hodadi hoda hobartei the hoiek jon thoie. 29 Begkun apostol ni, begkun muni ni, begkun mastor ni ar begkun amok ham gori paron ni? 30 Begkunor gom goribar hemoda age ni? Begkune nanan hodadi hoda hoi paron ni? Begkune nanan hoda ortho bhangi di paron ni? 31 Hintu begottun gom boran shokto gori dhap goro.