Festasor Mujungot
Paular Bijier
25
Rejjioganot Festase lunginei, tin din porendi Kaisarea sohorottun the Jerusalem sohorot gelo. 2 Sebeden rajguruthagurune ar Judai manus-chunor murubbigune tare Paular biruddie janeilak ar abitti gorilak. 3 Paular biruddie tharare mon paleidibartei thara Festasore hujoli gorilak jene the Paulare Jerusalem sohorot azil obartei daga bajei de. Ar podot hab di theinei Paula ette morei pheleibartei. 4 Hintu Festase uttor dilo jei Paulare Kaisarea sohorot raga obo ar the nijeio sidu jhadi gori jebo. 5 The holo, “Senottei, murubbigune sidu thara mor loge jeiparibak. Sei manuschuor judi duj thai thara tare duj badeidi paribakkoi.” 6 Tharar loge Festase dos din thanar porendi, the Kaisarea sohorot gelo. Tar hellie the bijier gorede jaganot bojinei, Paulare anibartei ugum dilo. 7 Ar Paula lunginei, Jerusalem sohorottun jeionde Judai manuschune tar seropala thiei udilak. Thara Paulare shanggadik duj badei dilak jieni thara proman di no paron. 8 Sebeden Paula tare the rokkie goribartei holo, “Judai manuschunor Niomano biruddie ok mondirbuo biruddie ok Moharaj Kaisara biruddie ok mui hitchu duj no gorong.” 9 Hintu Festase Judai manuschunore mon paleidibar sai hinottei the Paulare uttor dinei holo, “Tui Jerusalem sohorot jeinei sidu mor mujungot ei hodaganir bijier obartei tortun mone hoi ni?”10 Senottei Paula holo, “Kaisara bijier gorede jaganot mui thieiongi, ar iot more bijier gorana osit. Tui gome-dalei hobor pas mui Judai manuschuno sidu hitchu duj no gorong. 11 Haron mui judi duj gorie ong, bah moranar sasti pebar lak gori thele, mori jana mor huno abitti nei. Hintu judi ei manuschune more duj badei didonde sieni ekkanio soittio no ole, more huno jone tharar adot gojei di no paribak. Mui Kaisara sidu abitti gortung sang.”
12 Sebeden Festase murubbi-gundoi huobula gorinei the holo, “Kaisara sidu tui abitti gorilie, Kaisara sidu jeis.”
Raja Agripaloi
Festase Huobula
13 Hoiekdin porendi, raja Agripa ar Bernise somot Festasore salam janeibartei Kaisarea sohorot lungilogi. 14 Sidu thara onek din thelak hinottei, Festase Paular hodagan rajabuore holo, “Ek jon manus Felixe bondi gori phelei jei. 15 Mui Jerusalem sohorot elungge lokkene moha rajguruthagurune ar Judai manuschunor borjonnune tar sombonde more janeiondi, ar tar biruddie bijier gori dibartei hujoli gorsiondi. 16 Mui tharare uttor dinei hoiong, ‘Dujibuoi tare duj badeidiegundoi mujungo-mujungi oinei tar dujchanottun tare the bajeibartei sujuk no die gori morei pelana Rom nagorigor dostur noi.’ 17 Senottei, thara eksomare mor idu einei bijieran diri phelei no die gori tar hellie mui bijiero jaganot bojinei manuschuore anibartei mui ugum duong. 18 Tare duj badeidiegune hobartei thiei udinei, mui asha gorsiongge doge thara tare huno ekkan duj badei di no paron. 19 Hintu tharar nijor dhormo sombonde tar biruddie hobar elo ar sien olode Jisur nange ek jon elo, jibe morsie ar Paulai the jeda oie bili hoi. 20 Mui sienir sombonde hobor no pang hinottei, sienor sombonde bijier gora oi para the Jerusalem Sohorot jebar mone hoi ni no hoi mui pujor gorsiong. 21 Hintu Paula jokkene bijieran moharaja Augustor sidu abitti seie, mui tare Kaisara sidu padei duong song tare rageibartei mui ugum duong.”
22 Sebeden Agripa Festasore holo, “Mui nijeio tar bijieran sunibar mone hoi.” Ar Festase holo, “Hellie tui tar bijieran sunis.”
Agripa Mujungot Paula
23 Senottei tar hellie Agripaloi Bernise lunginei, senapotigun? somot ar sohoranor ajol ajol manuschun somot bor gudhibuot jakjomog gori somilogoi. Ar Festasor ugumo onusare Paulare siot bhoreilakki. 24 Sebeden Festase holo, “Raja Agripa ar amar loge agode beg manuschun, ei manuschuo sawh! Tar sombonde goda Judai manuschunor jhagkuoi mor idu abitti gorsion. Jerusalem sohorot ar iduio jogar pari-pari hoion the baji thebar lak noi! 25 Hintu tar morana dondo obar lak bili the hitchu duj no gore bili mui hobor peinei, ar the nijeio moharaja Augusto sidu abitti seie hinottei, tare padei dibartei mui thik gorsiong. 26 Tar sombonde moharajare jodepode gori mor legibar hitchu nei. Senottei mui tomar begkunor mujungot, bes gori raja Agripa mujungot tare nigilei anilung. Ami tare porikkie goranar porendi tar sombonde hiju legibar thai para. 27 Haron mui mone gorongge duj badei no die gori ek jon bondi gori padei dena jukti noi.”