Makidonia ar Greece Rejjiot
20
Jagulugkan thameinei, Paula sisjiogunore tar idu dagilo. Ar tharattun bidei loinei Makidonia rejjiot gelogoi. 2 The sei baman phuri jade sigunore onek buk bani di jeinei Greece rejjiot lungilogoi. 3 The sidu tin mas thelo. Ar the Syria rejjiot jahajodi jebar oinei, Judaiune tare hab di thelak. Senottei the Makidonia rejjiodi jebartei thik gorilo. 4 Ei manuschun tar somare Asia dej song jeion, Beria sohorottun Sopater, thessalonika sohoro hullie Aristarkaloi Sekundu, Derbe sohorottun Gaius loi Timothi ar Asia dejor manus dijon Tykhika loi Trophima. 5 Igune akke-akke jeinei Troas sohorot amare barsei roiondoi. 6 Hintu moli no gullie Pidie utchobo dinuno porendi, ami Philippi sohorottun jahajot gori jeiei. Pas dino porendi ami Troas sohorot lunginei thararloi egottor olong ar sidu ek sapta thelong.Troasot Paular Seba Ham
7 Saptar polim dinnuot, sisjio-gune jokkene eksomare pidie hotta goribartei ejchion, ar Paula tar hellie jebarloittei jugol oie hinottei, the thararloi hoda hode-hode reid song bhag oie. 8 Uguro tolat thara thubeionde siot onek lembo dhoreion. 9 Ekkuo phogodi hanat bojinei Eutyka nange ek jon gabur manus ghum jeie. Paula hoda hode, the ghume-ghume tin tolattun porineigoi tare mora bade tulliondoi. 10 Sebeden Paula tole lamineigoi tare sibi-sibi aza gorinei holo, “Mon jagulug no gorsio, haron tar ejo poran age.” 11 Sebeden Paula aro ugure udineigoi pidie hotta gorinei helo. Ar the hoda hode-hode phor olo. Sebeden the gelogoi. 12 Ar thara gabursiere nejeiondoi. The jeda oie hinottei tharar baari sahoj barilo.
Ephesi Borjonnunottun Paular Bidei
13 Sebeden ami akke-akke jahajchanot jeinei ar jahajot gori Assos adamanot gelong. Siottun Paulare tuli lobonggoi gori mone-mone thik gorsei. Haron the ugum dede jei the torbuo jebar thik gorsie. 14 Ar Assos adamot ami tare lak peinei tuli loinei Mitylene sohorot gelong. 15 Siottun ami jahajot gori gelong ar tar hellie ami Kios dippuo uju lungilongoi. Aro tar hellie ami Samos dippuot lungineioi, Trogullio adamot roiegoi. Sebeden tar hellie ami Miletus sohorot lungiegoi. 16 Haron Asia dejot ami somoi nosto gori no pei para, Ephesi sohoran tek habi pelai jebartei Paula thik gorsie. Haron judi sombob ole, the Pentikost Dinnuot Jerusalem sohorot lungibarloittei hijie-hijchie bajeie.
17 Miletus sohorottun Paula Ephesi sohorot manus dipadenei mondolir borjonnunore daga bajei dilo. 18 Ar jokkene sigune lungilakki, the tharare holo, “Tumi hobor po mui Asia dejot ejchiongge polim dinnuottun dhori mui tomar moiddie hi poribhese roiong. 19 Beg niroittaniloi, sogo pani phelei phelei ar Judaiune more morei pheleibar seionde sienir darai porikkie moiddieo Probure mui sebona gorsiong. 20 Tumi hobor po tomartei jieni labhoban sieni mui ekkanio no rageinei tomare janei duong. Ar mui ghore ghore berei-berei hulomela gori tomare sigeiong. 21 Judaiunore ar Grik manuschunore shakki di di, Itchioro pokke mon phereibartei ar amar Probu Jisu Kristore bischias goribartei mui tharare janei duong.
22 “Ar ikkie tumi sawh, Pobitro Aptai more Jerusalem sohorot ja bajei der. Sidu mor hi obo hobor no pang. 23 Prottiek sohorot Pobitro Aptabuoi more uij dede doge mui bana ien hobor pangge jei jiel-hanagane ar hostogane more barsei age. 24 Hintu sienie more larei no pare, ar mor jibonan mortei moillio bilio mui mone no gorong. Hintu bana mor dumuro-dumurigan hujhi gori thum gorana ar Probu Jisuttun mui peiongge haman purei dena. Mor haman olode Itchioro doyegano sombonde gom hoboranore shakki dena. 25 Itchioro rejjiogano sombonde janei dibartei mui tomar begkuno idu jeiong. Ar ikkie sawh, mui hobor peiongge tumi mor muon aro no degibar. 26 Senottei, mui edchie shakki duongotte jei mui begkunor ni-duji loganor bodobagittun sarchuong. 27 Haron Itchioro beg hodagan tomare janei no die gori mui bagi no ragang. 28 Senottei, tomar ugure ar beg dolluo ugureo uijkar oio. Pobitro Aptai tharar moiddie tomare sedon seresta gorie baneie. The tar nijor loloi hinniede Itchioro mondolibuore soreio. 29 Haron ien mui hobor pang, mui janar porendi, era haande jharbuo hugur tomar moiddie sominei dolluo dongso goribakki. 30 Ar tomar moiddiettunio udinei, sisjiogun tharar pokke pharok gori nejeibartei jore-ie hoda hobak. 31 Senottei uijkar oio. Tin bojor song mui sogo pani phelei phelei reide-dine no thameie gori tomare jon bagene uij duongge sien monot tullio.
32 “Senottei bheilog ikkie mui tomare Itchiorbuo sidu gojei duongor. Ar tar doye hodaganotio mui tomare gojei duongor. Siene tomare gorei tuli paribo, ar pobitro oionde sigunor begkunor moiddie tomare odhiharo sompotti dibo. 33 Mui haror sona, rubuo bah habor lubbo no gorong. 34 Tumi hobor po mor ei adtanie mor dorkari jinijchani hamei die ar mor loge elakke sigunor dorkari jinijchanio hamei die. 35 Mui tomare sieni begkani degeiong. Tumio sedogkie gori ham gorsio. Bolneiegunore bol dibartei thajei ham gora pore. Probu Jisu hoiede hodagan monot tullio, ‘Pana darane denagan bes asirbad.’ ”