Ephesi Sohorot Paula
19
Ar edogkie olo, Apollo Korinth sohorot thagke Paula uguro bamedi torbuo einei Ephesi sohorot lunginei hoiek jon sisjio lagot pelogi. 2 The tharare holo, “Tumi bischias gorinei Pobitro Apta peio ni?” Ar thara holak, “Pobitro Apta age bilio ami no suni.”3 Sebeden Paula tharare holo, “Tumi hi baptisma loio?” Ar thara uttor dilak, “Johonor baptismagan ami loiei.” 4 Ar Paula holo, “Johone mon phiranar baptisma gori die. The manuschunore hoiede tar porendi ebode sibiere bischias goridak ar sibie olode Jisu Kristo.” 5 Sigune sei hodagan suninei, Probu Jisur nange baptisma lolak. 6 Ar jokkene Paula tharar ugure ad tuli dilo, Pobitro Apta tharar ugure elo. Sebeden thara oinnio hodadi hoda hoinei ar muni dogkie gori hoda holak. 7 Perai thara begkune olakke baro jon.
8 Paula synagogot jeinei tin mas song sahoj gori hologoi. Haron degei di di Itchioro rejjior sombonde manuschunore bujei dilo. 9 Hintu ek dagie akkol han oinei bischias no gorilak ar Podtano biruddie manjior jhagkuot sorjeiondoi. Sebeden Paula tharattun pharok oinei, sisjiogun tar loge nejeilo ar nitto sei hodagani Tyranu iskulot huobula goron. 10 Ar sedogkie gori di bojor song solilo. Senottei Asia dejot thande sigune begkune, Judai manuschune ar Grik manuschuneo Probu Jisur hodagan sunilak.
11 Itchiore Paula adedi huno din no oie oborug ham gorilo. 12 Rumol hani bah ursie habor tar heyettun aw-sugkieguno sidu ni dile biedigani gom oi ar dujto aptagun nigili jan. 13 Sebeden hoiek jon bereie Judai manjie bhud dabei duonde sigune dujto aptai peiegunore Probu Jisur nangandoi nije dabei dibar sesta gorilak. Thara holak, “Paula prosar gorsiede Jisur nange ami ugum dir, tumi nigili jo.” 14 Skeva nange ek jon Judai manjior rajguruthagur elo. Tar sattuo puoio sien gorsion.
15 Ekkuo dujto aptai uttor dinei holo, “Jisure mui sinong, Paulareio mui sinong hintu tumi honna?” 16 Sebeden dujto aptai peie manuschuoi tharar ugure phal mari udinei tharare odei dilo. Tharar begkunottun the bes boli hinottei sigune ghoranottun uttie langda aghat oinei dhei jeiondoi. 17 Ien Ephesi sohorot thande beg Judai manuschuno sidu ar Grik manuschuno sidu hobor olo. Begkunor dor buguot somilo ar Probu Jisur nangan dangor olo. 18 Onek jon bischias gorsionde sigune siot einei haam heinei tharar bojong hamani holakki. 19 Boiddio-ali goriei onek jone tharar boiun aninei begkuno mujungot puri pheleilakki. Sei boiunor damani ijeb gori selakke, begkune ponjas azar rubuor tenga?. 20 Sengori Probur hodagan shang-gadik gori bari jeinei, jidilo.
21 Sieni begkani phurona porendi, Paula Makidonia ar Akaia rejjiogani berei-berei jeinei Jerusalem sohorot jebar mone-mone thik gorinei holo, “Mui sidu lungonar porendi, mor Rom sohoroto ja poribo.” 22 Sebeden tare ham boldie di jon Timothi ar Erastasare Makidonia rejjiot padeilo. Hintu the hoiek din Asia dejot thelo.
Ephesi Sohorot Gondogul
23 Sei lokkene Podtano som-bonde birat gondogul udilo. 24 Haron ek jon Demetria nange rubuo bannie sokkene elo. The Dienar shani ghoran rubuoloi banai ar the onek ham gorie rageie. 25 The tar dogkie haligorun ar hamgoriegun eksomare daginei tharare holo, “Bheilog, tumi hobor po ami ei bebshaganottun lab peir. 26 Bana Ephesi sohorot noi hintu perai goda Asia dejot hi olo tumi degor ar sunor. Ei Paulai adtoi baneie itchiorun Itchior noi hoinei bujei dinei di onek jon ujuleinei phirei nejeilo. 27 Senottei bana amar bebshagan dongso no obo, hintu dangor Itchior Diena mondirbuoio jien goda Asia dejor manjie ar songsaro manjie tobona goron sienor oborugkan obohela obo ar dongso obo.” 28 Ei hodagan thara suninei shanggadik rak udilo ar joi jogar pari-pari holak, “Ephesi hulliegunor Diena oborug!” 29 Sebeden goda sohoran gondogul olo. Tamaja ghoranot thara begkune eksomare geja-gejchie gori jeinei Makidonia hullie Paular porbhajo somarsie Gaiusore, ar Aristarsare dhorilak. 30 Ar Paula manjior jhagkuot jebar seinei sisjiogune tare jebar no dilak. 31 Sebeden Asia dejottun hoiek jon murubbi jigun tar bondhu elak sigune tare tamaja ghoranot no jebartei hobor dinei hujoli gorilak.
32 Ek dagie ekkan jogar parinei hon ar ek dagie aro ekkan jogar parinei hon. Senottei, birat jagulug olo ar tharar begbhage hittei thubeion hobor no pan. 33 Hoiek jon Judai manjie Alexanderore manjior jhagkuottun thelinei bar gorilak. Sebeden the ad bijinei manjior jhagkuor mujungot tare the bajeibar selo. 34 Theo Judai manus bili hobor peinei, thara begkune eksomare perai di ghonta song jogar pari-pari holak, “Ephesi hulliegunor Diena oborug!”
35 Sohoro heranibuoi manuschun olor gorana porendi, the holo, “Ephesi hulliegun, begkune hobor pan Zeusottun jhuri porsiegidie dangor Diena debir subhibuo ar tar mondirbuor rakkoligun olade tumi. 36 Senottei, ieni bharebar noi hinottei tumi sub ona dorkar ar abadaschie hitchu no gorsio. 37 Haronan olode tumi idu anniode sigune tomar mondirbuo no luddon ar tomar Itchiorbuor biruddie noio sorjan. 38 Senottei, Demetriar ar tar haligor somarsiegunor judi haro biruddie abitti thele, podtan hulo age ar bijierokkunio agon. Tharar sidu abitti dedogkoi. 39 Hintu tomar judi hitchu hobor pujor goribar thai, sien temmangot aino doge gora obo. 40 Haron edchie gondogulanottei ami daga hei pari, ar iot niom sara gori thubeilonggidie huno ekkan haron nei.” 41 Ar sien the hoinei manjior jhagkuo bhonggo gori dilo.