Jerusalem Sohorot Temmang
15
Ar hoiek jone Judea rejjiottun sidu jeinei bhei-logkunore sigeilakkoi, “Mosir dosturo doge tumi sundu-sam no habilie mukti peda noi.” 2 Senottei, Paula ar Barnaba sigundoi birat mana-mani no oinei torgo bajilo. Sebeden ei prosonnogandoi Jerusalem sohor song jeinei apostoluno sidu ar borjonnuno sidu jebartei Paulare, Barnabare ar tharattun hoiek jon thik gorilak. 3 Senottei, mondolibuoi tharare dipadenei, thara Phoenikia rejjiogan ar Samaria rejjiogan phuri jade, Be-jadtune hingori Itchioro sidu phiri elak sien thara janei dilak. Sei hoborandoi beg bheilogkune baari hujhi olak. 4 Thara Jerusalem sohorot lunginei, mondolir manuschune, apostolune ar borjonnune tharare gojhi lolak. Itchiorbuoi Paulaloi Barnabar darai gorsiede sieni begkani thara holak. 5 Hintu hoiek jon Pharisi dolottun bischiasi manjie udinei holak, “Be-jadtune sundu-sam habana dorkar ar thara Mosir Nioman paleibartei ami tharare ugum di.”6 Sebeden ei hodagan sintie goribartei apostolune ar borjonnune eksomare thubeilak. 7 Bhalukkon thara huobula goranar porendi, Pitore thieinei tharare holo, “Bab-bheilog, tumi hobor po agendi Be-jadtune mor muottun gom hoboran suninei bischias goron para Itchiore amar moiddiettun bei tullie. 8 Itchiore ontorani hobor pai hinottei, amare dede dogkie gori tharare Pobitro Apta dinei gojhi loie bili degeie. 9 Bischiaso darai tharar ontorani poriskar gori dinei amarloi tharare hitchu pharok no gore. 10 Senottei, ikkie hittei amar Purbo-puruschunune ar ami boi ni no parsie jungol sisjioguno gortona ugure tuli dinei Itchiorore porikkie sor? 11 Hintu ami bischias gori Probu Jisu Kristor doye darai thara dogkie gori amio mukti obong.”
12 Sebeden beg manjior jhagkuo olor oinei Barnabar ar Paular hodagani suni agon. Tharar darai Itchiore hingori Be-jadtuno moiddie sinno ar amok ham gorsie sieni thara janei dilak.
13 Ar thara olor oinei, Jakobe uttor dinei holo, “Bab-bheilog, mor hoda suno. 14 Simeone hoiede hingori Itchiore akke Be-jadtuno sidu bereinei tar nangan loie manus obartei tharar moiddiettun basoni gorsie. 15 Sastrot lega agede doge ei hodagandoi muniguno hodagan milie,
16 ‘Ienir porendi mui phiri einei Davidor jhuri porsie terpal haboran aro tulimbi. Bhangi jeieni mui aro tulimbi.
17 Bagi manuschune ar mor nangano darai daga oiede Be-jadtuneo Probure togan para, sieni begkani gorsiede PROBUIE hor.’
18 “Purbettun dhori Probuie beg tar hamani hobor pai. 19 Senottei, Itchioro sidu ettonde Be-jadtunore ami jagulug no gorana. Ien mor bijiere hoi. 20 Hintu ami tharare legi jene thara muktie aw-pobitro gorsie jinijchanittun durot than, shanda hamortun durot than, ar gortona mujoridinei morei phellie jinij ar lo no haan. 21 Haron agottun dhori onek piri song Mosir hodagani prottiek sohorot prosar gori ejchuon, ar prottiek Sabbath bagene synagogot sieni madei etton.”
Jerusalemo Temmango Uguman
22 Sebeden apostolune ar borjonnune tharar moiddiettun manus bei loinei, Antiok sohorot padei dile gom obo bili mone gorilak. Ar goda mondolibuoio sien manilo. Paula ar Barnaba loge jei paron para, hellie-nange Barsaba dagonde Judare ar Silare thara bei lolak. Thara olakke bheilogkuno moiddie murubbi. 23 Tharar ade ei sidigan padei dilak: Ami apostolune, borjonnune ar Bheilogkune, Antiok sohorot, Syria rejjiot ar Kilikia rejjiot agonde Be-jad bischiasigunore salam janeinei legir.
24 Ami suinneidie amattun hoiek jon tomar idu einei tharar hodaloi tomar monani jagulug gori dinei, tomar bischiaschan shiongshama gori duondi. Thara tomare hoiondi, “Tumi sundu-sam habi peba ar Mosir Nioman palei peba.” Sedogkie gori hobarlittei ami tharare ugum no di. 25 Ami ega mone temmang gorinei, tomar idu bei tullie manus amar agojor Barnaba ar Paula loge dipadele gom obo bili mone gorilong. 26 Barnabaloi Paula olakke amar Probu Jisu Kristor nanganottei jibon bajeie manus. 27 Senottei, ami Judare ar Silare dipadelong. Tharaio muendi sei hoboran suneibakki. 28 Haron ien Pobitro Aptai ar ami gom bili mone gorir jei ami tomare gour bugi bugeidi didong noi. Ieni olode dorkari hodagani: 29 Moktire gojeie jinij no heio, lo no heio, gortona mojori dinei morei phellie poshur era no heio ar shanda no gorsio. Tumi judi ienittun durot thago baari gom obo. Bejar no oio.”
30 Senottei, tharare dipada oinei thara Antiok sohorot elak. Thara manjior jhagkuo eksomare daginei sidigani dilak. 31 Thara sidigani madanar porendi shantona peinei hujhi olak. 32 Judaloi Sila thara nijeio muni hinottei, onek hodadi bheilogkunore uschoni tuli dinedi shokto gorilak. 33 Sidu thara hoiekdin thanar porendi, tharare apostoluno sidu bheilogkunottun salam somot Jerusalem sohorot phirei dilak. 34 Hintu sidu thana-gan gom obo bili Sila bhabilo. 35 Paulaloi Barnabaio Antiok sohorot thelak. Onek jon somot thara Probur hodagan sigkie di di prosar gorilak.
Paula Ar Barnabar
Modor Aw-mil
36 Sebeden onek din porendi Paula Barnabare holo, “Probur hoda prosar gorseidie prottiek sohoranit phiri jeinei bhei-logkunore hobor dorigoi ar thara hi gorton segoi.” 37 Hellie-nange Marka honde Johonore Barnabai tharar loge ebartei mone holo. 38 Hintu Paulai sien thik mone no gorilo. Haron Marka tharar loge hamot no jeinei tharare Pamphylia rejjiottun phelei ejchiegoi. 39 Sebeden ettoman mana-mani no olak jei thara pharok olak. Ar senottei Barnaba Markare loinei Kupra dippuot jahajot gori gelogoi. 40 Paula hintu Silare bei lolo. Ar bheilogkune tare Itchioro doyenot gojei dinei theo gelogoi. 41 Syria ar Kilikia rejjiogani berei-berei jeinei mondoligunore shokto gorilogoi.