Kornelia Pitorore
Daga bajei Dilo
10
Sei lokkene Kaisarea sohorot ek jon manus elo, tar nangan olode Kornelia. The Italy Soinnio Dolluot ek shot soinnio ugure neta. 2 The Itchiorore bhokti gorie elo, the ar tar ghoda ghorbobuo Itchior dhoran. The manjiore mon-hulo gori dan gore ar Itchiorottun onsur bor mage. 3 Ekdine perai tin porsie somoiot, ekkan aziliet tar sidu ekkuo sorgo-dud ette porak-porak gori the degilo. Ar sorgo-dudtuoi tare holo, “Oh Kornelia!” 4 The jokke tare rini selo, the dorenei tare holo, “Probu, ien hi?” Sebeden sorgo-dudtuoi tare holo, “Tui bor magorsie sieni ar tor danani monot udibartei Itchioro samne lungiegoi. 5 Hellie nange Pitor honde Simonore hoja jebartei Joppa adamot ikkie manus dipada. 6 Sagoro hai, Samara bejede Simono ghorot the age. Tor hi gora poribo the tore hobo.” 7 Tarloi hoda hoiede sorgo-dudtuo jeneigoi, Korneliai tar ghoro sagorsie di jon ar tare onsur barsei thande sigunottun ek jon bhokti-bola soinnio dagilo. 8 Sebeden Kornelia tharare begkani bhangi holo ar tharare Joppa adamanot dipadelo.Pitore Azilie Degilo
9 Tar hellie, thara jade ar adamo hai lungineioi, dibursie Pitore bor magibartei salo ugure udilogoi. 10 Tar baari ped purilo ar bhat hebar mone hor. Hintu jokkene thara bhat hebartei jugolodon, Pitore be-us olo. 11 Sebeden sorgogan hulo gori the degilo ar seirhun bannie budhi dogkie gori ekkan jinij tar sidu lambegi ar madit portegi the degilo. 12 Sieni bidirie, pittimir nanan doronor ser thenggie poshu, jharbuo jontur, buk sejerei berande jib-jontur, ar peik elak. 13 Sebeden the ekkuo ro sunilo. Robuoi hor, “Pitor, uth marinei ha.” 14 Hintu Pitore holo, “Na, Probu! Haron mui huno din aw-pobitro bah aw-poriskar jinij no haang.” 15 Di barot aro robuoi tare holo, “Itchiore jien pobitro gori die, sien tui aw-pobitro no hos.” 16 Sien tin bar onar porendi, sien sorgot aro tuli neja olo.
17 Pitore azilie degkiede sieno orthogan the mone-mone bhabi satte lokke, sawh, Kornelia dipadeiede manuschune Simono ghoran pujor gortondi ar thara giriegano duorano mujungedi thiei agondi. 18 Ar thara daginei, hellie-nange Pitor honde Simone siot thai ni no thai pujor gorilak.
19 Pitore aziliegano sombonde bhabi satte lokke, Aptabuoi tare holo, “Sa, tin jone tore togadondi. 20 Senottei, uth, lamboi ar hitchu mone no gorinei tharar loge ja. Haron mui tharare dipadeong.”
21 Sebeden Kornelia dipadeiede manuschuno sidu Pitore laminei jeinei hologoi, “Tumi togotte sibie mui. Hittei ela?”
22 Ar thara holak, “Kornelia ek shot soinnio ugure netabuoi, dharmigkuo ar Itchior bhokti ar beg Judai jador nangkorabuottun ami ejchiei. Ekkuo pobitro sorgo-dude tar ghorot tortun hobor sunibartei tore daga bajei die.” 23 Senottei, Pitore tharare ghoro bidirie dagilo ar tharare thebar jaga dilo.
Pitore Korneliar Ghorot
Tar hellie, Pitore tharar loge gelogoi ar tar loge Joppa adamortun hoiek jon bheilog tar loge jeion. 24 Tar hellie Pitore Kaisarea sohorot lungilogoi. Kornelia tar hudummogun ar tar ghonatie bondhugun dagi thu-beinei tare barsei age. 25 Pitore somadegi, Kornelia tarloi egottor oinei tar thengot porinei tobona gorilo. 26 Hintu Pitore tare tulinei holo, “Thie, muio manus daw!” 27 Tarloi hoda hoi-hoi bidirie somineigoi onek jon ejchionde the degilogoi. 28 Sebeden Pitore tharare holo, “Tumi hobor po Judai manus oinnio jadtoi bera-beri gorana bah song pora-pori ona be-aini. Hintu harore aw-pobitro bah aw-poriskar no hobartei Itchiore more degeie. 29 Senottei, more hoja dipadeono abitti no gorsie gori mui ejchiong. Sokkene mui pujor gorsiong, hittei more hoja ejchio?” 30 Ar Korneliai holo, “Gelle ser dino agendi, thik ei oktot mui ubos thagke tin porsie mui mor ghorot bor magode suno, ek jon manus jhimid-jhimid jolede habor ursie gori mor mujungedi thieiegi. 31 Ar the holo, ‘Kornelia, Itchiore tui bor magorsie sieni suinnie ar tor danani monot tullie. 32 Senottei, Joppa adamot manus dipadenei Simonore daga bajei de. Tar hellie-nangan olode Pitor. Sagoro hai, samara baneie Simono ghorot the thai. The ele, the tore hobogi.’ 33 Senottei, jogon-togon mui tor sidu manus dipadeong ar tui ejchios hinottei baari gom oie. Ikkie senottei, ami begkune Itchioro samne agidie Itchiore tore ho bajei dede sieni sunibartei.”
34 Sebeden Pitore ho arambo gorilo, “Soittio gori mui degongge, Itchiorottun eitzabor nei. 35 Hintu jad bagene, je tare bhokti gore ar dharmig ham gore tare Itchiore gojhiloi. 36 Jisu Kristo darai Shantigan prosar gora oiede hodagan Itchiore Israelo puogunore dipadeie. The begkunor Probu. 37 Johone baptisma sombonde prosar gorana porendi, Galili rejjiot arambo oinei, goda Judea rejjiot prosar gora oiede hodagan tumi hobor po daw. 38 Tumi hobor po Itchiore Nazareth hullie Jisure hingori Pobitro Aptaloi ar hemodaloi tel guli die. The berei-berei jeinei Diabola? hosto lageiede sigunore gom ham gori diegoi ar tharare gom gori diegoi. Haron Itchiore tar loge elo. 39 Jerusalem sohorot ar Judaiuno rejjiot the gorsiede sienir begkanir shakki ami agi. Tare gajot tanginei morei phellion. 40 Tare Itchiore tin dine jiei tulinei hulomela gori degeie. 41 Begkune noi hintu, Itchiore akke dhori bei loiede shakkidiegune tare degkuon. The morattun jiei uduonar porendi, jei, the amio tar loge haba-daba gorsei. 42 Manjiore ami prosar goribartei ar shakki dibartei the amare ugum dede olode moragunore ar jedagunore Bijier goribartei Itchiore thik gorsiede sibie. 43 Beg munigune tar sombonde shakki duonde jei, tar nangano darai je tare bischias gore the pab hema pebo.”
44 Pitore ei hodagani horte seiet, je sei hodagani suinnie sigunor begkuno ugure Pobitro Apta porsiegi. 45 Pitoror loge ejchionde sundu-sam happie bischiasigune amok olak, haron Pobitro Aptar danan Be-jadtuno ugureo porsiegi. 46 Haron oinnio hodadi Itchiorore thara baini gorte suinnion. 47 Sebeden Pitore holo, “Ami Pobitro Apta peieidie dogkie gori ei manuschuneio Pobitro Apta peion. Thara baptisma no goribartei honna tharare badha di paribo?” 48 Sebeden thara Probur nange baptisma lobartei the ugum dilo. Ar tharar loge hoiekdin thebartei tare hujoli gorilak.