Saular Nuo Jormo
9
Probur sisjiogun morei pelana ar dhomki lagana Saular ejosong il no oinei, the moharaj-guruthagurbuo sidu gelo. 2 Milie ok morod ok nuo Podtan adeie judi the pai, tharare Jerusalem sohorot bani anibartei Damaska sohoro synagogottei tartun sidi magilogoi. 3 The jade Damaska sohoro hai lungineioi, jhimid gori sorgottun ekkan phor tar seropala phudilogi. 4 Sebeden the madit borat gori porilo, ar ekkuo roi tare hode sunilo, “Saula, Saula, tui hittei more hosto lagor?” 5 Ar the holo, “Probu, tui honna?” Sebeden robuoi holo, “Mui Jisu, tui hosto lagotte sibie.” 6 Saula amok oinei girgirer. Ar the holo, “Probu, tui more hi gora bajei dibar sas? Sebeden Probuie tare holo, “Tui uth ar sohoranot ja, ar tui hi gori pebe tore huo obo.” 7 Saula loge jadonde sigune robuo sunon hintu huno jonore no deginei madnei gori thiei agon. 8 Sebeden Saula madittun udilo, ar the jokke tar sogkun melilo the harore no dege. Hintu tare adot dhorinei nejeinei Damaska sohorot bhoreilakkoi. 9 Tin din the han gori roie, ar bhat-pani no hai.10 Sei lokkene, Anania nange Damaska sohorot sisjio ek jon elo. Aziliet tar sidu Probuie dega dinei holo, “Anania!”
Ar Anania holo, “Probu, mui iot agong.”
11 Ar Probuie tare holo, “Tui udinei Uju honde podtanot ja, ar Judar ghorot Tarsa hollie Saulare togagoi. Haron the bor mager. 12 Ekkan aziliet Saula degilode Anania nange ek jon manus einei, the dege para the tar ugure ad tuli derli.” 13 Hintu Anania holo, “Probu, mui onek manjiortun suinniong, Jerusalem sohorot the tor sadhu manuschunore hodog hoti gorsie. 14 The tor nangan idot thulon sigunore bani nibartei the rajguruthagurunottun odhihar loinei idu ejchie.” 15 Hintu Probuie tare holo, “Ja, haron the olode mor bei loie aittieran. The mor nangan be-jadtuno sidu, rajaguno sidu, ar Israel manuschuno sidu nejei dibo. 16 Haron the mor nanganottei hi-hi hosto gori pebo mui tare degeim.”
17 Sebeden Anania jeinei ghoranot somilogoi, ar the tar ugure ad tuli dinei holo, “Oh Bhai Saula, tui ette podot tor idu dega diegidie sei Probu Jisure, tui degos para ar Pobitro Aptaloi boron os para more dipadeie.” 18 Jogon-togon tar sogkunottun ekkan sogola dogkie jinij jhuri porilo ar the logot porak-porak gori deger. Sebeden the udilo ar baptisma lolo. 19 Ar the bhat haanar porendi tar bol bhorilo.
Saula Damaska Ar
Jerusalem Sohorot
20 Sebeden Saula Damaska sohorot hoiek din sisjioguno somare thelo. Ar the jogon-togon synagogot Kristo Itchioro puo bili prosar gorilo. 21 Jigune sunon sigune begkune amok oinei hon, “Jerusalem sohorot je ei nangan loi sigunore dongso gorsiede ar sei uddischuoi, rajguruthaguruno sidu bani nibartei idu ejchiede sibie ete noi ni?” 22 Hintu Saula siebes shokto gori proman die jei, ei Jisu olode Kristo, ar the Damaska sohorot agonde Judaiunore jagulug bajei dilo.
23 Onek din bidijanar porendi, Judaiune tare morei pheleibartei jugol gorsion. 24 Thara dine-reide girie-duoranit tare morei pheleibartei hapdi than. Hintu Saula sien hobor peie. 25 Sebeden sisjiogune tare reidot nejeinei ekkuo dangor harangot bhoreinei giriegano hanadi lamei duon. 26 Ar jokkene Saula Jerusalem sohorot lungilogi, the nije sisjio-gundoi egottor obar sesta gorsie. Hintu thara begkune tare doreon, ar the ek jon sisjio oie bili thara bischias gori no paron. 27 Sebeden Barnaba tare loinei apostoluno sidu tare annie. Podot Saula hingori Probure degkie, Probuie tarloi hoda hoie, ar Damaska sohorot the hingori sahoj gori Jisur nange prosar gorsie, sieni Barnabai tharare janei die. 28 Senottei Saula tharar loge Jerusalem sohorot theinei ejana jana gorilo. 29 Ar the sahoj gori Probu Jisur nange prosar gorilo, ar Grik hoda honde Judaiundoi the torgo gore. Hintu thara tare morei pheleibar uddischuo loion. 30 Hintu bheilogkune sien hobor peinei, tare Kaisara sohorot lamei aninei, Tarsa sohorot padei dilak. 31 Sebeden goda Judea, Galili, ar Samaria rejjioganit mondoligunor shanti olo ar tharar bol olo. Ar Probur dhoranot theinei ar Pobitro Aptar bujunoganot theinei thara bari gelakkoi.
Ainea Ar Dorka
32 Sei lokkene Pitore goda dejchanot berade-berade, Lydda adamanot thande sadhu manus-chuno siduio the elo. 33 Sidu the ek jon manus lagot pelo, tar nangan olode Ainea. The ajor pirie oinei attio bojor song bischonot pori age. 34 Pitore tare holo, “Ainea, Jisu Kristoi tore gom gorilo. Udinei tor bischonan somori tho.” Sebeden the jogon-togon udilo. 35 Senottei Lydda adamanot thande sigune begkune ar Sharon tholanot thande sigune sibiere deginei thara Probur mokkie phirilak.
36 Sei lokkene Joppa adamanot ekkuo sisjio elo tar nangan olode Tabitha. Sieno orthogan olode Dorka. Ei miliebuoi onek gom ham gorsie ar onek dan gorsie. 37 Hintu sei lokkene hi olo, the aw-sug oinei morei gelo. Tare gadei dinei uguro tolat tholakkoi. 38 Lydda adaman Joppa sohoro hai hinottei, ar sisjiogune suinnionde Pitore sidu agegi. Thara tar sidu di jon manus padeilak, ar jhadi gori tharar sidu ebartei hujoli gorilak. 39 Sebeden Pitore udinei sigunor loge gelo. The jokke elo,
tare uguror tolabuot nejeilak. Beg rani-miliegune tar hai thieinei gujhi-gujhi handon, ar the baji elode lokke the shileiede shilummun ar bunniede haborani degadon. 40 Hintu Pitore tharare begkunore nigilei dilo ar the adu parinei bor magilo. Ar the morabuo mokkie phirinei holo, “Tabitha, uth.” Sebeden Tabitha sog melilo ar the Pitorore deginei udinei bojilo. 41 Ar Pitore tare adot dhorinei tulilo. Sebeden the sadhu manuschun ar rani-miliegun daginei tare jedabade tharar sidu gojei dilo. 42 Sei hoboran goda Joppa sohoranot shidie gelo ar onek jone Probure bischias gorilak. 43 Joppa sohoranot Simon nange ek jon samara baneie elo. Sibier ghorot Pitore onek din thelo.