Stephana Senhedrinnuore Holo
7
Sebeden moha rajguruthagurbuoio holo, “Ei hodagani oi ni?” 2 Stephanai holo, “Bab-bheilog, suno. Amar Purbo-puruschun Abrahame Haran adamanot thebar agendi, Meso-potamia dejot thagke Oborug Itchiorbuoi tar sidu azil oiegoi. 3 Itchiorbuoi tare hoie, ‘Tor dejchan ar tor sodorsiegun phelei ja, mui degei dimbie dejchanot jagoi.’ 4 Senottei, Chaldea manu-schunor dejchan phelei jeinei Haran adamanot bojotti gorsie. Tar babe morinei, siottun ei dejchanot tare lara oie jiot ikkie tumi ago. 5 Itchiore siot hitchu odhiharo sompotti tare no de, ekhus madio no de. Hintu Abrahame puo no padeio, tar porendi obakke tar bongsogunore sompotti ijebe dejchan dibartei tare soittio die. 6 Hintu Itchiore edogkie gori hoie: Tor bongsogun bi-dejot thei pebakkoi. Ar sidu thara banidajit ar hostot ser shot bojor thei pebak. 7 Itchiore hoie, ‘Tharare banidajit hadeibode jadtuore mui sasti gorim. Tar porendi thara sei dejchanottun nigili einei ei dejchanot more sebona goribakki.’ 8 Ar Itchiore Abrahamore sundu-sam habana nioman die. Senottei Abrahame Isaakore jormo denar porendi attio dinot tare sundu-sam habi die. Isaake Jakobore jormo die, ar Jakobe baro jador Purbo-puruschunun jormo die.9 “Sei Purbo-puruschunune hinsie udinei Josebore Egypt dejot beschondoi. Hintu Itchiorbuo tar loge elo. 10 Itchiore Josebore beg hostoganittun bajeie ar Egypt dejor raja Pharao tare hospai para ar tar gyenan hobor pai para gori di die. Ar Pharao tare goda Egypt dejchano ugure ar tar ghorbobuo ugure sason-gorie baneie. 11 Sebeden goda Egypt dejchano ugure ar Kanaan dejchano ugure bhadorad porinei shanggadik hosto lungilogi. Ar amar Purbo-puruschununor hebar nei olo. 12 Hintu Jakobe Egypt dejot gom agon bili suninei, polim the amar Purbo-puruschunun dipadeie. 13 Ar di barot Josebe tar bheiunore sin porisoi dilo. Sebeden Pharao Josebor ghorbogun hobor pelo. 14 Sei porendi, Josebe tar babore ar tar beg sodorsiegun hoja dipadelo. Thara begkune pazahottur jon. 15 Sedogkie gori Jakobe Egypt dejot jeinei sidu morilogoi, ar amar Purbo-puruschununio sidu morsiondoi. 16 Tharar heyegani Seckemo adamot gareiondoi jien Abrahame rubuor tenga? dinei Hamoror puogunottun hinnie. Hamore olode Seckemor bab.
17 “Hintu jokkene Itchiore Abra-hamore soittio dede somoibuo hai ejer, tharar manuschun bes oinei Egypt dejot onek jon barilak. 18 Sebeden Josebore hobor no peie ek jon oinnio raja udilo. 19 Ei rajabuoi amar manuschunore phagara buddhiloi hamot lageinei, amar Purbo-puruschununore dug-hosto lageie. Ar tharar huji gurogun moron para lugimara bajei die. 20 Sei lokkene Mosi jormo oie, ar Itchiore tar ugure baari hujhi. Tare tar babo ghorot tin mas paleion. 21 Hintu tare phelei dineio, Pharaor jhibuoi tare tuli aninei tar nijor puo dogkie gori paleiegoi. 22 Ar Egypt manuschunor beg gyenani Mosi shigi loie, hodat ar hamot the doro elo.
23 “The solis bojor oinei, tar bheilogkun Israel manuschuno sidu jebartei mone holo. 24 Ar ek jon Egypt manjie tharar ek jon Israel manjiore be-aini gorte deginei, the tare rokkie gorsie. Sei Egypt Manuschuore hena ugureibartei the tare morei phellie. 25 Haron Mosi mone gorsiede tar nijor manuschune buji paribakke tharare uddhar goribartei Itchiorbuoi tare dipadeie. Hintu thara sien no bujon. 26 Ar tar hellie, dijon Israel manjie mara-mari gorte Mosi degilo. The tharare milie-mili gori dibartei selo. The tharare holo, ‘Bheilog, tumi bhei-bhei daw. Hittei tumi be-aini ham gora-gori goror?’ 27 Hintu tar parallie duji manuschuoi Mosire theli dinei holo, ‘Amar ugure sason-gorie ar bijier gorie honna tore baneie? 28 Gelle hellie tui Egypt Manuschuore morei phellioschie dogkie gori more morei pheleibar sor ni na?’ 29 Mosi sien suninei, the Midian dejot dhei jeie. Sidu the bi-deji sannie gori roiegoi ar sidu tar dibie puo peie.
30 “Solis bojor bidi janar por-endi, moruobomit Sinai Mounnuot ekkuo sorgo-dud ekkuo jaburottun aguno jilo ugure tar sidu dega diegi. 31 Mosi sien deginei, the degkiede sienot amok olo. Ar the hai jeinei rini sadegoi, Probur robuoi tare holo, 32 ‘Mui tor Purbo-puruschununor Itchiorbuo. Mui Abrahamor Itchior, Isaakor Itchior ar Jakobor Itchior.’ Mosi dore sei no parilo ar. 33 ‘Sebeden PROBUIE tare holo, “Tor horomani then-gottun huei tho, haron tui thiei agoschie jagan pobitro madi. 34 Egypt dejot agonde mor manuschuno hostogani jodepode gori mui degkuong, thara bor-nijes peladonde sieni mui suinniong ar tharare uddhar goribartei mui elung.” ’
35 “Jei Mosire thara, ‘Honna tore sason-gorie ar bijier gorie baneie,’ hoinei phirei duon, tar sidu hero-jhaburot dega diegidie sorgo-dudtuo darai tare Itchiore sason-gorie ar uddhar gorie obartei dipadeie. 36 Sei manuschuoi Egypt dejot, Ranga sagoranot ar moruobomit jagat amok ar sinno ham solis bojor deganar porendi tharare the nigilei annie.
37 “Ibie sei Mosi Israel manus-chunore edogkie gori hoiede sibie, ‘PROBU, amar Itchiorbuoi mor dogkie muni ek jon tomartun banebo. Tar hoda suinnio.’ 38 Sinai Mounnuot tarloi ar amar purbo-puruschundoi hoda hoiede sorgo-dudtuo somot moruobomit thubo oie manuschuno loge the elo. Amare dibartei jibon dede Itchioro hodagani the gojhi loie. 39 Hintu amar Purbo-puruschunun tare aw-pela gorsion. Ar thara mone-mone Egypt dejot phiri jeion. 40 Thara Aronore hoion, ‘Amar mujunge-mujunge jebartei amattei Itchiore jugolei de. Haron amare Egypt dejottun nigilei anniede Mosir hi olo ami hobor no pei.’ 41 Sei lokke thara ekkuo goru-shawh mokti banenei, Sibiere dali-pujo duon. Tharar nijor adedi baneie sibieloi thara phorti gorsion. 42 Sebeden Itchiore tharare pid die. Taragun thara tobona goron para the tharare iri gelo. Sien muniguno boibuot edogkie gori lega age,
‘Oh Israelo ghorbuogun, moruobomit solis bojoro bidirie more poshu ar dali-pujo duo ni na?
43 Tumi Molokuor? ar thara Itchioro terpal haboro shani ghoran tullio. Tobona goribartei tumi siguno moktigun baneio. Senottei mui tomare Babylono obola nejeim.’
44 “Amar Purbo-puruschununor moruobomit shakkir tambulo ghoran elo. Mosi degkiede dogkie gori banebartei Itchiore tare thik gorsie. 45 Joshua amol song, ek pirittun ek piri gori amar Purbo-puruschunune sien peion. Joshua somot sien ei dejchanot bhoreiondi. Sei lokke Itchiore Be-jadtunore amar Purbo-puruschununo samnettun dabei dinei dejchanot sommondi. David amol song sei shakkir terpal haboro ghoran hamot lageio. 46 Davide Itchioro doyegan peinei Jakobor Itchiorbuottei ekkan thebar jaga banebartei sujuk magkie. 47 Hintu Solomone Itchioro ghoran baneie.
48 Hintu, begottun dangor Itchiorbuoi adtoi tullie mondirot no thai. Sien munibuoi hoiede doge oi: 49 PROBUIE hor,
‘Sorgogan olode mor singason, ar pittimigan olode mor theng thoidie jaga. Mortei henjannie ghor tuli diba, bah,
hudu mor jireibar
jagan obo?
50 Mor adtane ieni begkani no banai ni na?’
51 “Tumi ekmonniegun ar ulluogun! Tumi onsur Pobitro Aptabuore badha duo. Tomar Purbo-puruschunune gorsionde dogkie gori tumio gorode. 52 Hon munibuore tomar Purbo-purus-chunune hosto no lagan? Je Dhormittobuo ebode sombonde agami hoidie Sibiere thara morei phellion. Ar ikkie tumi sei Pobitrobuore dhoga dinei hun gorsio. 53 Sorgo-dudtunor sahajjio darai tumi Nioman peio, ar tumi ien no palo.”
Stephanare Sil Mela Dilak
54 Thara sei hodagani suninei, rage tare dad hadon. 55 Hintu the, Pobitro Aptaloi boron oinei agajo mokkie rini selo ar Itchioro oborugkan degilo, ar Jisu Itchioro denedi thiei agede degilo. 56 Ar the holo, “Sawh, mui degongor sorgogan hulo jeie, ar Munischioro Puobuo Itchioro denedi thieie gori age.”
57 Sebeden tharar hanani nadinei, birat ro sarinei begkune ek loge tar mokkie gelak. 58 Tare sohoro barendi sejerei ninei sil mela dilakkoi. Ar shakkigune tharar haborani ek jon gabur manjior thengo hure tholak. Sibier nangan olode Saula. 59 Thara Stephanare sil mela dede, Stephanai Itchiorbuore dagode holo, “Probu Jisu, mor aptabuo gojhi lo.” 60 Sebeden the adu pari porinei birat ro gori holo, “Probu, ei pabpano bharan tharare no dis.” Ar the ien hoinei ghum gelo.