Ananialoi Sapphira
5
Anania nange ek jon manus tar mogkuo Sapphiraloio ekkan sompotti bejilak. 2 The tar mogkuore janeinei tenga? ek bhag rageinei, aro ek bhag aninei apostoluno tengot gojei dilogi. 3 Hintu Pitore tare holo, “Anania, hittei tor ontorot Soitan somilo? Pobitro Aptabuo sidu tui gal madinei ek bhag jagagano tenga? tortei rageios. 4 No bejode sien tor elode noi ni? Bejana porendi tengagun? tor odhiharot elakke noi ni? ien hittei tor ontorot hadeiosh? Tui manjior sidu gal no madile, hintu Itchioro sidu gal madile.” 5 Sebeden ei hodagani Anania suninei, borat gori pori mori gelo. Senottei jigune ei hodagani suinnion sigunor begkunor shanggadik dor buguot somilo. 6 Gabursiegune udinei morabuo bereilak, sebeden bhaar gori ninei tare garelakkoi. 7 Tar mogkuo hi godhi gelo hobor no peie gori, perai tin ghonta porendi einei somilogi. 8 Sebeden Pitore tare holo, “Jagaganot edukkun ne tenga? peiode?” The holo, “Oi, sedukkun.” 9 Sebeden Pitore tare holo, “Probur Aptabuo porikkie sebartei hingori eksomare manila? Tor negkuore gareondoidie sigunor thengani dhoranot sa. Thara toreio bhaar gori nejeibak.” 10 Sebeden jogon-togon tar tengot borat gori pori mori gelo. Ar gabursiegune einei tare mora bade degilakki. Tare thara bhaar gori ninei tar negkuo hure garelakkoi. 11 Senottei beg mondoliguno ugure ar sei hodagani sunnionde siguno begkunor dor buguot somilo.Apostolune Onek
Manus Gom Gorilak
12 Sebeden apostoluno adedi onek sinno ar amok ham manus-chuno moiddie gora oie. Ar thara begkune ekmon oinei Solomono barandagano tole egottor olak. 13 Judio manuschune tharare shanggadik man gorilieo, thara-ttun huno jone tharar loge mijeibar sahoj no goron. 14 Shagor milie ar morod bischiasi bes oi-oi Probu sidu ek olakki. 15 Senottei, Pitore jade homsei-hom tar shababuo heyet pore para, aw-sugkiegun nigilei aninei podtanit bischoni ugure ar padi ugure porei tholakki. 16 Jhag-jhag manus seropala sohoranittun Jerusalem Sohorot thubeilakki. Aw-sugkie ar hajorchie apta darai hosto peie thara annion ar sigun begkun gom olak.
Apostolunore Hosto Lageilak
17 Sebeden moharajgurutha-gurbuo ar tar beg somarsiegun, jigun Sadduki dolot elak thara thieilak ar tharattun rak udilo. 18 Thara apostolunore dhorinei sorkari jiel-hanat bhorei tholakkoi. 19 Hintu reidot Probur ekkuo sorgo-dude jiel-hanar duorani huli dinei tharare nigilei aninei holo, 20 “Jo, mondirbuot thieinei beg manuschunore ei jibonano hoda hogoi.” 21 Apostolune sien suninei, bennie pottie mondirbuot thara jeinei sigkie dilakkoi. Sei lokkene moharajguruthagurbuo ar tar loge elakke sigune lun-ginei, beg Israelo borjonnun somot temmangot bojinei, sagorsie-gunore apostolunore jiel-hanattun anibalottei hoja dipadelak.
22 Hintu mondiro polischune jiel-hanat lungineioi, thara no degilakkoi. Sebeden thara phiri jeinei temmangot janeilakkoi. 23 Thara holakki, “Jiel-hanagan gome-dalei nattie gori ami degkigoi, ar shandaridiegun duoro barendi thieie elak. Hintu duorani huli seinei bidirie huno jon no degioi.” 24 Rajguruthagurbuoi, mondiro subidaro netabuoi ar mohaguruthagurune sei hodagani suninei amok oinei holak, “Ien hi obo sei?” 25 Sebeden ek jone einei hologi, “Sawh, tumi jiel-hanat bhorei thoiogoidie manuschune mondirbuot thieinei manuschunore sigkie dedondoi.” 26 Sebeden netabuoi ar mondiro polischune apostoluno sidu jeinei tharare juj gori anilakkoi. Haron adikkie manuschunottun sil mela haan bili thara doreon. 27 Tharare aninei temmang gortonde moiddie thiei bajei dilakki. Sebeden moharajguruthagurbuoi tharattun pujor gorilo, 28 “Sei nangandoi sigkie no dibartei ami tomare shokto gori mana gorsei. Sawh, tomar sigkien Jerusalemot bhorei dila. Ar sei Manuschuor loganor dujchan amar ugure badei dibar sor.”
29 Sebeden Pitore ar oinnio apostolune holak, “Manjior hoda no maninei Itchioro hoda amar manana osit. 30 Amar Purbo-puruschununor Itchiorbuoi jiei tulliede Jisure tumi gajot tanginei morei phellio. 31 Israel manus-chunore mon phirei dibartei ar pab hema dibartei Itchiore tare Probu ar Mukti gorie obartei tar denedi ojolot tullie. 32 Ei hodaganittei ami olongge tar shakkigun. Ar thik sedogkie gori Itchiorore je mane sigunore the dede Pobitro Aptabuoio shakki.”
33 Sei hodagani thara suninei, rage tharare morei pheleibar sadon. 34 Sebeden temmangot ek jon member thieilo. The Pharisi dolo manus ar tar nangan olode Gamaliel. The Niomanit podu ar begkune tare sorman goron. Hanekkon apostolunore barendi thobarlottei the ugum dilo. 35 Sebeden the tharare holo, “Oh Israel manuschun, ei manuschunore hi goribar sor sien gome bhabi sawh. 36 Haron agendi theudase nigilinei the ek jon bili holeie. Perai ser shot jon manus tar somare mijeion. Tare morei pheleinei, tare mannionde sigun begkun settera oi jeion ar boij jeiondoi. 37 Tar porendi, Galili hullie Juda, manuschun gondonde lokke nigilienei tar somare onek manus nejeie. Theo ses oinei, tare mannionde sigun begkun settera oion. 38 Ar ikkie ieno mui tomare hong, tharare bad dinei iri duo. Haron judi ei buddhigan bah haman manjiortun ole, ien hitchu odo noi. 39 Hintu judi ien Itchiorottun ole, tumi phelei diparta noi. Tumi Itchioro biruddi judduo gore para oi pare.”
40 Sebeden thara tar hoda dorilak. Ar apostolunore daginei marilak. Jisur nange no hobartei tharare ugum dinedi jebartei dilak. 41 Jisur nange thara aw-sorman obarlak oion bili gona oie hinottei sebeden utchob oinei temmanganottun gelakkoi. 42 Ar din bagene mondirbuot ar ghore-ghore Jisu olode Kristo bili sigkie denagan ar prosar goranagan no thaman.