Jisure Dhori Dibartei Juda Iskariode Ham Helo
Mot 26:14 -16 ; Mak 14:10 -11
22
Moli-agullie pidie Utchob-pan, Rokkie Utchob honde sien hai ejchie. 2 Manuschunore dhoran hinottei, rajguruthagurune ar dhormo niomo mastorune Jisure morei pheleibartei sadon. 3 Sebeden Juda, hellie nange Iskariod honde sibier monot Soitan somilo. The olode baro jon sisijiottun ek jon. 4 The rajguruthaguruno sidu ar Mondiro poliso porisalona gorieguno sidu jeinei hingori the Jisure dhori di dibo hologoi. 5 Thara hujhi oinei tare tengaδ dibartei haam helak. 6 Theio manilo, ar manuschunottun durot gori thagke seiot the Jisure dhori dibartei sujuk togar.Probur Bellie Haanabuo
Mot 26:17 -30; Mak 14:12 -16
7 Sebeden Moli-agullie pidie Utchobpanot, Rokkie Utchobo bera-shagolo shawhbuo habonde dinnuo lungilogi. 8 Jisu Pitorore ar Johonore dipadelo. The tharare holo, “Rokkie Utchobo haanabuo hebartei jeinei jugol gorogoi.” 9 Thara tare holak, “Ami hudu jeinei jugol gori dibonggoi tortun mone hoi?” 10 Jisu tharare holo, “Suno, tumi sohoranot somibagoio, ek jon morode hummoi pani buode tomar mokkie ebo. The sumibogoidie ghoranot tar pune-pune jeio. 11 Ar sei ghoro girojchuore hoio, ‘Guruthagure hoiede, “Mor sisjiogun somot Rokkie Utchobor haana hembe gorba gudhibuo hudu?” ’ 12 Ghoro girojchuoi tomare uguro tolat ekkuo sajeie dangor gudhi degei dibo. Rokkie Utchobo haana siot jugol gorsiogoi.” 13 Thara jeinei, Jisu tharare hoiede doge-doge lagot pelakkoi. Sebeden Rokkie Utchobo haana thara jugol gorilak.
14 Okto oinei, Jisu tar baro jon sisjio somot hebartei bojilo. 15 Sebeden the tharare holo, “Hosto bhug goribar age, ei Rokkie Utchobo haanabuo tomarloi eksomare hobar mortun baari mone hor. 16 Haron mui tomare hongor, Itchioro rejjiot Rokkie Utchobpan puron no oi song ei haanabuo hedung noi ar.” 17 Sebeden the golojchuo adot loinei donniobad dilo. Ar the holo, “Ien loinei tomar moiddie bhag goro. 18 Haron mui tomare hongor, Itchioro rejjiogan no eje song, mui angguro ros hedung noi ar.”
19 Sebeden the pidiegan adot loinei donniobad dilo. Ar the pidiegan hotta gorinei tharare dinedi holo, “Ien olode mui tomare dimbie heyegan. More monot rageibartei ien gorsio.” 20 Thik sedogkie gori thara haanar porendi, the golojchuo adot loinei holo, “Ei golojchuo olode mor logandoi die nuo nioman, jien tomartei dali die oie.
21 Hintu sawh, more dhora bajei dibode adtano mor loge tebilanot age. 22 Munischioro Puobuottun Itchiore thik gorsiede doge-doge mora poribo. Hintu more dhora bajei diebuor hobal puribo!” 23 Sebeden sisjiogune tharattun honna edogkie goribuo thara-thara pujor gora-gori gorton.
24 Thara moiddiottun honna begottun dangor obo, sieno sombonde thara-thara torga-torgi gorton. 25 Jisu tharare holo, “Be-jadtunor rajagune tharar ugure giroji dogkie sason goron. Ar ‘gunor lagonde manuschun’ honde sigunor, tharar ugure odhihar thai. 26 Je Tomar moiddie begottun dangor oi, the begottun sigonnuo ok. Ar je murubbi oi, the sagorsiebuo ok. 27 Haron, honna dangor sei? Hebartei bojede sibie, nahi, loibiot gorede sibie? Hebartei bojede sibie noi ni dangor de? Tobuio muina tomar moiddie loibiot goriebuo dogkie. 28 Hintu tumi na mor pune-pune porikkie moiddie ela. 29 Mor Babe more ekkan rejjio dede dogkie gori muio tomare ekkan rejjio dim. 30 Mor rejjiot tumi mor loge haba-daba goribartei ar singasonot bojinei Israele baro jadore sason goribartei mui tomare odhihar dim.”
31 Ar Probuie holo, “Simon, Simon, sha Soitannuoi tore gom poje para pojibartei tore magkie. 32 Hintu tor bischiaschane borei eje para, mui tortei shokto gori bor magi duong. Ar tui jokke mor idu phiros, tor bheilogkunore shokto goris.” 33 Sebeden Simone tare holo, “Probu, mui tor loge jielot jebartei ar tor loge mori jebartei jugol agong.”
34 Jisu holo, “Pitor, mui tore hongor: Edchie dinnuot radai dag no haribar age tui more no sinong hoinei tin bar bharebe.”
35 Sebeden Jisu tharare holo, “Mui tomare tengaδ hollie, hotchal ar joda sara gori dipadenei hitchu pora no pode noi ni?” Ar thara holak, “Ami hitchu pora no pei” 36 Sebeden Jisu tharare holo, “Hintu ikkunu, jar tengaδ hollie age the lok. Thik sedogkie gori, jar porbhajchie beg age the lok. Ar jar horgo nei the tar shilummuo bejinei ekkan hini lok. 37 Mui tomare hongor: Sastrot hoiede hodagan mor iot puron obo. Pobitro Sastrore hoi, ‘Tare niom bhonggo gorieguno somare bhoreion.’ Haron mor sombonde beg hodagani puron obar hajeie.” 38 Thara holo, “Probu, iot dien horgo age.” Sebeden Jisu tharare holak, “Obo, obo.”
Oliv Mounnot Jisu
Bor Magilogoi
Mot 26:36 -46; Mak 14:32 -42
39 Sebeden Jisu nigili jeinei, the jaidie jaganot, Oliv mounnuot gelo. Ar tar sisjioguneo tar pune-pune gelak. 40 Sei jaganot lunginei, the tharare holo, “lubbot no poro para bor mago.” 41 Ar the tharattun pharok oinei, ek silo idie durot huttur durot jeinei, adu hubinei bor magilo. 42 The holo, “Ba, judi Tor ischie oi, ei golojchuo mortun neja. Hintu mor ischie doge no oinei, tor ischie doge ok.” 43 Sebeden sorgottun ekkuo sorgo-dud tar idu dega dinedi tare bol dilogi.
44 Shanggadik mono duge Jisu aro shokto gori bor magilo. Birat-birat lo phuduo dogkie gori tar gham phuduo madit porton. 45 Bor maganattun udinei, the tar sisjioguno sidu gelo. Mono duge ghum jadonde degilogoi. 46 Sebeden the tharare holo, “A hittei ghum jor? Lubbot no poro para udinei bor mago.”
Jisure Dhorilak
Mot 26:47 -56; Mak 14:43 -51;
Jhn 18:2 -11
47 Ar Jisu hoda hode seiot, sawh, thara hai ek jhag manus lungilakki. Baro jon sisjiottun ek jon Juda honde sibiei sigunore annie. The Jisure sumibartei hai ghoneiegi. 48 Hintu Jisu tare holo, “Judai, Munischioro Puobuore ek summon dinei dhora bajei dibe oi?” 49 Tar seropala elakke sigune hi obo deginei thara holok, “Probu, horgoganiloi beja ureibong ni na?” 50 Tharattun ek jone bego moharajguru-thagurbuor sagorsiebuore beja urei, tar den hanan habi phelei die. 51 Jisu holo, “Obo ebel.” Ar the tar hanan dhori dinei gom gori dilo. 52 Sebeden Jisu tar biruddie ejchionde rajguruthagurunore, Mondiro polisor lobiot goriegunore ar borjonunore holo, “Mui daget ni na, tumi horgo ar mugorloi ejchiode? 53 Din bagene tomar loge Mondirbuot elungge lokke tumi more no dhoro. Hintu ien tomar sujuk ar andharanor hemoda.”
Pitore Jisure Bharilo
Mot 26:69 -75; Mak 14:66 -72;
Jhn 18:15 -18, 25 -27
54 Sebeden thara Jisure dhoranar porendi thara moha rajguruthagurbuo ghorot anilak. Hintu, Pitore durot theinei pune-pune elo. 55 Jokkene thara udono song moiddie agun jaleinei hureie gori boji agon, siot Pitoreo tharar somare bojilogoi. 56 Sebeden ekkuo sagorsie-miliei tare agun phuode deginei, gome-dalei tare rini seinei holo, “Ei manuschuoio tar loge elo.”
57 Hintu Pitore bharenei holo, “Miliebuo, mui tare no sinong.” 58 Aro hanekkon porendi oinnio ek jon manjie tare deginei holo, “Tuio ek jon tharar dolo manus.” Pitore holo, “Bhai, mui noi!” 59 Ar perai ek ghonta porendi, aro ek jone shokto gori holo, “Theo Galili hullie hinottei, ei manuschuo hamakkai tar loge elo.” 60 Pitore holo, “Bhai, tui hi hor, mui no bujongor.” Ar the hode-hode ekkuo radai dag harilo. 61 Sebeden Probuie pijendi phirinei Pitorore selo. Ar Probuie tare hoiede hodagan Pitoror monot udilo, “Radai dag no haribar age, tui more tin bar bharebe.” 62 Ar Pitore barendi jeinei gujhi-gujhi hanilogoi.
Soinniogune Jisure
Thatta Gorilak
63 Jisure dhori agonde manus-chune tare pidilak, ar thatta gorilak. 64 Tar muon dagi dinei musei suorelak. Thara tartun pujor gorton, “Muni dogkie gori amare hodei, honna Tore suoreilo?” 65 Tare sorjade, thara shagor oinnio bojong hoda tare holak.
Pilado ar Herodor
Mujungot Jisu
66 Ar phor oieio, manuschunor borjonun, rajguruthagurun, ar dhormo niomo mastorun sidu thubelakkoi. Sebeden thara-thara Sanhedrinot nejeilak. 67 Thara holak, “Tui judi Kristo ole, amare ho.” Hintu Jisu holo, “Mui judi tomare hong, tumi more je bischias no goriba. 68 Ar mui judi tomartun pujor gorong, tumi more hamakkai uttor no diba. Tumi more irio dida noi. 69 Hintu ikkunuttun dhori, Munischioro Puobuo hemoda-bola Itchiorbuo denedi buji thebogoi.” 70 Sebeden thara begkune holak, “Salen, tui Itchioro Puo?” Jisu tharare holo, “Tumi holade sibie mui.” 71 Thara holak, “Oinnio jon shakki die amar a hittei lagette ar? Tar muottun ami nije sunilong daw.”