Rani miliebuor Dorjio Dhoranar Hoda
18
Asha no areie gori onsur bor magibartei, Jisu tharare ekkan tulona hoda hoi dilo. 2 The holo, “Ekkan sohorot ek jon bijier gori die elo. The Itchiorore no dhorai ar manuscho hie no gore: 3 Ar sei sohoranot ekkuo rani-milie elo. The nitto bijier goridiebuo sidu jai ar hoi, ‘Mor biruddibuoloi gorongotte bijieran sirei dena thik mode bijier goride.’4 Bhaluk bilom song bijier goridiebuoi sien gori dibar no sai. Hintu porendi the bhabi selo, ‘Mui Itchiorore no dhorang ar manuschio hie no gorong. 5 Hintu ei rani-miliebuoi more thoschie lagai hinottei, tar bijieran thik mode gori dim. Mui judi sien gori no duong, the no ageie gori ebo, ar more agei dibogi.’ ”
6 Sebeden Probuie holo, “Be-dhormi bijier goridiebuoi hi hoi suno. 7 Itchiore bei tullie manuschune tare reide-dine dagilie the thik mode oinniei bijier gori dibo noi ni? The tharare obohela goribuo ni na? 8 Mui tomare hongor, the jhadi gori thik bijier gori dibo. Hintu Munischioro Puobuo ele, songsarot bischiaschan pebogi ni?”
Pharisibuor Ar Hajana-tulliebuor Tulona
9 Jigune nijere-nije dharmig bili bischias goron ar manjiore hitchu mone no goron sigunoreo Jisu ei tulona hodagan hoi dilo. 10 The holo, “Di jon manus bor magibartei Mondirbuot gelak. Ek jon olode Pharisi ar ek jon olode hajana-tullie. 11 Pharisibuoi thieinei the bormagode holo, ‘Oh Itchior, mui oinnio manjio dogkie bolajuri, oinniei gorie, shanda gorie ar ei hajana-tulliebuor dogkie noi hinottei mui tore donniobad dongor. 12 Saptai di bar ubos thang, ar mui ham hangge sittun dos bhagor ek bhag duong.’ 13 Hintu hajana-tulliebuoi durot gori thiei age. The agajo mokkieo rini sebar sahoj no pelo. The tar bugkuo bugkei-bugkei holo, ‘Oh Itchior, mui pabi, more doye gor.’ 14 Mui tomare hongor: Itchiore ei hajana-tulliebuoi ghorot jade dharmig bili mone gorilo, hintu Pharisibuore noi. Haron je nijere-nije dangor mone gore, tare sigon bana obo. Ar je nijere-nije sigon holai, tare dangor bana obo.”
Jisu Ar Sigon Gurogun
Mot 19: 13 -15; Mak 10:13 -16
15 Ar manuschune tharar sigon gurogunoreio tar idu annion jene Jisu tharare dhorinei asirbad gore. Hintu sisjiogune deginei tharare aw-hoda holak. 16 Hintu Jisu tharare daginei holo, “Sigon gurogunore mor idu ebartei duo, tharare mana no gorsio. Haron Itchioror rejjiogan olode ei sigon guroguno dogkien. 17 Mui tomare soittio hodagan hongor: Je esannie ekkuo sigon guroi Itchioro rejjiogan gojhi loidie dogkie gori gojhi no loi, the sidu somi parto noi.”
Ek Jon Dhoni Sason-gorie
Mot 19:16 -30; Mak 10:17 -31
18 Ek jon dhoni sason-gorie pujor gorilo, “Gom guruthagur, ononto jibon pebartei mor hi gora poribo?”
19 Sebeden Jisu tare holo, “Tui a hittei more gom hole? Itchior bade ar ek jono gom nei. 20 Tui shilegun hobor pas daw, ‘Shanda no goris,’ ‘Hun no goris,’ ‘Sur no goris,’ ‘Mijie shakki no dis,’ ‘Tor bab magunore sorman goris.’ ” 21 Manuschuoi holo, “Gaburottun dhori sei beg ugumani mui palei ejongor.” 22 Jisu sien suninei, tare holo, “Ejosong tor ekkan jinij bagi age. Tor hi-hi age sieni begkani bejinei tengagunδ gorib dugkiere bhag gori degoi. Sorgot tor dhon thebo. Sebeden einei mor pije-pije eis.” 23 Hintu manuschuoi sei hodagani suninei baari monot dug olo. Haron the baari dhoni. 24 The baari monot dug oiede Jisu deginei holo, “Jigunor dhon-sompotti age sigunor Itchioror rejjioganot somade hodog aghattie! 25 Haron ek jon dhoni manus Itchioror rejjioganot somana darane ekkuo uth sujor pajidi sominei nigili janagan bes utchuo.” 26 Sebeden suinnionde sigune holak, “Salen, honna mukti oi paribo?” 27 Hintu Jisu holo, “Manjiortei jieni aw-sombob, sieni Itchiorottei sombob.”
28 Sebeden Pitore holo, “Sah, ami beg phelei einei tor loge elong.” 29 Jisu tharare holo, “Mui tomare soittio hodagan hongor: Itchioror rejjioganottei hoiek jone ghor-duor, bab-ma, bhei-bon, mog-puo phelei ejchion. 30 Ei jugkuot thara sittun onek dunuo pebak. Ar ebode jugkuot thara ononto jibon pebak.”
Jisur Morono Hodagan
Agami Hoi Dilo
Mot 20:17 -19; Mak 10:46 -53
31 Jisu tar baro jon sisjio ek huredi ninei tharare holo, “Suno, ami Jerusalem song jeir. Munigune Munischioro Puobuor sombonde legkuonde sieni begkani puron obo. 32 Haron thara more Be-jadtunor adot gojei dibag. Thara more azibak, thatta goribak ar more sep phelei dibag. 33 Thara more sabuk maranar porendi morei pheleibak. Ar tin dine mui aro jiei udim.” 34 Sisjiogune sei hodagani ekkano no bujilak. Sei hodagani tharattun ghubei thuo oie hinottei tharare the hi holo hobor no pelak.
Ek Jon Bikkie Magie
Han Gom Gorilo
Mot 20:29 -34; Mak 46 -53
35 Sebeden Jisu Jerikko sohoro hai lunginei ek jon han manus podo pazarat bojinei bikkie magode degilo. 36 Jhag-jhag manus jade, hi awr the pujor gorilo. 37 Thara tare holak, Nazareth hullie Jisu jar. 38 Sebeden birat ro gori the holo, “Jisu, Davidor Puobuo, more doye gor.” 39 Akke-akke jadonde manuschune the sub gori thebartei tare gubilak. Hintu the sie bes birat-birat ro gori holo, “Davidor Puobuo, more doye gor.” 40 Sebeden Jisu mow oinei manuschuo tar idu anibartei ugum gorilo. Manuschuo tar hai lunginei, Jisu tartun pujor gorilo, 41 “Mui tore hi gori didung tortun mone hoi?” Sebeden the holo, “Probu, mui degidung sang.” 42 Jisu tare holo, “Tui degis. Tor bischiaschane tore gom gorilo.” 43 Jogon-togon manuschuoi sogedi degilo. Ar the Itchiorore baini gorinei Jisur pune-pune ja dorilo. Begkune sien deginei tharaio Itchiorore baini gorilak.