Pharisibuo Ghorot Jisu
14
Ek Jireni Dinnuot edogkie olo, ek jon Pharisiguno murubbi ghorot Jisu pidie hebartei jeinei, Pharisigune tare sog di agon. 2 Ar sawh, tar mujungot ek jon phullie pirie manus elo. 3 Jisu dhormo Niom janiegunore ar Pharisigunore holo, “Jireni Dinnuot aw-sugkie gom gori dibar Niomane hoi ni no hoi?” 4 Hintu thara no madi thelak. Ar the manuschuore dhorinei dhori gom gori dinei dipadelo. 5 Jisu tharare holo, “Tomar gadha ok bah goru ok gadot porilegoi, Jireni Dinot jogon-togon tani no tulibagoi?” 6 Ar thara sienir sombonde Jisure uttor di no parilak.7 Hebartei boleie manuschune begottun gom bojibar jagani bei lode Jisu thareinei, the tharare ekkan tulona hoda hoi dilo. 8 The holo, “Manjie tore mela-meitbanot bolele, sorman hei paidie jaganit no bojis. The tortun bes sormanio manus bolei pare. 9 Sebeden tore boleiede manuschuoi sei boleie manuschuo loi einei tore hobogi, ‘Tor bojibar jagagan etare de.’ Ar tui lajei-lajei sorman hom hei paidie jagano mokkie bojibartei jei pebe. 10 Hintu thara tore bolele, jeinei sorman hom hei paidie jagat bojischoi. Sebeden tore boleiede sibiei ele, tore hobogi, ‘Bondhu, gom jagat bojsi na.’ Sokkene tor gorba somarsiegune mujungot tui sorman hei pebe. 11 Haron je nije-nije dangor holai, the sigon oi pebo. Ar je nije-nije sigon holai, the dangor obo.”
12 Ar Jisu tar boleiebuore holo, “Bennie ok bellie ok bhat hebartei bolele, tor bondhu ok tor bhei ok tor sodorsiegun ok tor thagoie paralliegunore no dagis. A no ole sien tore suje para obo bili tharaio tore bolebak. 13 Hintu tui meitban gorilie, goribpun, rukkiegun, lengun ar hanun boleis. 14 Thara tore ugurei no paribak hinottei, tui hoballie sie. Haron dharmig manuschun jiei udibagke lokkene tore sujo obo.”
Bor Meitbanor Tulona Hoda
15 Jisur loge boi agonde sigunottun ek jone sei hodagani suninei the Jisure holo, “Itchioro rejjiot haidio hebogoidie sibie hoballie.” 16 Hintu Jisu tare holo, “Ek jone ekkan meitban gorinei the shagor manus boleie. 17 Bellie hebar hadallie, the boleiede siguno sidu tar dajigun dipadelo. The jeinei hologoi, ‘Ikkunu beg jugol oie, ejo.’ 18 Thara begkune ek song gori dilak. Polim manuschuoi tare holo, ‘Mui ekkan hed hinong. Sien mui jeinei sa puribogoi. Mui tortun mab sang.’ 19 Aro ek jone holo, ‘Mui pas jora sela-goru hinong. Sigun joga sebartei jangor. Mui tortun, mab sang.’ 20 Aro ek jone holo, ‘Mui mog ekkuo loiong. Senottei mui ei no parim.’ 21 Sei dajibuoi einei tar girojchuore sei hodagani janeilogi. Sebeden ghoro girojchuoi rak olo. The tar dajibuoi holo, ‘Sohoro bor podtanit ar sigon podtanit seret-seret jeinei goribpun, rukkiegun, adurun ar hanun idu andoi.’ 22 Sagorsiebuoi holo, ‘Babu, tui ugum duoschie sien mui gorsiong. Tobuio ejosong hali jaga age.’ 23 Girojchuoi dajibuoi holo, ‘Hulo raj-podtanit ar sigon podtanit jeinei mor ghoran bhore para tharare bolajure andoi.’ 24 Haron mui tomare hongor, ‘Mui boleiongge sigunottun ek joneo mor bellie haanabuo sagi sei pedak noi.’ ”
Jisur Sisjio Ode Moillio Dena
Mot 10:37 -39
25 Sei lokke jhag-jhag manus Jisur loge jadon. The tharar mokkie phirinei holo, 26 “Je mor idu einei tar bab-ma, mog-puo, bhei-bon ar tar nijor porananio hos no peie gori thei no pare, the mor sisjio oi parto noi. 27 Ar je tar kroschan buginei mor loge ei no pare, the mor sisjio oi parto noi.
28 “Tomartun ek jone judi ekkan ojol ghor tulibar sai, the akke bojinei hodog horoj lagibo ar tar tengagundoiδ sara gori paribo ni no paribo ijeb gori sebo. 29 The judi ijeb gori no sai, ham goranar porendi judi tar ojol ghoran sara gori no pare, je dege the bege tare azibak. 30 Thara hobak, ‘Ek Manuschuoi ghoran tulona arambo gorsie, hintu sara gori no parilo.’
31 “Bah, judi ekkuo rajai oinnio aro ekkuo rajar biruddie judduo goribartei jai, sale, the akke boinei sintie gori pebo. Huri azar soinnio loi tar biruddie judduo goribartei ejer, dos azar soinnio loi the tare judduot dori paribo ni no paribo thik gori pebode noi ni? 32 The judi tare judduot dori no pare, the dud ekkuo padei pebo. Ar rajabuo judduo goribartei hai no ette, tarloi milie-mili obar hoda hoi pebo. 33 Senottei, tomar hi-hi age begkani thiek no gorilie mor sisjio oi parta noi.